Yubbe Obedo Gin ma Pire Tek i Dok Cen ka Lim
1. I yo ango ma onongo tic me pwony pa Lukricitayo macon ca binya kwede?
1 Yecu oyubo lupwonnyene i yo ducu me bedo jo mucwiny itito ‘kwena maber me Ker-ri.’ (Mat. 4:23; 9:35) Pwonnye man obedo i lobo Palestina keken. Ento, ma peya Yecu odok i polo, en oweko ongene ni tic me pwony pa Lukricitayo-ni binya romo kin piny ducu wek ‘kilok jo me rok ducu gudok jo ma lubbe.’—Mat. 28:19, 20.
2. Lubu cik pa Yecu me ‘loko dano me doko jo ma lubbe-ni’ kwako ngo?
2 Tic meno onongo kwako dok cen ka limo jo ma gunyutu miti i lok me kwena me Ker pa Lubanga ki dok pwonyogi me gwoko gin ducu ma Kricito ociko. Wek dok cen ka limwa okel adwogi maber, mitte ni omyero kong wayubbe.
3. In itwero yabo yo pi dok cen ka lim nining i rwattewu tyen mukwongo?
3 Yubbe Con: Lutit kwena mukene giweko lapeny i agikki me nyamo lokgi tyen mukwongo ka dong gicikke me dok cen ka nyamo lagamme. Gin ginongo ni tic ki ngec ma tye i buk me Baibul Pwonyo konyogi me cako kwano Baibul cut, ka gidok cen ka lim.
4. Pingo pe omyero kong wakur ni magajin manyene oo ka dong wadok cen ka lim?
4 Kadi bed wanongo magajin aryo keken me atera woko dwe ki dwe, pe te lokke ni omyero kong wakur wang ma wanongo magajin me dwe manyene ka dong wadok cen ka lim. Waromo tugo miti pa ngat moni ki nyamo ngec ma tye i magajin ma wamiyo bot ngat meno con.
5. Adwogi maber ango ma bino ka ce iketo yub me dok cen obedo i tammi?
5 Go Pulanni Con: Ma peya idok cen ka lim, kwany dakika mo manok kong me ngiyo rekod ma icoyogi piny wek inen ngo ma mitte me atima. Me labolle, nyam lok mo ki i buk ma onongo iweko con. Nyo iromo weko buk mukene ma loko i kom gin mo ma wunyamo con. Ka onongo iweko lapeny mo i agikki me rwattewu, ci yubbi myero obed me gamo lapeny meno. Ka ce itye ka lok i kom ginacoya ma moko lok moni ma itye ka lok iye-ni, temme me kwanone ki i Baibul.
6. Yubwa tye me timo ngo ka wadok cen ka lim?
6 Yubwa: Ngene kene ni yubwa myero obed me cako kwano Baibul ki dano. Omego mo acel omito mada me cako kwano Baibul ki laco mo, ento laco-ni okwero woko. Omego-ni odok cen bote ki magajin ma okati nyen ci owacce ni, “Tin watye ka miyo lagam me lapeny acel mo ki i Baibul bot dano.” I yo nge winyo tam pa laco-ni, omego-ni okwano ginacoya acel ki dok paragraf mo ma rwatte kwede ki i buk ma onongo kitiyo kwede me kwano Baibul ki dano. Meno oweko gucako kwano Baibul labongo keng.
7. Yubbe maber dong okonyi nining me cako kwano Baibul ki dano?
7 Kwanyo kare me yubbe pi dok cen ka lim kelo adwogi maber. Yomcwinywa bimedde, dok wabibedo ki mot me konyo “jo ducu ma myero” me wot i yo me kwo.—Tic 13:48.