Te Lokke Ngo me Bedo Lakricitayo?—Gin Ango ma Baibul Waco?

Jo mapol i kareni giwaco ni gibedo Lukricitayo; ento, gitero jo mukene i yo marac. Jo mogo i kingi luworo, lugoba, nyo pe ginyuto cwiny me kica. Jo mukene gitimo tim abor. Kit ma gikwo kwede omiyo jo mukene gipenye kekengi ni: ‘Te lokke ngo me bedo Lakricitayo?’

Bedo Lakricitayo kwako ngo?

Yot adada pi ngat mo me waco ni en ebedo Lakricitayo. Ento, meno pe romo. Ma lubbe ki Baibul, Lakricitayo obedo lapwonnye pa Yecu Kricito. (Tic pa Lukwena 11:26) Yecu kikome owacci: “Ka wumoko i lokka, ci wun lupwonnyena adada.” (Jon 8:31) Ki lok ada, pe tye ngat mo ma romo lubo lok ducu pa Yecu labongo roc mo keken. Ento Lakricitayo myero otute me lubo pwony pa Yecu ki dong me kwo nino ducu i yo ma rwatte ki miti pa Yecu. Nen kong labol mogo.

Lukricitayo ginyuto mar

Gin ma Yecu owaco: “Amiyowu cik manyen, ni, wumarre kekenwu; wumarre kekenwu macalo ceng amarowu. Pi man dano ducu bingeyo ni wun lupwonnyena, ka mer tye i kinwu.”—Jon 13:34, 35.

Gin ma Yecu otimo: Yecu onyuto mar bot dano ducu, labongo paro pi rwomgi nyo tekwarogi. En ocango lutwo, omiyo cam bot jo ma kec nekogi, dok omiyo kwone pi jo mukene.—Matayo 14:14-21; 20:28.

Gin ma Lukricitayo gitimo: Lukricitayo ginyuto mar ki bedo ma cinggi yot, bedo labongo apokapoka, ki dong timo kica. Gikonyo jo ma peko odiyogi, dok gitye atera me jalle pi jo mukene.—1 Jon 3:16.

Lukricitayo gigenne

Gin ma Yecu owaco: “An a . . . ada.”—Jon 14:6.

Gin ma Yecu otimo: Yecu onongo genne i jami ducu ma en owaco dok otimo. En pe otuko ki wi dano wek gutim gin ma en mito dok pe obwologi. En onongo ngene macalo ngat ma loko lok ada kadi bed meno ocwero cwiny jo mukene.—Matayo 22:16; 26:63-67.

Gin ma Lukricitayo gitimo: Lukricitayo pe giloko lok goba. Giculo mucoro, pe gikwalo kwo, dok gitiyo matek i dog ticgi ma lubbe ki kit ma guwinye kwede ki ludito ticgi. (Jo Roma 13:5-7; Jo Epeco 4:28) Pe gikwalo jo mukene i wi diro, pe gikwalo peny, dok pe giloko lok goba ka gitye ka pongo fom me penyo tic nyo fom mukene.—Jo Ibru 13:18.

Lukricitayo gitero jo mukene ki kica

Gin ma Yecu owaco: “Wubin bota, wun jo ducu muol ki ma yec onurowu, ci abimiyo wunongo yweyo. <u202F>Wuting ayokona dok wunong pwony ki bota, pien an lakica dok amwol bene ki i cwinya, ci wubinongo yweyo. <u202F>Pien ayokona tingone yot, dok yecca pe pek.”—Matayo 11:28-30.

Gin ma Yecu otimo: Yecu onongo mwol dok lok kwede yot. En ojolo lutino, okweyo cwiny jo ma cwinygi otur, dok otero jo mukene ki woro.—Marako 10:13-15; Luka 9:11.

Gin ma Lukricitayo gitimo: Lukricitayo giloko ki dano i yo me kica; pe giger dok pe giyeto jo mukene. (Jo Epeco 4:29, 31, 32) Giparo pi jo mukene dok giyenyo yo me konyogi.—Jo Galatia 6:10.

Lukricitayo gimedde ki bedo lugen bot luotgi

Gin ma Yecu owaco: “Gin ma Lubanga oribo kacel dano pe opok kingi.”—Marako 10:9.

Gin ma Yecu otimo: Kadi bed Yecu pe onyomme, en ocuko cwiny jo munyomme me bedo lugen i kingi. (Matayo 19:9) En ocikogi me gwokke ki jami ma romo balo nyom.—Matayo 5:28.

Gin ma Lukricitayo gitimo: Lukricitayo gigwokke ki timo jami ma pe keto deyo i kom nyom. (Jo Ibru 13:4) Jo munyomme ginyuto mar ki woro i kingi.—Jo Epeco 5:28, 33.