Cokke me Cito i Tic me Pwony

1. Pingo pire tek ni omyero wacit i tic me pwony ma nongo wayubbe maber?

¹ Yecu oweko lanen maber me tito pi Ker-ri i yo mapwot ma nyuto yubbe maber. I kare-ni bene, jo ma gineno wi tic me tito kwena me Ker-ri i wi lobo ducu gimito ni tic man owot mapwot calo i kare pa Yecu. Pi meno, kacokke ducu ma i wi lobo-ni gitiyo ki cokke me cito i tic me pwony calo yo acel me yubo gurup pa lutit kwena me Ker pi cito i tic me pwony.—Mat. 24:45-47; 25:21; Luka 10:1-7.

2. Ngo ma kitwero timone i cokke me ticwa me pwony?

² Yub Maber Mada: Kiyubo cokke me cito i tic me pwony pi cuko cwiny dano, nyutu kit me miyo pwony, ki dok miyo tira bot jo ma nongo gubicito i tic me pwony. Kiromo nyamo lok ma tye i buk me daily text wiye wiye ka loko i kom tic me pwony. I kare mukene, kiromo nyamo lok ma kikwanyo ki i Ticwa me Ker, ki i buk me Reasoning, nyo ki i buk me Ministry School wek dano ma gitye i nino meno gubed ma guyubbe pi tic. Kiromo nyutu bene lapor mo macek i kit me miyo bukke ma wabiterogi woko. Ma peya kiloro ki lega, jo ducu omyero gunge ngat ma gibitic kwede ki ka ma wang ticgi tye iye. I nge tyeko cokke man ma myero pe okat dakika 15, jo ducu myero gucak wot me cito i wang tic.

3. Tic me yubo cokke me cito i tic me pwony cung i wi angagi?

³ Kiyubogi Nining? Lanen wi tic me pwony, aye kubu cokke me cito i tic me pwony. Lunen wi gurup nyo lukony korgi gitye ki tic me tero gurupgi i tic me pwony i tum cabit. Luneno nyo lukony kor tic bene giromo tero gurup ma tye ka cito i tic me pwony i nino mukene. Lunen wi gurup gitiyo kacel ki lanen wi tic me pwony me nenone ni i tum cabit gurup gitye ki wang tic me ot ki ot muromo. I cabit moni-ni, lanen wi tic me pwony bineno yub ma jo ma gitero dano i tic me pwony guyubo.

4-6. (a) Cokke me cito i tic me pwony tye pi tyen lok ango ma lube ki wang tic pa kacokke? (b) Gin ango ma kiromo tamo pire i keto kabedo ki cawa me yubo cokke me cito i tic me pwony?

⁴ Cokke Man Myero Obed Kwene dok i Cawa Mene? Ma ka coko jo ducu me kacokke i kabedo acel, pol kare ber me neno ni cokke magi obedo ka ma dano romo o iye oyotoyot, calo paci pa dano, dok obed i kabedo mapat pat i wang tic wek kacokke oti i wang tic pa kacokke kore ki kore. Kiromo tic ki Ot me Ker bene pi cokke man. Kacokke mapol gitiyo ki Ot me Ker pi cokke me cito i tic me pwony i nge pwony ma kiyubo pi lwak ki Kwano Watchtower i Ceng Cabit. Myero kinen ni dano pe guwoto mabor tutwal me cito i wang tic. Pi meno myero kare ki kare kinen ka yub ma kiketo con pi kabedo ma cokke timme iye pud tye ma rwatte pi tic i wang tic ma tye.

⁵ Cawa maber pi cokke magi ki dok tyen adi ma myero kiyub cokke man i cabit moni nyo i nino moni ma kicimo cung i kom kit ma wang tic moni-ni tye kwede. Lapeny ma kiryeyogi piny kanyi romo konyogi me neno kabedo ki cawa maber loyo pi cokke me cito i tic me pwony.

⁶ Wang tic mene ma tic mitte iye tutwal? Cawa mene maber loyo me tic i ot ki ot? Mono mitte ni myero kiket cawa mo otyeno me tic i ot ki ot nyo me dok cen ka lim? Yub me cokke me cito i tic me pwony ducu omyero kiket i kaketo lok angeya. Obedo mitti pa lutit kwena ducu me Ker-ri me cobo wang tic ma kimiyo botgi maber adada wek wan bene walok calo lakwena Paulo ma owaco ni: ‘Pe dong atye ki wang tic mo ma pe atiyo iye.’—Rom. 15:23.

7. Tic ango ma ngat ma kicimo me doro cokke me cito i tic me pwony tye kwede?

⁷ Doro Cokke me Cito i Tic me Pwony: Ngat ma kimiyo bote tic me doro cokke man myero onyut woro pi yub man me tiokraci-ni ki yubbe maber. Cokke magi omyero ocakke i cawa kikome, obed macek kun miyo ngec ma konyo dok myero oter dakika 10 me o 15. Ngat ma doro-ni omyero obed ki wang tic ma gibitic iye ma peya cokke man ocakke. Kadi bed pe mitte ni myero kikur jo ma gibino lacen ma nongo cokke me cito i tic me pwony dong otum woko, ento weko ngec ka ma gurup bitic iye bikonyogi. I nge tyeko cokke man cutcut, jo ducu omyero gucak wot me cito i wang tic ma kicimo. Cokke me cito i tic me pwony ma kiyubo maber dok miyo pwony ma konyo bimiyo tira ma mitte bot dano ducu ma gibicito i tic me pwony i nino meno.—Car. 11:14.

8. Jo ma bedo tye i cokke me cito i tic me pwony giromo nyutu notegi ki jo ma telo kacokke nining?

⁸ Bedo Tye i Cokke me Cito i Tic me Pwony: Note mitte. (Ibru 13:17) Ka twere, ngat ma tye ka yubo gurup bikonyo ngat mo keken ma mito dano me tic kwede. Bedo ber ka lutit kwena ma gucwiny gibedo tye me konyo lutit kwena ma pud ginyen dok ngecgi nok. Jo ma giye tic ki dano mapat pat i kare mapat pat giromo miyo kony i yo man maber atika. (Car. 27:17; Rom. 15:1, 2) Jo ducu omyero gutute matek me o con. Nyutu woro pi yub me tiokraci-ni ki dok tamo matut pi lutic luwotwa bimiyo wayelle me o con.—2 Kor. 6:3, 4; Pil. 2:4.

9. Painia gitwero nyutu cwakgi pi yub man i yo konyo nining?

⁹ Cwak pa Painia: Cwak ma painia gimiyo i cokke me cito i tic me pwony konyo adada dok cuko cwiny jo ducu. Wangeyo maber ni painia gitye ki tic mapol. Medo i kom tic me kwano Baibul ki dano ki dok cen ka lim, ticgi me nino ducu tye iye gwoko jo me odigi ki yenyo cente. Pi man, painia omyero pe gutam ni gimitte i cokke me cito i tic me pwony ducu ma kacokke yubo, polle ka cokke ma kit man bedo nino ducu. Ento, twere gire pi painia me cwako yub me cokke me cito i tic me pwony mogo ma bedo tye cabit ki cabit. Cokke me cito i tic me pwony obedo yo acel ma kipwonyo kwede lutit kwena, dong ngec madwong ma painia tye kwede i kom Baibul ki dok jami ma gin gukato ki iye romo konyo jo mukene tutwal. Cito i tic me pwony kare ki kare omiyo painia gudoko jo mucwiny i tic me pwony. Giromo poko ngecgi-ni ki jo mukene. Tic ki mit kom i tic me pwony ki dok bedo tye i cokke me cito i tic me pwony omiyo gudoko lanen maber me aluba. Watye ki pwoc madit tutwal pi kony ma gin miyo i cokke me cito i tic me pwony.

10. Pingo mitte ni lutit kwena me Ker-ri ducu guket cwinygi i miyo cwak pi yub man?

¹⁰ Calo Yecu ki lukwena-ne, wan bene pol kare wacobo ticwa me tito kwena me Ker-ri ki wot i ot ki ot. Cokke me cito i tic me pwony konyo me cuko cwinywa kekenwa ki dok me cobo tic man maber. Lutit lok me kwena maber-ri ducu omyero gunyut cwakgi pi yub me tiokraci man kit ma kerogi twero kwede. (Tic 5:42; 20:20) Walego ni wan ducu myero waket cwinywa i nyutu cwak pi yub man. Ka watimo kit meno, ci wabinongo mot madit ki bot Jehovah ki dok cwiny Latel Wiwa Yecu Kricto bedo yom ka watito lok me kwena maber me Ker pa Lubanga.—Mat.  25:34-40;  28:19, 20.