Dongo Dirowa i Tic me Pwony—Miyo Caden ki Intakom

Gin Mumiyo Pire Tek: Watwero bedo ki lworo ka watye ka tic ki intakom (intercom) me miyo caden. Waromo gwokke nining wek lworo man pe odwok mitiwa piny? Nge ni miyo caden kun watiyo ki intakom obedo yo acel ma watwero nongo kwede dano wek watit botgi lok me kwena maber-ri. (Rom. 10:14) Jami ma otimme nyuto ni lutit kwena dong gutiyo maber ki yo man me tito kwena. (Nen 2011 Yearbook, pot 65-66, ki 2000 Yearbook, pot 54, para. 3.) Kong wanenu tam magi.

Kit me Timone:

Yub kit me cako lok macek, dok ico woko piny wek ikwan atir bot rwod ot kun itiyo ki intakom. Man bimini tekcwiny. Cak ki tito bote tyen lok me binoni. Ti ki nying rwod ot ka kiketo kenyo. Dol tere ki keto yub me kelo (nyo weko i te doggolane) trak nyo magajin ma miyo ngec i kom lok meno.
Bed ki neno mupore. Bwuny dok ilok kun iwito cingi calo itye ka lok ki ngat meno wang ki wang.
Bed agonya dok ilok ki dwan me boko lok. Lok ki dwan malongo dok ma winye maber. Pe iling mot tyen mapol tutwal, dok pe ilok oyotoyot tutwal.
Ti ki ryeko. I odi madongo, intakom twero bedo pol adada. Dong pe opore me lok ki jo meno ducu, ento myero walok ki dano adek nyo angwen keken, kun wacoyo nyinggi piny. Jo ma gibedo i ot meno gitwero doko lwor ka warii tutwal i nyim otgi.

Tem Timo Man i Dwe-ni:

Ka wutye i worowu pi jo me ot, wubed ka porone kun ngat acel acel cung nyo bedo ma oloko ngeye bot lawote.