Kony Lutino Kwan me Baibul me Doko Lutit Kwena Maber me Ker-ri
1 Tic ma Yecu omiyo bot lupwonyene kit ma kitito kwede i Matayo 28:19, 20, obedo tic madit atika. Kiciko lupwonnye pa Kricito ni gulok jo mapol, ma i ngeye, gibikubo kor tic me loko dano me doko lupwonnye-ni. Meno nongo ocibo te guti me tito lok me kwena maber me Ker pa Lubanga-ni, ma i agikkine nongo birumo wi lobo ducu i kare man me agikki ma wan dong watye ka kwo iye-ni.—Mat. 24:14.
2 Oromo bedo ni lutino kwanwa me Baibul gubedo lutinowa nyo jo ma gitye ki miti me kwano Baibul kwedwa. Wamito ni wakony jo ma kit meno wek guye tic ma bibedo i wigi me konyo jo mukene me doko lupwonnye pa Yecu Kricito.—Luka 6:40.
3 Yubgi me Miyo Caden: Cuk cwiny jo ma ikwano kwedgi me nywako gin ma gitye ka pwonyone ki jo mukene. Tit botgi jami mogo mutimme ma cuko cwiny ma lubbe ki tic me pwony. Pwony lutinoni ma nongo pud gitino me cako nywako i tic me pwony i yo ma konyo ma lubbe ki kerogi. (Jab. 148:12, 13) Nyut i lokki kacel ki ticci ni tic me pwony obedo gin ma pire tek i kwoni.—1 Tem. 1:12.
4 Jehovah tiyo ki jo ma ye dok gilubu cikke keken. Ngene kene ni lutit kwena manyen pe gitye ki ngec muromo calo lutit kwena me Ker ma dong gunongo batija dok gucwiny, ento jo manyen magi omyero kong guye dok gubed ma gitwero tito pen pwony me Baibul. (Nen buk me Organized, pot 79-82.) Ka dong gutyeko a woko ki i “Babilon Madit” kacel ki tim me wibye, ci omyero gucak wire i cokke kare ducu.—Yabo. 18:4; Jon 17:16; Ibru 10:24, 25.
5 Ka ce ineno ni latin kwanni mo me Baibul dong tye ma opore me doko latit kwena ma peya onongo batija, ci mi ngecce bot wonkom pa luelda. En biyubo yub wek luelda aryo gurwatte kwedi kacel ki latin kwanni me Baibul-li pi neno ka ce en opore me doko latit kwena me Ker ma peya onongo batija kacel ki jo me kacokke. Bibedo ticci me medde ki pwonyo latin kwanni me Baibul-li ki wot kacel kwede i tic me pwony.