Bok Me Lapeny

◼ Ma peya kiye ni latit kwena moni onong batija, myero mono en onywak i cokke ki tic me pwony lakwene?

Nongo batija obedo tam ma pire tek loyo ma ngat moni myero omok i kwone. Pi meno, ma peya kiye ni ngat moni onong batija, en myero obed ki ngec muromo i kom gin ma Lubanga mito ki bote. Medo i kom meno, en myero onyut ni emoko tamme me kwo i yo ma rwatte ki cik pa Lubanga.

Kimiyo cik bot Lukricitayo pe me weko cokke kacel, pi meno latit kwena ma peya onongo batija myero obed ka cito i cokke kare ducu. (Ibru 10:24, 25) En myero bene obed ka nywako i cokke ki miyo lagamme. Pol kare nongo en dong odonyo i Cukul me Tiokraci, ento pe obedo calo cik.

Kit macalo kimiyo bot Lukricitayo tic me tito kwena ki loko dano wek gudok lupwonnye, latit kwena ma peya onongo batija myero onywak i tic me pwony teretere ma peya onongo batija. (Mat. 24:14; 28:19, 20) En myero obed latit kwena pi dwe adi ma peya onongo batija? Bedo ber ka kimiye kare muromo me nyuto ni emoko ki cwinye ducu me nywako i tic me pwony dwe ki dwe. (Jab. 78:37) Ento, pe mitte ni ogalle tutwal cakke i kare ma ocako tito kwena me o i kare ma oporre pi batija, romo bedo pi dwe manok. En myero omi cawa adi i ripot me tic me pwony? Cik mo peke ma lubbe ki cawa ma myero ocwal. Luelda myero gunen kwo pa latit kwena acel acel kun ginyuto niango dok gitere i yo mupore.—Luka 21:1-4.

Ka luelda (nyo lukony kor tic i kacokke ma luelda nok iye) gibipenyo latit kwena ma mito nongo batija, wigi myero opo ni dano ducu pat, ci myero guti ki diro me niang ka ada latit kwena man opore me nongo batija. Myero guniang ka ada latit kwena man tye ki miti me doko Lacaden pa Jehovah, dok nyuto pwoc pi mot ma en tye kwede me nywako i tic me tito kwena kacel ki dul pa Jehovah. Luelda myero guniang ni en pud peya odoko dano muteggi i yo me cwiny nyo onongo diro calo latit kwena ma orii i tic me pwony. Ka luelda gitamo ni dano man pud pe opore me nongo batija, myero guwac bote ki mwolo kun gimiye tyen lok ki i Ginacoya, dok gumedde ki konyo en i yo me cwiny.