Lutino Gubedo “Ginaleya ma Oa ki Bot Jehovah”

GIN ango ma bino i wii ka iwinyo nyig lok man ni “ginaleya”? Itwero tam i kom cente, ot, ngom nyo gin mo mukene me wel ma dong orii adada i dog otwu. Pi meno, ginaleya obedo gin mo me wel adada dok ngene kene ni itye ki miti me gwokone maber adada.

Baibul lwongo lutino ni gubedo “ginaleya ma oa ki bot Jehovah.” (Jab. 127:3, NWT) Lunyodo ma gimaro Jehovah gineno lutino calo mot mua ki bot Jehovah. Gitimo gin ducu ma gitwero me konyo lutinogi me bedo ki jami ma mitte me kwo, me gwoko yotkomgi, me neno ni cwinygi yom dok gikonyogi me bedo ki wat macok ki Jehovah.

Ki cwercwiny, lunyodo mogo pe gineno lutinogi calo mot mua ki bot Lubanga. (Ic. 49:15; 2 Tem. 3:1-3) Lunyodo mukene gitye ki miti madwong me gwoko lutinogi i yo maber ento pe gitye ki kero muromo me timo meno. Ariya mapatpat ango ma lunyodo gikemme kwede ma weko bedo tek botgi me gwoko lutinogi? Gin ango ma Jehovah mito ni lunyodo gutim pi lutinogi? Dok i yo ma nining ma lunyodo gitwero gwoko kwede lutinogi me dongo maber dok ki yomcwiny?

ARIYA MA LUOT GIKEMME KWEDE

Lyeto ma a ki bot lupacogi kacel ki jo mukene. I kabedo mukene, luot ma gitye ki lutino mapol kiminigi woro matek. Pi meno, pol pa luot gibedo i lyeto me nywalo lutino mapol ma pe giromo gwokone maber pien meno aye gin ma lupacogi nyo jo mukene gimito.
Paro pi kit ma anyim bibedo kwede. I lobe mogo, dano pe gitye ki cam muromo nyo odi yadi mabeco, dok two ma yelo lutino tye mapol adada. Meno aye tyen lok ma omiyo luot mogo ginywalo lutino mapol wek kadi bed mukene oto ento mogo gibwot. Luot mukene ginywalo lutino mapol wek ka dong gitii, lutino magi aye ogwokgi. Man tye lok ada tutwalle i lobe ma gamentegi pe miyo kony pi jo mutii.
Lago nywal. I lobe mogo, dano pe gitye ki jami muromo ma twero konyogi me lago nywal. Jo mukene gilworo kit ma yadi me lago nywal terogi kwede. Jo mukene doki, pe gitye ki cente me wilo jami me lago nywal pien nongo welgi tek.a

GIN MA JEHOVAH MITO KI BOT LUNYODO

Jo me ot mo gitye ka namo i ka namo mo. Wego tye ka winyo lok pa nyare me mwaka apar ki wiye dok mego tye ka tuko odilo ki wodgi matidi. — Mi kare muromo bot latin acel acel

Mi jami me kom ma mitte bot lutinoni. Jehovah mito ni lunyodo guti matek me miyo cam, ginaruka, ki kabedo pi lutinogi ducu nio wang ma dong gudoko dongo. Jehovah bene mito ni lunyodo gucwal lutinogi i gang kwan. Pi meno, lunyodo omyero guwek lutinogi gubed ka wire ki gang me cito i cukul ento omyero pe gubed ki i cukul. Me ka meno, omyero gugwok lutinogi nio wang ma guteggi, dok bene gupwonygi ki diro tic ma bikonyogi i kare me anyim. Myero bene gumi kare muromo bot latin acel acel wek lutino guwiny ni kimarogi. Kadi bed kit meno, pe mitte ni lunyodo gubed lulonyo wek giyom cwiny Jehovah. Ki lok ada, luot ma Jehovah oyero me gwoko Wode onongo pe gubedo lulonyo ento onongo gubedo lutic matek.—Mat. 13:55, 56; Luka 2:24.

Cik ma iye lac: “Ka ce dano mo pe miyo gin mo me konyo wadine, makato pi jo me ode kikome, nongo dong okwero niyene woko, dok bene odoko rac makato ngat ma pe oye Lubanga.”—1 Tem. 5:8.

Jehovah niang ni twero mitte ni lunyodo gunong kony ka giwoto ki teggi. Ki lok ada, yo acel ma lutino gimiyo kwede ki deyo bot lunyodogi aye ki neno ni gunongo kony ma mitte ka giwoto ki tii. (Nia 20:12; 1 Tem. 5:4) Kadi bed kit meno, Jehovah cwinye bedo yom ka lunyodo giketo cwinygi tutwalle i kom kit ma gibigwoko kwede lutinogi ento pe kit ma lutinogi bigwokogi kwede.—2 Kor. 12:14.

Kony lutinoni me dongo wat macok ki Jehovah. Lunyodo gitye ki tic me pwonyo lutinogi me maro ki dong woro Jehovah. Ki tung bot Jehovah, man aye gin ma pire tek loyo ma lunyodo gitwero pwonyo ki lutinogi.—Nwo. 6:6, 7.

Cik ma iye lac: “Wupitgi gudong maber kun wupwonyogi dok wunyebogi ki kit mabeco ma Rwot [Jehovah] pwoyo.”—Ep. 6:4.

JEHOVAH MITO KONYI ME GWOKO LUTINONI

Luot mo gitye ka nyamo lok mo ma pire tek ki gang. Baibul tye ayaba i wi meja ma tye i nyimgi. — Wumok woko con wel lutino ma wumito nywalone

Ket yub pi anyim. Ka wutye ki yub me nywalo lutino, ci kong wutam matut i kom kit ma kwowu tye kwede. Me labolle, tika wubibedo ki kero me gwoko lutino mapol? Bimitte ni ibed ki cente madwong, cawa muromo kacel ki yotkom me pito lutino, rukogi maber ki dong culogi i gang kwan. Labongo akalakala mo, imito bene nyuto bot latin acel acel ni iparo pire kit ma Jehovah mito kwede. Pi meno, wunyam kacel macalo luot wel lutino ma wumito nywalone. Ngene kene ni, Jehovah niang ni tye jami mogo ma ngolle atura i kwowa kadi bed waketo yub. (Latit. 9:11) Ento en bigoyo laane i kom tutewu me bedo lunyodo mabeco.

Cik ma iye lac: “Ngat ma yubo yubbe ma nongo kong oketo i tam, bilimo jami madwong ata; ento ngat ma tiyo jami oyotoyot bibedo lacan.”—Car. 21:5.

“Anga i kinwu ka mito gero ot ma wiye bor, ci pe kong kwongo bedo piny ka kwano wel lim ma mitte, ka ce etye kwede ma eromo tyekone?”—Luka 14:28.

Wek tic pi Jehovah obed gin ma pire tek loyo botwu. Ket tek me neno ni woro Jehovah aye obedo gin ma pire tek loyo i paconi. Ka lutino tye, kwany kare me konyo latin acel acel me maro Jehovah. Konygi me keto cwinygi ka winyo pwony i cawa me cokke. Wutute me bedo ki Woro pi Jo me Ot cabit ducu. Pwony lutinoni kit me tito kwena. Pe myero ijal ticci me bedo lanyodo bot lutinoni madongo nyo bot wadini. Tero kare kacel ki tic matek me konyo lutinoni wek gumar Jehovah. Ento cwinyi bibedo yom adada ka ineno lutinoni gitiyo pi Jehovah.

Cik ma iye lac: “Pe tye gin mo ma dok miya abedo ki yomcwiny madit makato me winyo ni litinona gitye ka lubo lok ada.”—3 Jon 4.b

Gen Jehovah. Kadi bed itye ki tam me nywalo lutino nyo dong itye ki lutino, bed ki gen ni gin ma Jehovah mito ki boti macalo lanyodo pire tek loyo gin ma dano ma i kabedowu gimaro timone.

Cal ma kiribogi kacel: 1. Lunyodo ma gubedo kacel ki wodgi i cawa me cokke. Wodgi oilo cinge me miyo lagam. 2. Jo me ot ma gitye ka tic kacel i tic me pwony. Wego tye ka tic kacel ki nyargi me mwaka apar ki wiye kun mego tye ka tic ki lutinogi aryo matino. — Pwonyo lutino me woro Jehovah tero kare dok mito tute matek

Ka wumoko tamwu pe me nywalo lutino mapol, wubed ki gen ni Jehovah pud bigwokowu kadi wa i kare ma dong wutii woko. Kadi bed dano giloko, pe ibed i lyeto me nywalo lutino mapol ki tam ni gibitiyo cente madwong me gwoki ka dong itii woko. Pe mitte ni ibed ki lworo ni ibibedo labongo ngat mo me gwoki ka dong itii woko. Jehovah ocikke ni ebigwoki dok en kare ducu cobo cikkene.—Yoc. 23:14.

Cik ma iye lac: “Gen Rwot [Jehovah] ki cwinyi ducu, pe ibed ka jengnge i kom niang ma itye kwede. I kit kwoni ducu wii myero opo i kom Rwot, ci en bitiro yo ma iwoto iye bedo atir.”—Car. 3:5, 6.

“Yam abedo latin, ento man dong adit; pud peya aneno gibwoto dano ma kite atir, kadi ki litinone bene pe aneno ka gilego kwon alega.”—Jab. 37:25.

“Pi meno, wumedde ki keto pi Ker-ri ki gin ma atir i wang Lubanga wek obed mukwongo, ci jami magi ducu kibimedo botwu.”—Mat. 6:33.

Lutino gubedo mot ma pire tek ma Jehovah omiyo bot lunyodo. Jehovah cwinye bedo yom adada ka neno lunyodo gigwoko lutinogi kit ma en mito kwede! Gimiyo jami me kom ma mitte dok gikonyo lutinogi me dongo mar matut pi Jehovah; gimoko ki ryeko wel lutino ma gimito bedo kwede; dok giketo timo miti pa Jehovah bedo mukwongo makato lubo tekwarogi. Ka lunyodo gitimo meno, ginyuto ni gimaro lutinogi matek dok ginenogi calo mot mua ki bot Jehovah.

Cwinygi Yom pi Tam ma Gumoko

Tika lunyodo gideno can ka guyero pe me nywalo lutino mapol? Lapeny man yelo wi lunyodo mapol ma gikwo i lobe ma can lim tye iye matek. Nen kong gin ma wege mogo ma gibedo i lobe ma kit meno guwaco.

Tika jo mukene guketo lyeto i komi me nywalo lutino mapol?

Jeremias owaco ni: “Ada, kadi wa jo mogo me kacokke bene guketo lyeto i komwa. Luot mo guwaco botwa ni, ‘Pingo wunywalo awobi acel keken? Ki botwa kany i Afrika, ka inywalo awobi acel keken, nongo irom ki ngat ma pe ki latin. Ka inywalo awobe aryo, nongo irom ki ngat ma onywalo latin acel keken.’ Kadi wa i nge nywalo latinwa me aryo ma obedo nyako, lyeto man pud pe ogik.”

Tika wutye ka kato ki i pekki mogo pien ni wumoko tamwu pe me nywalo lutino mapol?

Jeremias owaco ni: “Pe tye kit meno. Kit macalo wamoko tamwa pe me nywalo lutino mapol, an ki dakona watye ki kero me miyo jami me kom ducu ma mitte bot lutinowa ki dong ma pire tek loyo, konyogi me bedo ki wat macok ki Jehovah. Lunyodona gubedo ki lutino mapol adada dok aneno kit ma obedo tek kwede botgi me miniwa jami ducu ma mitte ki dong culowa i gang kwan.”

Lutinowu giwinyo nining pi tam ma wumoko?

Filipe owaco ni: “Lutinowa cwinygi yom pien pe gukato ki i pekki mapol calo lutino ma gudongo i gang ma lutino gidwong iye ma nongo lunyodo pe gitwero miyo botgi gwok muromo.”

Carlos owaco ni: “Lutinowa gudongo ma cwinygi yom pien gunongo gwok kacel ki mar muromo ki botwa. Pol kare onongo walwongo omege ki lumege ma guteggi i yo me cwiny i pacowa, dok gucuko cwinywa matek me medo ticwa pi Jehovah. I kare-ni, watye ka neno kit ma lutinowa gilubo kwede lanen mabeco magi.”

Tika wunongo adwogi mo maber pi tam ma wumoko?

Jeremias owaco ni: “Tam ma wamoko pe me nywalo lutino mapol oweko wabedo ki kero me miyo jami me kom ma mitte bot lutinowa. Arwenyo ticca ma onongo culle ber adada mwaki adek angec. Ento kit macalo jo me pacona onongo welgi nok-ki, onongo pe mitte ni wabed ki cente madwong me gwokowa. Man oweko obedo yot botwa me nongo jami ma mitte kadi wa i kare ma anongo tic manyen ma culle nok.”

Lenadi owaco ni: “Tam ma wamoko-ni oweko wabedo ki kero me miyo jami me kom bot lutinowa ki dong me konyogi me dongo wat macok ki Jehovah. Wabedo ki kare me cito ka tic i kabedo ma can lutit kwena tye iye. Wanongo ni yot me miyo kare muromo bot latin acel acel. Lutinowa ducu gitye ka tic pi Jehovah dok guketo yub me medo ticgi pire.”

Tam ango ma imito miyone bot lunyodo mukene?

Rafael owaco ni: “Amoko ada pa lok ma nonge i Jabuli 34:10b, ma waco ni: ‘Jo ma giyenyo Jehovah gin maber mo pe birem botgi.’ Jehovah omiyo botwa jami ducu ma mitte.”

a Obedo tic pa laco ki dakone me moko ka ce gibitic ki yo mo me lago nywal nyo pe, ki dong yo mene ma gibitic kwede. Gin aye gimoko wel lutino ma gimito nywalone ki dong awene ma gimito cako nywal iye. Ngene kene ni, pe myero guti ki yo me lago nywal ma onyo ic. (Rom. 14:4, 10-13) Medo i kom meno, ka luot gitye ka moko tam magi, wigi myero opo i kom tira ma kimiyo i 1 Jo Korint 7:3-5.

b I tyeng man, lutino ma Jon obedo ka lok i komgi gubedo jo ma en onongo opwonyogi ki ada. Lunyodo bene giwinyo kit man i kom lutinogi ma gitiyo pi Jehovah.