Tika Iyubbe pi Pekki ma Bino i Nge Nongo Batija?

1-2. Gin ango ma twero konyowa me bedo ma wayubbe pi ariya ma watwero kemme kwede? Mi labol.

WANGEYO ni wabibedo ki pekki i lobo man ma Catan aye doro-ni. Yecu owaco bot lulub kore ni: “Ngene kene ni, ariya bibedo tye.” (Mat. 18:7) Pi meno, waromo bedo ki pekki ma twero weko niyewa doko goro. Me labolle, waromo bedo ki pekki ki omegiwa ki lumegiwa. Ento watwero yubbe woko con me kemme ki pekki magi wek wamedde ki bedo cok ki Jehovah.

² Tam kong i kom labol man. Kare ki kare, kibedo ka poyo wiwa me yubbe woko con pi can ma poto atura. Watwero yubbe nining? Mukwongo, mitte ni kong wange kit can mene ma twero poto i kabedowa. Man pire tek adada ka pud wanyen i kabedo moni. Ka dong wangeyo kit can mene ma twero poto, ci dong waromo keto yub wek wagwokke ka peko meno otimme. (Car. 21:5) I yo acel-lu bene, bedo ber me ngeyo pekki ma watwero kemme kwede i nge nongo batija. Meno bikonyowa me ngeyo gin me atima ka warwatte ki peko meno. Dok wabibedo ki kero me kanyo peko meno kun wamedde ki bedo cok ki Jehovah. (Jab. 17:5) I pwony man, wabinyamo pekki adek ma watwero kemme kwede i nge nongo batija, ki dong gin ma watwero timone me yubbe pi pekki magi.a

KA OMEGO NYO LAMEGO MO OCWERO CWINYI

3. Peko ango ma watwero kemme kwede i kacokke?

³ Twero bedo ni wii pud po tyen mukwongo ma icito i cokke pa Lucaden pa Jehovah. Nen calo gin ma wii po iye maber loyo obedo mar ma omege ki lumege onongo gitye kwede. Pi mar meno, oweko imoko ka maleng ni inongo dini me ada. (Jon 13:35; Kol. 3:12) Meno aye kit ma Brendab owinyo kwede. Ento i nge kare mo ma Brenda onongo batija, gin mo ma en pe obyeko otimme. En owaco ni: “Lamego mo otera marac adada. Dok bene awinyo ka en loko marac i kom jo mukene ma i kacokke. Abedo ki ur madit i kare ma gin meno otimme pien onongo apwonyo ki i kwanna me Baibul kacel ki i cokke ni Lucaden pa Jehovah gitute me bedo ki kuc kacel ki mar.” Tye ada gire ni, omege ki lumege gitute matek me dongo kit mabeco, ento kit macalo watye ki roc-ci, miyo pud wawaco nyo watimo gin marac i kare mogo. (Ep. 4:​23, 24; 1 Jon 1:8) Dong i kare mogo, omego nyo lamego mo twero waco nyo timo gin mo ma cwero cwinyi. (Yak. 3:8) Tye me cwercwiny ni, ariya ma kit meno oweko jo mukene gujuko tic pi Jehovah woko.

4. Gin ango ma twero konyowa ka ce omego nyo lamego mo ocwero cwinywa? (Jo Epeco 4:32)

⁴ Gin ango ma iromo timone i kare-ni wek ka omego nyo lamego mo ocwero cwinyi, pe ijuk tic pi Jehovah woko? Wek odok kiti me lubo tam ma nonge i Jo Epeco 4:32. (Kwan Jo Epeco 4:32.) Ka itute ki keroni ducu me medde ki bedo lakica, ci meno bikonyi me gengo pekki mapol. Mok tammi kombeddi me bedo ka timo kica oyotoyot ka ngat mo owaco nyo otimo gin mo ma ocwero cwinyi. Gin ango ma twero konyi me timo meno? Wii myero opo ni in bene nino ducu ilego Jehovah ni otimmi kica dok cwinyi bedo yom ka en oweko balli. (Mat. 6:12) Ka itamo i kom tyen mapol ma Jehovah otimmi iye kica, bibedo yot boti me timo kica ki jo mukene.

5. Wang ginacoya mene ma twero konyowa ka ngat mo ocwero cwinywa? (Carolok 14:29) (Nen bene cal.)

⁵ Kwan Carolok 14:29. Baibul waco ni ka ngat mo ocwero cwinywa, niang matutc twero konyowa me kweyo kinigawa. Cik ma iye lac man okonyo laminwa Rima, ma onongo batija mwaki mogo manok angec. En owaco ni: “Ka omege nyo lumege guwaco nyo gutimo gin mo ma pe nyuto kica, wiya po ni Baibul owaco ni niang matut konyowa me juko kinigawa. Atamo i kom gin mutimme i kwogi i kare mukato ki dong gin ango mumiyo guloko nyo gutimo gin ma pe nyuto kica. Atute bene me nywako kacel kwedgi i tic me pwony. Timo meno konya me ngeyogi maber.” Meno tam maber adada. Pire tek me ngeyo omegiwa ki lumegiwa maber i kare-ni. Ka imedde ki ngeyogi maber, ibinongo ni yot me timmigi kica ka gutimo gin mo ma ocwero cwinyi.

6. Gin ango ma twero konyowa me bedo ki wat maber ki jo me kacokkewa?

⁶ Gin ango ma iromo timone me bedo ki wat maber ki omege ki lumege? Ka iwoto ki ngeyogi maber, ket cwinyi i kom kitgi mabeco. (Por ki Carolok 10:12; Rom. 12:10; Pil. 2:​2, 3) Nen kong kit ma timo meno okonyo kwede omego mo ma nyinge Mark ma pud onongo batija nyen. I nge nongo batija, en ocako tero cawa malac me bedo kacel ki omege ki lumege me kacokke. En ocako neno kitgi mogo ma onongo pe yomo cwinye. Gin ango ma okonyo Mark wek goro pa utmege pe odok ariya bote? En owaco ni: “Acako niang ni goro pa omege ki lumege tino adada ka kiporogi ki bal madongo ma jo ma i lobo gitimo. Pi meno, amoko tamma pe me keto cwinya i kom goro pa omege ki lumege. Me ka meno, acako keto tamma i kom kitgi mabeco.” Ka in bene itimo kit meno dok iketo tammi i kom kit mabeco pa utmege, meno bikonyi me bedo ki wat macok ki jo me kacokkewu.

KA ICAKO PARO JAMI MA IJALOGI

7. Gin ango ma twero weko wacako paro pi jami ma onongo dong wajalogi woko?

⁷ I kare ma idoko Lacaden pa Jehovah, labongo akalakala mo cwinyi obedo yom me weko lobo pa Catan. Iromo bedo ki ur adada ni ngat mo keken twero bedo ki miti me dok cen i lobo pa Catan. Ento ka icako kato ki i kwo matek, iromo cako paro jami mogo ma ijalogi wek iti pi Jehovah. (Por ki Wel 11:​4-6.) Me labolle, omege mogo guweko ticgi ma onongo yam keligi yweka kacel ki cente madwong ento onongo camo cawa mapol. Jo mukene onongo gitye ki lurem macok ento luremgi magi okwerogi woko i kare ma gucako kwano Baibul. Dok jo mukene gulwenyo ki tim mogo macilo ma onongo omoko matek i kwogi. Go kong kit ma cwiny Jehovah twero cwer kwede ka watwa kwede odoko goro pien ni wadok cen ka timo jami ma onongo dong wawekogi i ngewa! Gin ango ma itwero timone i kare-ni wek ka itye ka kato ki i peko, pe idok cen ka timo jami ma onongo dong ijalogi woko?

8. Pwony ango ma wanongo ki i labol pa Abraim ki Cara?

⁸ I Baibul, wanongo labol mapol pa co ki mon ma onongo gitwero cako pi paro jami ma guweko wek giti pi Jehovah. Me labolle, Abraim ki Cara gubedo luwiny bot Jehovah ci gua woko ki i boma madit me Ur dok gucako bedo i kema mamwa. (Ibru 11:​8, 9) Onongo gitye ki jami mabeco mapol i boma me Ur dok ka onongo gubedo ka paro pi jami magi, ci miti pi jami magi onongo bidoko tek adada ma biweko gimoko tamgi me dok cen i Ur. Me ka meno, guketo cwinygi i kom gin ma Jehovah ocikke me miyo botgi i kare me anyim.—Ibru 11:​15, 16.

9. Lakwena Paulo onongo winyo nining i kom jami ma ojalogi? (Jo Pilipi 3:​7, 8, 13)

⁹ Lakwena Paulo bene otimo alokaloka i kwone wek eti pi Jehovah i yo mupore. Ma Paulo peya odoko Lakricitayo, en okwano Cik pa Lujudaya dok lapilida muywek ma nyinge Gamaliel aye opwonye. (Tic 22:3) Paulo onongo bidoko latela ma oywek i dini pa Lujudaya. (Gal. 1:​13, 14) Ento i kare ma en opwonyo lok i kom Yecu, en ojalo jami magi ducu. Tika kwone obedo yot i nge doko Lakricitayo? Pe. Kigoye, kitweye i buc, dok Lujudaya onongo gidage adada. (2 Kor. 11:​23-26) Ka onongo en oketo cwinye i kom kit ma onongo kwone yot kwede ma peya edoko Lakricitayo, ci onongo en bikoko ange ni etimo rac me doko lalub kor Kricito. Ento Paulo pe otimo meno. Me ka meno, en oketo tamme i kom deyo madit ma etye kwede me bedo lalub kor Yecu kacel ki mot ma ebinongone i kare me anyim. Paulo onongo pe ki akalakala mo keken ni bedo lalub kor Yecu ber loyo gin mo keken ma ejalo!—Kwan Jo Pilipi 3:​7, 8, 13.

10. Gin ango ma omyero kare ducu wabed ka keto tamwa iye? (Marako 10:​29, 30) (Nen bene cal.)

¹⁰ Pwony ango ma wanongo? Ka icako paro pi jami ma ijalogi wek idok Lakricitayo, ci wii bene myero opo i kom tyen lok mumiyo ijalogi. (Latit. 7:10) Por jami ma iwekogi ki mot ducu ma itye kwede i kare-ni. Me labolle, itye ki wat macok ki Jehovah. (Car. 3:32) Itye ki omege ki lumege ma i kacokkewu ki ma i wi lobo ducu ma gimari matek. (Kwan Marako 10:​29, 30.) Dok itye ki gen me bedo ki anyim mamwonya ma Jehovah ociko pire! (Ic. 65:​21-23) Ka kare ducu ibedo ka tamo pi mot ma bino pi tic pi Jehovah, ci pe ibibedo ka paro jami ma ijalogi.

11. Pwony ango ma inongo ki i gin mutimme i kom Rosemary?

¹¹ Laminwa mo ma nyinge Rosemary onongo batija ma tye ki mwaka 50 ki wiye. Nen kong gin ma okonye pe me bedo ka paro pi jami ma ejalogi. En owaco ni: “Ma pud adoko Lacaden pa Jehovah nyen, cwinya onongo cwer matek ka kare me Karama oromo pien yam onongo anongo mit pa kwero Karama kacel ki jo me pacowa. Onongo amaro miyo mic bot wadina ki lurema. Dok onongo amaro neno kit ma lutinona ki likwayona cwinygi bedo yom kwede ka gitye ka yabo mic ma aminigi.” Gin ango ma okonyo Rosemary? En owaco ni: “Anongo yo me bedo kacel ki jo me pacowa i kare mukene. Mwaka ki mwaka i nino mapatpat, aguro jo me pacowa ci amiyo botgi mic, dok atito botgi pingo amaro gin ducu ki acel acel.” Rosemary bene okemme ki ariya mukene. En owaco ni: “I kare ma apwonyo ada, lurema macon ducu guweka woko. I kare mogo, aparogi matek dok awinyo ni atye kickic.”d Gin ango ma okonye? En ocako keto yub me cito ka tito kwena kacel ki lumege mapatpat. En owaco ni: “Ka watye i tic me pwony, abedo ki kare me ngeyo lumege magi maber dok gudoko lurema macok. I kare-ni dong, amako lurem manyen ma amarogi adada.” Pwony ango ma itwero nongo ki bot Rosemary? Kadi bed pe dong itye ki jami ma onongo yomo cwinyi ma peya icako tic pi Jehovah, wii opo ni pud itwero bedo ki jami mukene maber loyo jami ma ijalogi dok ma twero keli yomcwiny me ada i kare-ni. (Pil. 4:​8, 9) Dok wii opo ni, Jehovah kare ducu mini jami mapol makato ma ijalogi me tic pire.

KA NGAT MO OJUKO TIC PI JEHOVAH WOKO

12. Gin ango ma twero timme i kacokke ma kanyone twero bedo tek adada?

¹² I kare ma idoko Lacaden pa Jehovah, nen calo cwinyi obedo yom adada me weko lobo man marac-ci ki me ribbe ki jo ma gipwonyo lok ada dok gitute me timo gin ma tye atir. (Ic. 65:14) Kadi bed kit meno, i kare mogo ibiwinyo ni ngat mo ma i kacokke otimo bal madit. Dok ka ngat meno pe ongut i kom balle, kiromo kwanye woko ki i kacokke. (1 Kor. 5:13) Nen kong kit ma gin ma kit meno ogudo kwede laminwa mo ma nyinge Samara. En owaco ni: “I nge kare mo manok ma anongo batija, laelda mo otimo bal madit mumiyo kikwanye woko ki i kacokke. Gin meno oweko abedo ki ur madit ma omito balo niyena woko. Onongo pe atamo atama kulu ni laelda twero timo bal i kom Jehovah kacel ki jo me kacokke.” Ngene kene ni, kare ducu omyero wabed ki gen ni omegiwa ki lumegiwa gimaro Jehovah dok gimito bedo lugen bote. (1 Kor. 13:​4, 7) Ento tye me cwercwiny ni, mwaka ki mwaka kikwanyo dano mogo woko ki i kacokke. Dok twero bedo tek adada boti ka laremi, ngat mo me pacowu, nyo ngat mo ma iworo adada omoko tamme me a woko ki bot Jehovah.

13. Watwero yubbe nining i kare-ni wek wamedde ki bedo lugen bot Jehovah kadi bed ngat mo macok kwedwa ojuko tic pi Jehovah?

¹³ Itwero yubbe nining i kare-ni wek imedde ki bedo lagen bot Jehovah kadi bed ngat mo macok kwedi ojuko tic pi Jehovah? Medde ki jingo watti ki Jehovah. (Yak. 4:8) Pe iwek watti ki Jehovah ojenge i kom niye pa ngat mukene. Me labolle, pol kare waworo Jehovah kacel macalo jo me ot nyo kacokke, ento bene omyero waleg bot Jehovah dok wakwan Baibul piwa kenwa.—Jab. 1:2; 62:8.

14. Pwony ango ma wanongo ki i lanen pa lakwena Petero? (Jon 6:​66-68)

¹⁴ Lanen pa lakwena Petero twero konyowa. I kare mo, lulub kor Yecu mapol gujuko lubo kore woko pien en owaco lok mo ma gin pe guniang. Petero bene nen calo pe oniang gin ma Yecu owaco-ni ento en omedde ki bedo lagen. (Kwan Jon 6:​66-68.) Me ka keto tamme i kom gin ma jo mukene gubedo ka timone, Petero oketo tamme i kom lok ada ma epwonyo ki bot Yecu. Macalo adwogine, Petero pe ojuko lubo kor Yecu. I yo acel-lu, ka jo mogo i kare-ni gujuko tic pi Jehovah, wii opo ni dul ma itye iye-ni aye opwonyi lok ada madok i kom Jehovah. Mok matek i ada! Laminwa Samara, ma kiloko i kome con-ni owaco ni, “Kare ducu abedo ka poyo wiya ni tim marac pa ngat acel pe tyen lokke ni jo ducu ma i kacokke gutimo bal nyo ni dul pa Jehovah pwonyo lok goba. Dok Jehovah obedo Lubanga maber, kadi bed dano gimoko tamgi me timo gin marac.”

15. Pwony ango ma inongo ki i gin mutimme i kom Emily?

¹⁵ Nen kong gin mutimme i kom laminwa mo ma nyinge Emily. I nge cabit acel keken ma Emily onongo batija, kikwanyo minne woko ki i kacokke dok minne oa ki gang owekogi woko. Emily owaco ni: “Onongo pe abyeko kulu ni mamana twero timo gin macalo man. Man aye peko malit loyo ma akato ki iye i kwona, dok aparo mamana adada.” Gin ango ma okonyo Emily me kanyo peko man? En owaco ni: “Babana mara matek dok tye ka gwoka maber. Atye bene ki omege ki lumege me kacokke ma gitera calo dano me pacogi kikome. Dano ducu ma gitiyo pi Jehovah gitye ka yelle ki peko mo. Meno aye gin mumiyo pire tek me nyuto mar bot omege ki lumege ki me cuko cwinygi.” (1 Pet. 5:9) Tute matek me ngeyo omege ki lumege maber i kare-ni ma peya peko mo madit otimme i komi. Yelle me ngeyogi i kare-ni. Dong ka itye ka kato ki i peko mo madit, omegini ki lumegini gibibedo agonya me konyi kacel ki kweyo cwinyi.

16. Gin ango ma myero wiwa opo iye? (Nen bene cal.)

¹⁶ Wii myero opo ni, Jehovah miyo tira bot jo ma en marogi. (Ibru 12:6) En mito ni jo ducu ma kikwanyogi ki i kacokke gudwog cen. (2 Pet. 3:9) Pi meno, ka kikwanyo ngat mo macok kwedi ki i kacokke, bed ki gen ni luelda gibitute me miyo kony ducu ma mitte wek ngat meno oyub watte ki Jehovah.—2 Tem. 2:​24, 25.

17. Gin ango ma watwero bedo ki gen iye?

¹⁷ Dong watyeko nyamo ariya mogo ma itwero kemme kwede i nge nongo batija, ento pud itwero medde ki tic pi Jehovah ki gen kadi bed jami magi otimme i komi. Tye jami mapol ma itwero timone me yubbe i kare-ni. Dok kare ducu wii opo ni Jehovah bikonyi me medde ki bedo lagen bote. En dong otyeko konyi, dok tye ki miti me konyi pi naka! (1 Pet. 5:10) En kare ducu bimiyi teko me ciro peko mo keken ma ibikato ki iye. Ka imedde ki jolo kony pa Jehovah, ci ibimedde ki bedo cok kwede matwal kadi bed ikat ki i peko madit nining!—Jab. 119:165; Rom. 8:​38, 39.