Awene ma Myero Wadok Cen ka Lim?
1. Tic me loko dano me doko lupwonnye kwako timo gin ango?
1 Tic me loko dano me doko lupwonnye kwako dok cen ka limo ngat mo keken ma onyutu miti me niang lok i kom yub me Ker pa Jehovah. (Mat. 28:19, 20) Cawa maber loyo me dok cen ka lim cung i kom yubwa ki pa ngat ma onyutu miti-ni. Pingo omyero wadok cen ka lim cutcut i nge rwattewa tyen mukwongo?
2, 3. Pingo myero watemme me dok cen ka lim cutcut?
2 Pingo Omyero Idok Cen Cutcut? Tic me tito ‘lok man me kwena maber me ker-ri’ dong cok gik, dok agikki me jami ducu dong onyiko cok. (Mat. 24:14; 1 Pet. 4:7) Pi meno, kit macalo “kare me laro dano” pud tye pi jo ma tye ki miti-ni, omyero walub cik ma kiminiwa me ‘tito lok pa Lubanga pi oyot,’ ma man kwako dok cen cutcut ka dongo miti ma wanongo.—2 Kor. 6:1, 2; 2 Tem. 4:2.
3 Catan tye ki miti me kwanyo nyig mo keken me Ker ma wacoyo i cwiny jo ma gitye ki miti. (Mar. 4:14, 15) Jo me odi pa jo ma gunyutu miti, jo ma gitiyo kwedgi, ki dong jo mukene pol kare gingalogi. Dok cen cutcut miniwa kare me weko mitigi medde ki lyel ma peya jo mukene guneko woko.
4. Ngo ma waromo timone i acakki me rwattewa wek wadok cen ka lim?
4 Wuket Yub me Rwatte Doki: Bedo ber me keto yub me rwatte doki, ma peya wupokke i acakki me rwattewu. Wek lapeny mo acel ma ibigamone ka idok cen ka lim. Pire tek ni igwok rekod ma kwako rwattewu pi tyen mukwongo, ki pi yub me dok cen ka lim. Ka yubbi ye, itwero penyo en me dok orwone nyo i nge kare manok. Ka onongo rwattewu tyen mukwongo ca obedo i tum Cabit, kun ngat meno tiyo i dye cabit, gwok en twero ye ni idok cen i tum Cabit ma lubu meno. Ka ce wuketo yub me rwatte doki, tim ber ilub lokki.—Mat. 5:37.
5. Dokwa cen ka lim labongo galle konyowa nining me cobo tic ma Yecu ominiwa?
5 Watye ki tyen lok maber mumiyo wadok cen cutcut bot jo ma gitye ki miti. Pi meno, ket yub me dok cen dok idok ma pe irii, pien ‘kare dong odic woko’ pi lobo-ni. (1 Kor. 7:29) Ka wadok cen cutcut ka limo jo ma gitye ki miti i lok me Ker, ci tutewa binyako nyige.