Nong Ber ki i Cokke me Cito i Tic me Pwony
1. Cokke me cito i tic me pwony romo konyowa nining?
1 Cokke maber me cito i tic me pwony cuko cwiny dok bene nyuto kit me pwony i yo ma tiyo ma nongo peya wacito i tic me pwony. Konyowa me miyo caden macalo alwak ma weko watiyo kacel ki jo mukene me konyo korwa ki me nongo pwonye. (Car. 27:17; Latit. 4:9, 10) Gin ango ma waromo timone wek wanong ber ki i cokke man?
2. Jami ango ma ngat ma obidoro wi cokke romo tic kwedgi?
2 Lador Cokke: Ngec ma kinyamogi i cokke magi pol kare pe kiryeyogi ka mo con. Pi meno, yubbe maber mitte ka in aye ibidoro. Pe tye ni kare ducu dong omyero iket yub me nyamo ginacoya me nino ducu, iromo tic kwede gire ka lok ma tye i iye kubbe ki tic me pwony. Tam pi gin ma romo konyo jo ma gubimiyo caden i nino meno. Me laporre, iromo nyamo nyo nyuto lapor i kom kit me cako lok moni. Iromo bene neno lok mogo wiye wiye ki i buk me Reasoning, buk me Ministry School, nyo pwony mo ma obedo i Cokke me Ticwa ma pud okato cok cok. I kare mogo, iromo neno kit me tero peko mogo ma bino ki i wang ticwu, nyo iromo nyamo kit me dongo miti ka dong cako kwano Baibul, tutwalle ka jo mapol gubidok ka lim aye. Kadi ibiloko i kom ngo, nen ni iloko ki yamo komi kun icuko cwiny.
3. Cokke man omyero obed pi kare ma rom mene, dok gin ango ma omyero otimme i kare me cokke man?
3 Cak cokke man i cawane kikome, kadi bed ingeyo ni jo mukene gubio lacen. Ti ki niango ka itye ka poko dano, dok imi wang tic me atiya bot jo ma mito. Cokke man omyero pe oter dakika makato 10 nyo 15, dok omyero obed cek tutwalle ka ce obitimme i nge cokke mo. Dano ducu omyero gunge nga ma gibitiyo kwedgi nyo kwene ma gibitiyo iye. Omyero kitwe te cokke man ki lega.
4. Gin ango ma bikonyo jo ducu me nongo ber ki i cokke me cito i tic me pwony?
4 Wuromo Miyo Kony: Wan wanyuto woro bot Jehovah ki dok ni watamo pi jo mukene i lok madok i kom cokke me kacokke ki bino con. Nywak nyamo lok ki lwak. Iromo weko lador cokke mini ngat mo me tic kwede, nyo iromo yubo yubbi me tic ki ngat mo con ma nongo cokke pudi. Ka imaro yubo yubbi, ci yelle me ‘yabo cwinyi’ ki tic ki lutit kwena mapol mapat pat me ka ka tic ki luremi macok kwedi keken. (2 Kor. 6:11-13) Ka cokke otum, wek kodi tic man me loko dano ma nongo dong kimiyo, dok cit atir wa i ka wang tic.
5. Tyen lok me cokke me cito i tic me pwony obedo gin ango?
5 Tyen lok me cokke me cito i tic me pwony rom aroma ki tyen lok me cokke mukene me kacokke-ni. Kiyubogi me konyowa wek “watamu kit macalo watwero tugo kwede cwinywa kekenwa i mar ki i tiyo tic mabeco.” (Ibru 10:24, 25) Ka wayelle matek me nongo ber ki i cokke man, ci wabinongo kony me medde anyim ki tiyo ticwa me pwony—ma obedo ‘tic maber’ adada-ni!