‘Mi Caden Kore ki Kore’—Ki Tito Kwena i Odi Maboco me Bedo

1. ‘Miyo caden me kwena maber-ri’ kore ki kore kwako timo gin ango?

¹ Calo lakwena Paulo, mitiwa tye me ‘miyo caden me kwena maber-ri kore ki kore.’ (Tic 20:24) Pi meno omyero watute ki tekowa ducu me o bot dano mapol ma gitye i wang ticwa ki Kwena me Ker-ri. Man kwako dano mapol ma gibedo i odi maboco me bedo-gu. I kare mukene, donyo bot jo ma gibedo i odi macalo magi romo bedo tek tutwal. Ento, kit macalo dano mapol gibedo i odi magi-ni, miyo wanongo kare maber atika me tito kwena maber-ri.

2. Pingo tic ki ryeko kacel ki pimo gin maber me atima mitte i miyo caden i odi maboco?

² Pi lworo tim me turo cik ki tim gero, pol kare odi maboco magi gibedo alora dok bene nongo gitye ki acikari ma gwoko nyo kamera me ngiyo nyim doggola. (2 Tem. 3:1, 2) Oromo bedo ni wegi kabedo meno nongo pe giye ngat mo me donyo kunu ata wang ma kilwonge alwonga. Ladit ma loyo kabedo ma kit man, nyo acikari, romo kwayowa me weko kabedo meno tutwalle ka ce lapang ot mo ocwalo kokone i komwa. Pi meno, tic ki ryeko kacel ki pimo gin maber me atima pire tek mada.

3. Kare mene maber me tic i odi maboco-ni, dok pingo?

³ Kare Maber me Tic: Calo i wang ticwa mukene-ni, ber tutwal me cito ka tito kwena i odi magi i cawa ma nongo pol pa danone gitye gang. Kiromo bedo ki akalakala i komwa ka ce wacito i cawa ma nongo pol pa lupang ot nongo gipe gang. Lutit kwena mapol gubedo ka nongo dano i pacigi i otyeno inge cawa me tic ki i ceng Cabit ki ceng Abicel otyeno bene. Tic i odi maboco magi odiko con adada tutwalle i tum cabit romo miyo lupang ot gitero kokogi bot luloc me kabedo meno.

4, 5. Waromo nongo yo me donyo i odi mogo maboco ma doggolagi bedo alora nining?

⁴ Kit me Donyo: Lutit kwena pe myero gupeny ngat ma gwoko nyo ladit ma loyo kodi odi maboco magi ma peya gucako ticgi me pwony. Ka ot moni-ni kiloro woko ento tye ki cim i ka donyone, ci waromo tic kwede me penyo ngat mo ma romo ye ki wan donyo wek walok kwede. Ma lubbe ki kit ma ot moni nongo tye kwede, waromo medde ki ticwa i doggola mukene inge lok ki dano moni ma nongo oye ki wan me donyo me lok kwede-ni. I kare mukene kono, twero bedo me ryeko me a woko ki i kodi gedo magi pi dok ka goyo cim me penyo lupaco mukene. Omyero watiyu ki niangowa me moko wel lupang ot adi ma wabigoyo cim botgi i limwa meno.

⁵ Lupang odi mukene giromo penyowa me tittigi tyen lok me limwa ki i cim. Ka otimme kit meno, ci titte bote i yo me lirem. Ti ki nying rwod ot meno ka ingeyo. Tit bote lok ma tye i yo macek. Jo mukene gunongo adwogi maber ki i cako lokgi ki kwanone atir ki i buk me Reasoning.

6. Gin ango ma myero watim ka ce watye ka tic i odi ma acikari aye kurogi?

⁶ Ka gedo meno tye ki acikari ma pe mito ni wadony ka tic i iye, ci waromo keto tek me miye caden. Acikari mapol gimaro kwano bukkewa. Waromo bene cako kwano Baibul kwedgi kun nongo wakwano ki ka ma nongo en bedo ki iye pi kuro kunu. Ka acikari oye ki wan me limo lapang ot mo ma onyutu miti, ci pe bedo ber me tic ki kare man me cako dwongo doggola mukene.

7. Ngo ma myero watam pire ma lubbe ki kicaawa me miyo caden?

⁷ Kitwa ki Kit ma Wanen Kwede: Tingo kicaa mogo madongo dok mapek-gu weko dok wanen pat. Pi meno, waromo tic ki kicaa matidi nyo wawoto nono. Lutit kwena mukene gitingo bukkegi i fayil mo matidi kun gimako Baibulgi i cingi nyo i girwako i jebagi.

8. I yo ango ma gurup ma gitiyo i odi maboco-ni myero guyubbe kwede?

⁸ Pe bedo ber me guro dano mapol tutwalle ka ma dano woto ki iye calo citep-gu, ka gwoko mutoka, nyo i teng gudo pien man ywayo tam pa dano i komwa. Omyero wagwokke mada ka watye ka tito kwena i kodi odi magi ma nongo ngene mada pi tim me aranyi. (Car. 22:3) Me labolle, lutit kwena angwen nyo abicel giromo tic cokcok ma lokgi winye, nyo gwok bene giromo leyo dwongo doggola aleya kun jo mukene cung me kuro piny.

9. I yo ango ma waromo nyutu kwede niangowa, dok pingo man pire tek?

⁹ Ka itye ka donyo i odi maboco magi, duny kong te war-ri maleng dok ka idonyo nen ni i loro doggola maber. Nyutu niango ma kit meno miyo lupang ot pe gibedo ki cwiny mo marac i komwa. Ka dong idonyo i ot, cit atir ka ma dano ito iye me cito malo nyo ot ma myero iti iye-ni labongo junge i ka donyo. Man kwanyo gung cwiny woko ki bot jo ma tye ka neni.

10. Yo ango ma watwero tic kwede labongo wo i ka ma dano woto iye?

¹⁰ I odi maboco magi, wo pol kare winye ka ma dano woto iye. Pi meno, pe i lok ki dwan malongo tutwal ento lok mot bot rwod ot. Ka itye ka lok bot lutit kwena, dwok dwani piny, lok mot, i yo mupore ma pe miyo dano dok gibedo ki gung cwiny. Lutit kwena mukene gitiyo ma ka jo moni gutiyo i doggola moni-ni gin gitiyo i ma lubune kun gitiyo kit meno wang ma gutyeko wa i wiye, me kaka bedo ka dwongo doggola ma lubbe aluba nio wa i wiye, wek pe giyel lupang ot tutwal. Medo i kom meno, dwongo doggola matek nyo kitwero romo miyo lworo i cwiny jo gitye i ot.

11. Tam ango ma kimiyo ma romo konyowa ka wadwongo doggola ma tye ki ka neno woko?

¹¹ Ka doggolane tye ki ka mo ma kiketo me ngiyo woko, ci wucung ka ma kitwero nenowu maber wun ki lawoti. Cik wangi iye, ka ce iniang ni ngat mo tye ka neni, motte ki yomcwiny ci icak lokki. Ka ngat meno openyo ni, ‘Meno anga?’ romo bedo ber me tuco nyingi ki nying lawoti. Man miyo rwod ot bedo agonya me yabo doggola. Ka pe oyabo, ci iromo tito lokki ki i doggola.

12. Wan waromo gwokke ki i peko nining ka waweko bukkewa i odi ma dano pe iye?

¹² Ka Dano pe Gang: Lugwok ka ma kit meno pol kare gikok ni gibedo ka coko bukke ma nongo gitye ka ma dano woto iye. Bukke ma kiweko i te doggola romo doko calo yugi. Pi meno, buk mo keken ma kiweko i gang ma dano pe iye omyero kirwak odony maber i te doggola ka ma dano pe romo nenone.

13. Gin ango ma waromo timone ka ce warwatte ki rwod ot mager?

¹³ Wegi Odi Mager: Ka warwatte ki rwod ot mo mager ma mito lwongo acikari, bedo ber me weko ot meno ki ito i mukenene kun wadok kunu i nino mukene. I kine mukene, romo bedo ber me a weko kunu woko wek pe onya rucurucu i kinwa ki acikari. Kadi bed rwod ot meno pe owaco atir atir ni ngat mo pe myero obin bote i kare me anyim, bedo ber me coyo namba ot meno piny kun wacoyo iye ni pe icit kunu ci kiket obed ki kad me wang tic meno. Adrec pa ngat meno kacel ki pa jo mukene ma nongo kicoyo iye ni pe ki limgi-ni myero kibed ka temo kubbe kwedgi me temo niang tamgi.

14, 15. Gin ango ma myero itim ka luloc me odi guwacci omyero ia woko ki i odi magi?

¹⁴ Ka kiwacci Omyero Iwek Kabedo Meno: Ka lagwok kabedo meno, acikari, lugwok kuc, ngat ma yubo ka muballe, nyo ngat ma cung pi jo ma gibedo i kodi odi magi owacci omyero ia woko ki kunu i kare ma nongo itye ka tic i kodi odi magi, ci bedo ber me lubu lokgi cutcut. Ka twere, tele mo myero pe obed tye i kinwa ma weko kimiyowa bura me terowa ki cik nyo lwongo abili. Pol kare, lutic ma gitiyo i kodi odi magi nongo pe gitye ki cwiny mo me adegadega i kom lucaden pa Jehovah ento nongo kitye ka timo mere ticgi keken.

¹⁵ I kare mukene, ka ngat ma cung pi kabedo meno okwayi me a woko, ci iromo tite tyen lok me limmi ki mwolo. (1 Pet. 3:15) Nyut bote ni ingeyo ni tic me gwoko ber bedo me kabedo meno kacel ki weko dano ma iye bedo ki yomcwiny tye i wiye. Gwok nyo romo yeni me tic i kabedo meno. Ento ka pe oye, ci a giri ki woro. Ka larre, iromo penye wek wubed ka bino me weko bukke i opic inge kare mogo. (Kol. 4:6) Jami magi myero kiwek ngat ma neno wi tic onge pire.

16. Gin ango ma waromo timone ka tic i ot mabor mo odoko tek?

¹⁶ Gwok nyo i nge kare malac, lutit kwena dok giromo temme me tic ki ryeko i gedo meno. Ento, ka peko meno omedde, luelda myero gucwal lok man i jang gang kal pi nongo kony i kit ma giromo cobo kwede peko man me kaka lutit kwena bedo ka temo cobone pigi kengi. Ka lutit kwena gunongo ni pe gitwero tic i ot ma kit man, ci kiromo yenyo yo mukene me lok ki lupang odi magi calo tic ki cim nyo coyo waraga. Lutit kwena mukene miyo caden i teng gudo ma tye i nyim odi magi nyo i kabedo macok kwede odiko con ma nongo dano cito i dog tic nyo i otyeno ma nongo dano dong gitye ka dok paco.

17. Pingo pire tek me tic i odi maboco?

¹⁷ Agikki me yub me kare man dong cok bino. Jo ma gilwongo nying Jehovah keken aye gibilarre. “Ento dano gibikok bote nining, ma peya guye en? Gitwero ye en kono nining ka pe guwinyo lok ma gitito i kome? Gitwero winyo lok i kome nining ka ngat mo pe ma tito lokke botgi?” (Rom. 10:13, 14) Jo mapol ma “myero gunong kwo ma pe tum” gibedo i kodi odi magi. (Tic 13:48) Ka wabedo ryek kun wanyutu niango, ci waromo o botgi ki kwena maber-ri.