Yubbe me Cako Lok i Yo ma Gudo Cwiny Dano
1. Cako lok i yo ma gudo cwiny dano pire tek pingo?
1 Kit ma ngwec dek makur tugo miti pa dano me camo dek meno, i yo acel-lu bene kit ma wacako kwede lokwa yabiwa yo me medde ki nyamo lok me Baibul. Gin ma wawaco ki cawa ma wacwalo me cako lok i yo ma gudo cwiny dano patpat, ento calo dek mamit, mito tam ki yubbe maber con. (Car. 15:28) Ngo ma twero konyowa me cako lok i yo ma gudo cwiny dano?
2. Waromo yubo kit me cako lok ma tugo miti pa dano nining?
2 Yer Lok ma Tugo Miti pa Dano: Kit ma wacako kwede lok myero otug miti pa rwod ot, ka pe ci en twero juko lokwa woko. Pi meno, ka itye ka yubbe, tam i kom miti pa jo me wang ticwu. Dano ma i kabedowa mono gimito gamente maber, kwo me ot ma kelo yomcwiny, nyo agikki me lweny? Kit ma dano pol kare gimaro miyo tamgi i kom jami, yub lapeny ma weko gitito tamgi. Mono itwero tic ki kit me cako lok ma kiketo i Ticwa Me Ker kun iketo alokaloka iye wek obed mupore pi wang ticwu? Pingo pe wuket yub me poro kit me cako lok mogo i otyeno me Woro pi Jo me Ot?
3. Waromo yubo kit me cako lokwa wek obed mupore ki tekwaro ki kit me kwo pa dano me wang ticwa nining?
3 Tam pi Tekwaro ki Kit me Kwo pa Dano: I kabedo mogo, dano mito ni watit tyen lok me limwa cutcut. Ento i kabedo mukene, pe nen maber ka welo pe kong openyo kit ma jo me ot meno gitye kwede kun ginywako lok mo manok olo. I kabedo mogo, kit ma dano tero kwede dini miyo wabedo agonya me lok kwedgi i kom Baibul. (Tic 2:14-17) Ento, ka ma danone pe gin Lukricitayo nyo gipe ki dini mo kulu, bedo ber ka pe iloko i kom Baibul i rwattewu mukwongo.—Tic 17:22-31.
4. Ngo ma myero watim wek wayub lok me cakone maber?
4 Lok me Cakone: Yub lokki me cakone maber. Bedo ber ka iloko lok manoknok ma niang iye yot. Kit ma waloko kwede bene pire tek. Lok ki yamo komi. Bed ka bwunyo i yo ma nyuto lirem ki miti i kom rwod ot. Lubo tam magi bikonyowa me yubbe me cako lok i yo mamit ma bitugo miti pa dano i wang ticwa me “cam i meja pa [Jehovah].”—1 Kor. 10:21.