Man Ducu Tyen Lokke Ngo?

YECU KRICITO owaco ni: ‘Agikki piny’ bingene ki lweny, kec, two maraco, ki oyeng yeng.​—Matayo 24:1-8; Luka 21:10, 11.

Cakke i mwaka 1914 lweny obedo ka balo kwo pa dano i kin rok ki i kin kaki, polle obedo pi adwala pa lupwonye dini i lok me wi bye ki dok kombeddi pi lutim aranyi ma dong gunya mapol ata.

Kadi bed ni ngec me cayan otimo jammi madwong ento dano milion miya mapol gitye ka limo peko me can cam i wi lobo ducu. Mwaka ki mwaka dano milion mapol gito ki kec.

Two gemo, nya pa two mogo ma kobo oyot bene obedo but lanyut ma Yecu ocimo. Two aburu mo marac atika ma dok pat ki aburu man ata-ni oneko dano makato 21,000,000 inge Lweny me Wi Lobo me 1 dok oromo wi lobo ducu wa ki cula nam-gu. Two jonyo dong kombeddi tye ka jwero dano i lobo ducu, dok two mogo calo aona opiyo, maleria, two towang, two anino pud tye omoko woko i lobe ma pud tye ka dongo adonga.

Gitito ni oyeng yeng ma tekogi pat pat timme tyen alip mapol mwaka ducu. Kadi ni nyonyo ma pimo dong tye, ki yo me niango lwak bene omedde i lok angeya, pud inongo ni lok angeya opong ki lok me can ma tye ka poto i boma ma tye ki dano mapol pi oyeng yeng.

Baibul bene yam oloko pire ni: ‘Ento myero iniang man ni, i kare me agikki, piny bibedo marac i kare mogo. Pien dano bibedo ka maro kumgi kengi kun gibedo lumar lim, luwakke, lucac, lunywar jo mukene. Pe gibiwinyo lunyodogi, pe gibimiyo pwoc mo, gibibedo jo ma pe leng. Pe gibimaro dano wadgi, gibibedo jo ma pe timo kica bot dano, gibibedo lucok dog jo mukene, gibibedo jo ma mitigi pe juke, jo ma ger ma gidag gin mo maber, luroro, jo ma tye atata ma pe giparo piny, jo ma gikete malo kengi ki wakke, jo ma maro yomcwiny ma ka maro Lubanga. Gibimako dini dok gibilubo i kitgi ma nen ki woko keken, kun gikwero tekone woko. Pokke woko ki i kom jo macalo meno.’​—2 Temceo 3:1-5.

In mono iye ni watye ka kwo i kare man ma giwaconi ‘kwo bibedo iye matek mada ni’?

In dong pe ineno ni man tye ka timme i rwom ma lamal tutwal, ni dano gudoko lumar kumgi ken-gi, lumar cente, luwakka?

Anga ma romo pyem ni ada lobo pe opong ki dano ma gipenyo pi jammi mapol ento pe gipwoyo, pe giye lok me winye kun bene gubedo jo ma pe genne?

In mono ingeyo ni dingo i kom lunyodo ki mar manok omedde matek tutwal pe i kabedo manok keken ento okwako lobo ducu?

In bene ingeyo labongo akalakala ni wan watye ka bedo i lobo ma opong ki maro mar ma gin maber mo pe iye.

Meno aye obedo kit ma Baibul otito kwede cwiny ma bibedo tye i “kare me agikki.”

Lanyut mukene mono pud dok tye ma mitte pi niang ni watye ka bedo i kare me agikki? Yecu bene otito ni i kare meno kikume, kwena maber me Ker pa Lubanga gibititone i wi lobo ducu. (Matayo 24:14) Meno dong tye ka timme?

Magajin me Watchtower, magajin man tye pi cwalo kwena maber me Ker pa Jehovah kun jenge i Baibul. Kitye ka goyone i leb mapol loyo buk mo keken ma kati kare ki kare.

Mwaka ki mwaka, Lucaden pa Jehovah gimiyo kare-gi makato cawa bilion pi miyo caden pi Ker pa Lubanga gin ki komgi bot jo mukene.

Gin gitye ka goyo bukke ma tito lok me Baibul i kare-ni i leb maromo 400 kulu, kadi leb magi giloko-gi i kin caro mogo ma nongo wel dano nok iye. Lucaden pa Jehovah dong guo i rok ducu ki kwena maber-ri; gin bene gutito lok man i cula nam mapol ki ka bedo mogo matino ma pe kingeyogi i kit me wi bye. I lobe mapol, gin medde kare ducu ki yubgi me pwonyo Baibul.

Adada, kwena maber me Ker pa Lubanga dong gitye ka tito ne i wi lobo-ni ducu, pe me loko lobo ducu ento pi yub me miyo caden. Kitye ka miyo kare bot dano me kabedo ducu me nyuto ka nyo giparo pi niang i kom anga ma ocweyo polo ki lobo nyo ka gin gibinyuto woro i kum cik pa Lubanga kun ginyuto mar pi dano wadgi.​—Luka 10:25-27; Niyabo 4:11.

Cok cokki, Ker pa Lubanga bijwero jo maraco ducu wek lobo odong maleng kun loko doko paradic.​—Luka 23:43.

[Bok i pot karatac 6]

Kare me Agikki me Ngo?

Pe agikki pa kwai dano ducu. Pien Baibul miyo gen me kwo pi nakanaka bot jo ma gitimo mitti pa Lubanga.​—Jon 3:16, 36; 1 Jon 2:17.

Pe bene agikki pa lobo aloba-ni. Lok pa Lubanga ciko ni lobo ma opong ki jammi ni birii matwal.​—Jabuli 37:29; 104:5; Icaya 45:18.

Ento, man obedo kare me agikki me yub me kare man ma opong ki tim bwami, mar manok, ki agikki pa jo ma pud gimoko i tim me yub man.​—Carolok 2:21, 22.

[Bok/Cal ma tye i pot karatac 7]

Baibul Mono Obedo Lok pa Lubanga Ada?

Lunebi me Baibul, gucoyo wang mapol ni: “Man aye gin ma Jehovah owaco.” (Icaya 43:14, NW; Jeremia 2:2, NW) Kadi wa Yecu Kricito, Wod pa Lubanga, onwoyo bene ni en ‘pe eloko pire kene.’ (Jon 14:10) Baibul kikome bene tito atir ni: “Ginacoya ducu ma yam gicoyo, gicoyo pi teko pa Cwiny pa Lubanga.”​—2 Temceo 3:16.

Pe tye buk mukene ma kigoyo i leb mapol​—makato 2,200 kulu, kit ma jo me United Bible Societies gutito pire. Pe tye buk mo mukene ma gitye ka tic kwede madwong macalo meno​—kombeddi dong tye wa i wel ma kato bilion 4 kulu. Meno mono pe kit ma wageno ni gin ma oa ki bot Lubanga myero obed kwede?

Pi lok ma kinyamo i kom lanyut ni Baibul obedo lok ma oa ki bot Lubanga, nen buk: The Bible​—God’s Word or Man’s? ma Lucaden pa Jehovah aye gugoyo.

Ka i kwano Baibul kun icwako ni ada obedo Lok pa Lubanga, ci ibinongo bakacic madwong.

[Bok/Cal ma tye i pot karatac 8]

Ker pa Lubanga Obedo Gin Ango?

Gamente ma i polo-ni en aye binyuto loc pa Lubanga me ada, Lacwe polo ki lobo.​—Jeremia 10:10, 12.

Baibul onyuto Yecu Kricito macalo ngat ma Lubanga omiye twero me loc. (Niyabo 11:15) I kare ma en tye i lobo, Yecu onyuto ni en onongo dong etye ki twero me aura ma oa ki bot Lubanga​—twero ma oweko en ojuko wa yamo mager, ocango two mapol, kadi wa cero jo muto. (Matayo 9:2-8; Marako 4:37-41; Jon 11:11-44) Ginacoya ma tye i Baibul oloko con ni Lubanga bene bimiyo “loc ducu i cinge, kacel ki ker ducu ki deyone, wek lwak me rok ducu, ki rok ducu, ki jo ma loko leb mapatpat-gu ducu, gubed luticce.” (Daniel 7:13, 14) Gamente meno gilwongo ni Ker me polo; Yecu kombeddi tye ka loc ki i polo.

[Cal ma tye i pot karatac 7]

Tito lok me kwena maber i wi lobo ducu