Ti ki “Layab Lok me Baibul”—Me Cako Lok
1. Gin tic ango ma wanongo me konyowa i tic me pwony?
1 Baibul me New World Translation manyen tye ki bute mo i acakkine ma kilwongo ni “Layab Lok me Baibul.” Watwero tic ki gin tic manyen man nining ka watye ka yubbe pi tic me pwony? Kit macalo kiyubo calo buk me Reasoning, kun kiryeyo wang Baibul i te wi lok mapatpat, man twero konyowa me cako lok ki dano.
2. Waromo tic ki “Layab Lok me Baibul” i ticwa me pwony nining?
2 Iromo yero me tic ki lapeny me 8 ci iwacci: “Watye ka limo dano me kabedowa pien jo mapol gipenyo ni, ‘Tika myero wakok i kom Lubanga pi jami maraco ma timme i kom dano?’ [I wang tic mukene, bedo ber loyo ka inyuto lapeny man bot rwod ot.] In itamo ningo? [Mine kare wek ogam.] Baibul miyo lagam ma yengo dano i kom lapeny meno.” Kwan ci inyam ginacoya acel nyo aryo ma kiketo kenyu. Ka rwod ot onyuto miti, ci nyut bote lapeny 20 ma tye i acakkine kun ikwaye me yero lapeny acel me anyama i nino ma ibidok cen ka lim. Nyo iromo miyo bote bukwa ma tye ki ngec i kom jami ma wubedo ka nyamo.
3. Watwero tic ki “Layab Lok me Baibul” nining me cako lok i wang tic ma jone gitye i dini mapat ki pa Lukricitayo?
3 Lapeny me 4 ki 13 me o 17 twero bedo me kony tutwal ka watye ka tito kwena i wang tic ma jone gitye i dini mapat ki pa Lukricitayo. Me labolle, iromo tic ki ngec ma tye i lapeny me 17 ci iwacci: “Wan watye calo lutic pa lwak ma gitye ka limo jo me odi. Itamo ni jo me odi i kareni gitye ki peko mapol adada? [Mine kare wek ogam.] Jo munyomme mapol gunongo ni lok man tye me kony botgi: “Dako bene myero onen ni eworo cware.” [Pe myero iwacce ni lok man kikwanyo ki i Jo Epeco 5:33. Ka itye ka lok ki dako, iromo tic ki lok ma tye i Jo Epeco 5:28.] Itamo ni lubo tira man twero bedo me kony i nyom?”
4. Ngo ma itwero wacone i agikki me lokwu ki dano ma tye i dini mapat ki pa Lukricitayo?
4 I agikki me lokwu, wuyub awene ma ibidok iye ka medde ki nyamo lok. Iromo tic ki ginacoya mukene ma tye i te lapeny ma wunyamo ca. I cawa ma opore, wek rwod ot onge ni ngec ma itye ka tic kwede-ni oa ki i Baibul. Mi bote bukkewa ma itamo ni bigudo cwinye, ma lubbe ki lok ma wunyamo wiati ki tam pa dano meno i kom Baibul.—Nen karatac ma kiluto i Ticwa Me Ker me Decemba 2013.