Kwoni Mono Tye Ka Kemo Tung Kwene?
• Dano mapol gukulo wigi i tic ma mako kwo me kare ducu tutwal ma dong gitamo manok mada pi kama kwogi tye ka kemo iye.
• Baibul poyo wiwa i kom jammi ma mwonya ma tye i anyim. Dok ociko bene pi bino pa anyobanyoba ma bibedo i yub pa dano i lobo ducu. Wek wanong mot dok pe wapotu i peko, tic mabeco mitte pi oyot mada.
• Tye jo mukene ma gingeyo ngo ma Baibul waco dok gitemme me ketone i tic ento giweko par me kwo kwanyogi woko ki i yo maberri.
• In mono cwinyi yom ki ka ma kwo-ni tye kakemo iye? Ka itye ka keto yub pi timo jammi mogo, mono kong itamo matut kit ma yub ma iketo-ni bigudi kwede ki jammi ma i mito pi kwo ma anyim mabor?
[Bok/Cal ma tye i pot karatac 9]
Ngo ma Pire Tek Tutwal ki Boti?
I yo ma nining ma iparo kwede pi jammi magi? Kwan welgi.
Pol jammi magi ducu pirgi tego i kwo, ento ka imito yero-gi kono, gin ango ma iketo ma okwongo, ka dok me aryo, ki dong mukene i kwo-ni?
․․․ Galowang ki tuko me mato yamo
․․․ Ticca nyo tic ma apwonye iye
․․․ Yot koma
․․․ Yomcwinya pira kena
․․․ Lawota ma wanyome kwede
․․․ Lunyodo-na
․․․ Lutinona
․․․ Paco ma mwonya, bongi mabeco
․․․ Timo maber ma loyo i ticca ducu
․․․ Woro Lubanga
[Bok i pot karatac 10, 11]
Tika Jammi ma Iyero Tye ka Teri Kama Cwinyi Mito Cito Iye?
KONG ITAM I KOM LAPENY MAGI
GALOWANG KI TUKO ME MATO YAMO: Ento tuko ma an ayero me mato yamo mono gonyo koma? Nyo mono obedo kodi tuko ma kelo yomcwiny malyet ento twero keto kwona ka mading nyo kela ngolo pi kwona ducu? Obedo mono kodi ‘yomcwiny’ ma iwinyo mitte pi cawa mo manok keken ento ma twero kelo aremcwiny pi kare malac? Kadi bed ni galowang ma ayero tye kakare, mono acwalo iye cawa malac ma dong camo cawa pi jammi ma pirgi tego ducu?
TICCA NYO TIC MA APWONYE IYE: Mono tye calo gin me gwoko kwo, kecce keta adoko opii-ne? Mono diya ma twero balo wa yot koma woko? Mono an amaro tic man ma medde inge cawa me giko ticci nyo atiyo ki kare meno me bedo ki lawota ma wanyome kwede ki lutinona? Ka ladit ticca omiya tic ma miyo cwinya ngola iye kop nyo tic ma kare ducu pe miya kare me timo tic me cwiny, myero mono aye timone pi gwoko dog ticca?
YOT KOMA: Mono atero calo gin ma konnye peke, nyo agwoko cawa weng? En aye dong mono obedo gin ma aloko iye cawa ducu? Kit yo ma atere kwede nyuto ni aparo pi jo me oda?
YOMCWINY PIRI KENI: Man mono obedo gin ma atamo pire me acel? Mono an aketo pire anyim ma loyo yomcwiny pa lawota ma wanyome kwede nyo pa jo me oda? Mono yo ma ayenyo kwede tye ma opore ki pa lawor Lubanga me ada?
LAWOTA MA WANYOME KWEDE: An mono aneno en macalo lawota macok ka timo jammi ma yomocwinya keken? An mono atero lawota-ni i yo me woro, ento pe calo ngat mo ma konnye pe? Mono bedo ki niye i kom Lubanga gudo yo ma atero kwede lawota ma wanyome kwede?
LUNYODO-NA: Ka pud atidi, an mono atye ki woro i kom lunyodo-na—agamo doggi ki mwolo, atimo tic ducu ma gimiya, adwogo paco con i cawa ma gin giciko, kun agwokke ki i mako lurem ki dok timo jammi ma gicikka iye? Ka dong adit, mono pud awinyogi ki mwolo, kun amiyo-gi kony ma rwatte ka ce mitte? Mono yo ma aterogi kwede lubo kit ma nongo ber kwede ki bota, nyo ma nongo lubbe ki tira ma i Lok pa Lubanga?
LUTINONA: An mono awinyo ni obedo ticca me pwonyo lutinona ki kit maber, nyo mono ageno ni cukul aye bitimo meno? An mono akwanyo kare me bedo ki lutinona, nyo ageno ni toyi, telebijon, nyo kompiuta aye bigalo wang-gi? An mono apwonyo lutinona pi bal kare ducu ka gucayo tam ma i lok pa Lubanga, kecce atimo man ka gucwero cwinya keken?
PACO MA MWONYA, BONGI MABECO: Ngo ma doro tama i kom kit ma anen kwede ki jammi ma myero abed kwede—tam ma abimito ni jirani-na gubed kwede i koma, ber bedo pa jo me paco-na kit ma atye kwede lawor Lubanga-ni?
TIMO MABER MA LOYO I TICCA DUCU: Mono an atamo ni obedo gin ma pire tek me timo jammi i yo maber? Kece mono ayelle me bedo ngat maber loyo? Ka ngat moni otimo jammi maber oloya, mono cwero cwinya?
WORO LUBANGA: Bedo ki cwak pa Lubanga mono obedo gin ma pire tek bota ma loyo cwak pa lawota ma wanyome kwede, lutinona, lunyodo-na, nyo ladit ticca? Atye atera mono me keto tic pa Lubanga obed me aryo i kwona pi nongo kwo ma yot?
LUB PWONY MA I BAIBUL-LI KORE KI KORE
I rwom ma rom mene ma iketo kwede Lubanga i kwoni?
Latitlok 12:13, (NW): ‘Lwor Lubanga acel me ada dok ilub cikke ducu. Pien man aye obedo tic ma myero dano otim.’
PENYE KONG KENI NI: Ento kwona mono nyuto ni an aneno kwo kit meno? Kit ma atimo kwede ticca me paco, i gang tic, nyo i cukul mono lubbe ki bedona macalo lawiny i kom cik pa Lubanga. Nyo mono miti mukene-ni ki nyo tek pa kwo aye loyo yub-ba me keto kare mo pi Lubanga?
Kit wat ango ma tye i kinwu ki Lubanga?
Carolok 3:5, 6: “Gen Rwot ki cwinyi ducu, pe ibed ka jengnge i kom niang ma itye kwede. I kit kwoni ducu wii myero opo i kom Rwot, ci en bitiro yo ma iwoto iye bedo atir.”
Matayo 4:10: “Wor Rwot Lubanga-ni, dok bene iti pire keken.”
PENYE KONG KENI NI: Meno en aye kit ma an mono atamo kwede pi Lubanga? Mono ticca me nino ducu, kadi wa yo ma alwenyo kwede ki peko, nyuto kit me gen ki lworo Lubanga?
Kwano Baibul ki dok kwanone matut, pire tek ma romene ki boti?
Jon 17:3: “Man en kwo ma pe tum, ni ginge in Lubanga acel me ada, ki Yecu Kricito ma yam ioro.”
PENYE KONG KENI NI: Mono kare ma amiyo me kwano Lok pa Lubanga ki tamo iye matut nyuto ni an mono ada aye lok meno?
Pire tek ma romene ki boti me bedo tye i cokke pa Lukricitayo?
Jo Ibru 10:24, 25: “Dok bene myero watamu kit macalo watwero tugo kwede cwinywa kekenwa i mar ki i tiyo tic mabeco, kun pe waweko cokke kacel, . . . makatone kit macalo wuneno Nino maca dong tye ka nyiko cok-ki.”
Jabuli 122:1: “Abedo ki yomcwiny i kare ma guwaco bota ni, ‘Wacitu i ot pa Rwot!’”
PENYE KONG KENI NI: Yo me kwo-na mono nyuto pwoc pi tira man matye i Lok pa Lubanga eni? I dwe mukato-ni mono akeng cokke pa Lukricitayo pien ni aweko jammi mukene okwanyo kare-na woko ducu?
In mono itye ki mit kom me nywako lok i kom Lubanga ki yubbe bot jo mukene?
Matayo 24:14: “Dong lok man me kwena maber me ker pa Lubanga gibitito i wi lobo ducu, me bedo caden, . . . , ka dong lacen agikki piny bibino.”
Matayo 28:19, 20: “Pi meno dong wuciti wucilok jo me rok ducu gudok jo ma luba, . . . wupwonygi me gwoko gin ducu ma dong atyeko cikowu kwede.”
Jabuli 96:2: “Wuwer bot Rwot, wupwo nyinge; wutit pi larre nino ducu.”
PENYE KONG KENI NI: Tic man mono pire tek i kwona i kit ma myero obed kwede? Mono kit ma anywako kwede ticci nyuto mit koma kit macalo kare man ma watye iye pe obedo kare me tuko-ni?