Lapeny ma Kigamo me Baibul / Kwo ki To / Tyen Lok me Kwo Obedo Ngo?

Lagam ma Baibul miyo

Lapeny madok i kom tyen lok me kwo kitwero penyone i yo mapol, calo Pingo watye kwo? nyo Tika kwona tye ki tyen lok? Baibul nyuto ka maleng ni tyen lok me kwowa obedo me dongo lirem macok ki Lubanga. Nen kong lok ada magi ma pigi tego ma Baibul nyuto.

• Lubanga aye Ocweyowa. Baibul wacci: ‘Lubanga aye oketowa, wan wa danone.’—Jabuli 100:3; Niyabo 4:11.

• Lubanga tye ki yub pi jami ducu ma en cweyo, wa wan dano bene.—Icaya 45:18.

• Lubanga ocweyowa ki ‘miti me ngeyo en,’ ma man kwako bene miti me ngeyo tyen lok me kwo. (Matayo 5:3) En mito ni wacob miti meno.—Jabuli 145:16.

• Wacobo mitiwa me ngeyo Lubanga ki dongo lirem macok kwede. Kadi bed jo mogo gitamo ni pe twere me bedo larem Lubanga, Baibul cuko cwinywa ni: “Wunyik cok bot Lubanga, ci en bene binyiko cok botwu.”—Yakobo 4:8; 2:23.

• Me doko lurem Lubanga, omyero wakwo ma lubbe ki yubbe piwa. Baibul tittiwa pi yub man i Latitlok 12:13 ma wacci: ‘Lwor Lubanga dok ilub cikke ducu, pien meno aye tyen lok muweko kicweyowa.’

• I anyim, watwero nongo mit pa yub pa Lubanga piwa ka en dong ogiko deno can woko dok omiyo kwo ma pe tum bot lureme ma giwore.—Jabuli 37:10, 11.