Pwony me 9

Angagi Aye Lurem Lubanga?

Yecu Kricito aye Wod pa Jehovah dok lareme ma cok me amara ma loyo ducu. Ma peya okwo i lobo calo dano, Yecu okwo i polo calo cwec ma cwiny ma tye ki teko. (Jon 17:5) Ci en obino i lobo me pwonyo dano ada ma dok i kom Lubanga. (Jon 18:37) En bene omiyo kwo ne me dano-ni pi laro dano ma luwiny ki i bal ki to. (Jo Roma 6:23) Yecu kombedi tye Rwot me Ker pa Lubanga, gamente me polo ma bikelo Paradic i lobo man.​—Niyabo 19:16.

Lumalaika bene gin lurem Lubanga. Lumalaika pe gucako kwogi calo dano iwi lobo. Gicweyogi i polo ma onongo Lubanga pe ya oyubo lobo. (Yubu 38:4-7) Lumalaika gitye million mapol ata. (Daniel 7:10) Lurem Lubanga ma i wi polo magi gimito ni dano opwony ada madok i kom Jehovah.​—Niyabo 14:6, 7.

Lubanga bene tye ki lureme i wilobo; en lwongo gin ni lucaden-ne. Lacaden i pido tito ngo ma en ngeyo i kom ngati moni nyo jami moni. Lucaden pa Jehovah tito ki jo mukene ngo ma gin gingeyo i kom Jehovah ki yub ma mege. (Icaya 43:10) Lucaden magi gimito konyi me pwonyo ada madok i kom Jehovah calo lumalaika. Gin gimito ni in bene i dok larem Lubanga.