Kit ma Watwero Nongo Adwogi Maber ki i Cokke me Cito i Ticwa me Pwony

Calo cokkewa mukene-ni ducu, cokke me cito i ticwa me pwony bene obedo mot mua ki bot Jehovah ma konyowa me tugo cwinywa kekenwa i mar ki tiyo tic mabeco. (Ibru 10:24, 25) Cokke meno myero oter dakika abic me o abiro, man kwako poko dano, nyuto wang tic ma wubitiyo iye, ki dong lega. (Ka cokke man lubo kor cokke mukene, ci myero oter dakika manok ma loyo.) Omego ma bidoro cokke man myero olok i kom gin ma twero konyo jo ma bicito i tic me pwony i nino meno. Me labolle, ka pol pa jo ma gibicito i tic me pwony i Ceng Abicel pe gucito ka tito kwena i cabit meno kulu, ci bibedo me kony ka wuloko i kom gin ma wubinyamo ki rwod ot. Gin ango mukene ma pire tek ma wutwero nyamone?

• Kit me nyamo lok ma tye i Yub me Cokke me Kwowa ki Ticwa Macalo Lukricitayo

• Kit me cako lok ki dano kun wutiyo ki jami ma tye ka timme nyo lok angeya mo manyen

• Kit ma wutwero dok kwede i lok pa rwod ot ma otemo ngolo lokwu

• Kit ma itwero dok kwede i lok pa ngat ma pe ye i kom Lubanga, ma waco ni kwo ocakke pire kene, ma loko leb mapat, nyo ma tye i dini ma pe ngene tutwal i wang ticwu

• Kit me tic ki jami ma nonge i kabedowa me intanet me jw.org ki JW Laibrari^®

• Kit me tic ki gin mo acel ma nonge i kin Jami Ticwa me Pwony

• Kit me tito kwena i yo mukene mapat, me labolle, miyo caden kun wutiyo ki cim, coyo waraga, miyo caden i dye lwak, dok cen ka lim, nyo kwano Baibul ki dano

• Lapo wic i kom kit me gwokke ki jami maraco ma twero wanowu ka wutye i wang ticwu, kit me loko pwonywu ma rwatte ki miti pa dano, kit me bedo ki neno matir, nyo gin mukene mapat

• Pwony nyo vidio ma nonge i brocuwa me Dong Dironi me Kwan ki Pwony

• Kit me konyo ki cuko cwiny latit kwena lawoti ma itye ka tic kwede

• Ginacoya ma twero konyowu i tic me pwony nyo gin mo mutimme i tic me pwony ma twero cuko cwiny lutit kwena