Lapeny ma Kigamo me Baibul / Yomo cwiny Lubanga / Gin Ango ma Baibul Waco i Kom Tattoo?
Lagam ma Baibul miyo
Baibul loko i kom tattoo kicel keken i Lulevi 19:28, ma wacci: ‘Pe wuket tattoo mo i komwu.’ Lubanga omiyo cik man ki rok me Icrael, kun pokogi woko ki i kin jo murumo ka ngetgi ma onongo giketo alama i komgi me nyuto nying nyo cal pa lubangagi. (Nwoyo Cik 14:2) Kadi bed Lukricitayo pe gilubo Cik ma kimiyo bot Luicrael, ento pire tek adada ni watam i kom pwony ma tye i cik meno.
Tika Lakricitayo omyero onong tattoo nyo ogo cal mo i kome?
Wang Baibul magi twero konyi me tam i kom lapeny meno:
“Mon bene myero gurukke maber ki mwolo.” (1 Temceo 2:9) Cik ma iye lac meno, gudo mon wa ki co bene. Omyero wawor kit ma jo mukene giwinyo kwede dok pe waywa tam pa dano i komwa.
Jo mukene ginongo tattoo me nyuto ni gitye ki twero me timo gin mo keken i komgi. Ento, Baibul cuko cwiny Lukricitayo ni: ‘Wumine kenwu macalo gitum makwo ma gityero bot Lubanga, gin maleng ma yomo cwiny Lubanga, kun wutiyo ki kerowu me tam matut.’ (Jo Roma 12:1) Ti ki ‘keroni me tam matut’ me niang pingo imito tattoo. Ka obedo pien ni imito mere lubo gin ma dano mapol gitye ka timone, nyo imito nyuto ni ibedo lamemba me gurup mo, wi opo ni itwero loko tammi woko, ento nongo pe itwero kwanyo tattoo ma iketo-ni.—Carolok 4:7.
“Ngat ma yubo yubbe ma nongo kong oketo i tam, bilimo jami madwong ata; ento ngat ma tiyo jami oyotoyot bibedo lacan.” (Carolok 21:5) Pol kare dano rune me keto tattoo, ento twero balo watgi ki jo mukene nyo ticgi. Dok kwanyo tattoo twero bedo lit dok welle twero bedo tek bene. Kwed ma kitimo—kacel ki biacara madit me kwanyo tattoo ki i kom dano—nyuto ni jo mapol ma ginongo tattoo gikoko ange ni twora onongo pe giketi.