Anga ma Obedo Lakwor pa Kricito?

Lagam ma Baibul miyo

Lakwor pa Kricito pe obedo mere ngat acel nyo dul acel keken, pien Baibul waco ni ‘lukwor pa Kricito gipol ata.’ (1 Jon 2:18) Me kaka meno, lok man ni “lakwor pa Kricito,” ma kigonyo ki i nyig lok me leb Grik ma tyen lokke ni “lajemo i kom (nyo me kaka) Kricito,” cung pi ngat mo keken ma timo jami magi:

• Kwero woko ni Yecu aye Kricito (Meciya) nyo kwero woko ni Yecu aye Wod pa Lubanga.—1 Jon 2:22.

• Jemo i kom Kricito, Ngat ma Lubanga Owiro.—Jabuli 2:1, 2; Luka 11:23.

• Poro odenge ni en Kricito.—Matayo 24:24.

• Uno lulub kor Kricito, pien Yecu neno gin ma kitimo i komgi calo kitye ka timone i kome.—Tic pa Lukwena 9:5.

• Poro bedo Lakricitayo kun timo jami maraco nyo bwolo dano.—Matayo 7:22, 23; 2 Jo Korint 11:13.

Kadi bed Baibul loko i kom ngat ma timo jami magi ni obedo lakwor pa Kricito, ento bene Baibul lwongo jo magi ducu macalo gurup ni “lakwor pa Kricito.” (2 Jon 7) Lakwor pa Kricito okwongo bedo tye i kare pa lukwena dok pud tye wa i kareni. Lok pa lunebi me Baibul otito wacon ni meno bitimme.—1 Jon 4:3.

Kit me ngeyo lukwor pa Kricito

• Ginyayo lok goba i kom Yecu. (Matayo 24:9, 11) Me labolle, jo ma gipwonyo ni Lubanga tye adek i kom acel nyo ni Yecu obedo Lubanga Won Twer Ducu nongo gitye ka jemo i kom pwony pa Yecu, ma owacci: “Won dit kata.”—Jon 14:28.

• Lukwor pa Kricito gikwero lok pa Yecu madok i kom kit ma Ker pa Lubanga tiyo kwede. Me labolle, lutela dini mukene giwaco ni Kricito tiyo kun wok ki bot gamente pa dano. Ento, pwony man pe rwatte ki gin ma Yecu owaco ni: “Kerra pe me lobo man.”—Jon 18:36.

• Giwaco ni Yecu aye obedo Rwotgi, ento pe gilubo cikke, ma i kine tye iye tito kwena maber me Ker-ri.—Matayo 28:19, 20; Luka 6:46; Tic pa Lukwena 10:42.