Tika Dini Ducu Girom? Tika Gin Ducu Ginyikowa Cok ki Lubanga?

Lagam ma Baibul miyo

Ku, dini ducu pe rom. Baibul tye ki labol pa dini mapol ma pe giyomo cwiny Lubanga. Kitwero poko kin dini ma pe giyomo cwiny Lubanga i dul aryo.

Dul me 1: Dini ma giworo lubange me goba

Baibul waco ni woro lubange me gobo obedo “gin me bwolo” “ma tere pe” dok ma ‘konye pe.’ (Jeremia 10:3-5; 16:19, 20) Lubanga Jehovaha ociko Luicrael ni: “Pe ibed ki lubanga mukene kono an kena.” (Nia 20:3, 23; 23:24) I kare ma Luicrael gubedo ka woro lubange mukene, ‘kiniga omako Jehovah’ adada.​—Wel 25:3; Lulevi 20:2; Lungolkop 2:13, 14.

Lubanga pud winyo kit meno i kom woro ‘lubange mukene.’ (1 Jo Korint 8:5, 6; Jo Galatia 4:8) En ociko jo ma mito wore ni pe myero gunywak i dini goba. En owaco ni: “Wua woko ki i kingi, wupokke woko kwedgi.” (2 Jo Korint 6:14-17) Ka dini ducu girom dok giterowa bot Lubanga, onongo en pe biminiwa cik meno.

Dul me 2: Dini ma giworo Lubanga me ada ento i yo ma en pe cwako

I kare mogo, Luicrael gubedo ka woro Lubanga kun gilubo kit me woro pa dini goba, ento Jehovah okwero timgi me rubo dini me ada ki dini me goba woko. (Nia 32:8; Nwoyo Cik 12:2-4) Yecu ociko lutela dini me karene pien onongo pe giworo Lubanga i yo ma en cwako; onongo ginyuto ki woko ni gin ludini, ento ‘gutenyo Cik ma pigi tego woko, me labolle, ngolo kop atir, timo kica, ki dong bedo jo ma lugen.’​—Matayo 23:23.

I kare-ni bene, dini ma jenge i kom lok ada keken aye nyikowa cok bot Lubanga. Lok ada meno nonge i Baibul. (Jon 4:24; 17:17; 2 Temceo 3:16, 17) Dini ma pwonye pe rwatte ki pwony me Baibul diro dano cen ki bot Lubanga. Pwony mogo ma dano gitamo ni oa ki i Baibul ki lok ada nongo oa ki bot jo ma giworo lubange me goba​—me labolle, pwony ni Lubanga tye adek i i acel, ni dano tye ki tipo ma pe to, ki dong ni Lubanga wango dano i mac me kapiny. Dini ma pwonyo dano ki pwony ma kit meno giyelle “nono” dok kony pa worogi pe pien guleyo ka wang cik pa Lubanga ki cik me dini.​—Marako 7:7, 8.

Lubanga deg jo ma ginyuto ki woko keken ni gin ludini. (Tito 1:16) Wek dini moni okony dano me nyikke cok ki Lubanga, dini meno omyero ogud kit me kwogi ducu, pe myero ogik ki kwer nyo tim ma nen ki woko keken. Me labolle, Baibul waco ni: “Ka ce dano mo otamo ni en ladini kun pe juko lebe, nongo bwolle abwola kene ki i cwinye, dinine-nu konnye pe. Dini me ada maleng, ma cilo pe iye i nyim Lubanga Wonwa en ene: konyo litino kic ki mon ma coggi oto i kom can ma gitye kwede, ki gwokke ken i kom bal me lobo.” (Yakobo 1:26, 27)