Tika Wii Po?

Tika iketo cwinyi ka kwano Wi Lubele ducu me mwaka-ni? Ka kumeno, nen kong ka itwero gamo lapeny magi:

Gin ango ma tugo cwinywa me miyo deyo bot Jehovah?

Watimo man pien watye ki woro matut pi Jehovah dok wamare matek. Wamine deyo bene pien wamito ni jo mukene gunge en.—w25.01, pot 3.

Ka ngat mo ocwero cwinywa, gin ango ma romo konyowa me timme kica?

Pe wacayo kit ma wawinyo kwede; ento, ka wajuko bedo ki akemo, ci man bikonyowa pe me bedo ki keccwiny.—w25.02, pot 15-16.

Pingo lapwonnye Marako obedo lanen maber pi omege matino?

Marako obedo atera me jolo tic ma kimine me konyo utmege. Kadi bed cwiny Marako ocwer pien Paulo okwero wot kacel kwede, ento Marako pe oweko tic ma kimine woko. En ogwoko wat ma tye i kin en ki Paulo kacel ki Lukricitayo mukene muteggi.—w25.04, pot 27.

Gin ango ma onongo Yecu tye ka lok iye i kare ma en olego ni: “Amiyo nyingi ongene botgi”? (Jon 17:26)

Lupwonnye pa Yecu onongo dong gingeyo nying Lubanga. Ento Yecu oweko gungeyo tyen lok me Nying meno, kacel ki yub pa Lubanga, ticce ki dong Kite.—w25.05, pot 20-21.

Ka wabedo jo mamwol, ci gin ango ma wabiye?

Wabiye ni tye jami mogo ma pe wangeyo. Me labolle, pe wangeyo awene ma agikki bibino iye nyo gin ma Jehovah bitimone kikome i kare meno. Dok bene pe wangeyo gin ma bitimme diki nyo kit ma Jehovah ngeyowa kwede.—w25.06, pot 15-18.

Gin ango ma twero konyowa me nongo adwogi maber ki i pwony mo ma wakwano nyo pwony pi lwak?

Watwero pennye kekenwa ni: ‘Gin ango ma lalok tye ka tic kwede me konyo lwak me ye ni lok meno obedo lok ada? Tika tye lapor mo maber ma atwero tic kwede ka atye ka pwony? Anga ma twero bedo ki miti i kom lok man?’—w25.07, pot 19.

Kit ma Lubanga otero kwede ki Daudi pwonyowa gin ango i kom timo kicane?

Kadi bed Daudi otimo bal madongo, ento Jehovah otimme kica i kare ma en ongut ki cwinye ducu. (1 Luker 9:​4, 5) Ka Lubanga otimiwa kica pi bal moni, en pe dok bikok i komwa nyo biminiwa pwod pi bal meno i anyim.—w25.08, pot 17.

Ka latin kwanni me Baibul tye ka nongo tek me niang pwony moni, gin ango ma itwero timone?

Ka tye pwony mo ma en nongo ni tek me niang iye, kadi bed itute matek me nyamone ki i Baibul, wuromo medde ki kwanwu ci wudok cen ka nyamo pwony meno i nino mukene.—w25.09, pot 24.

Baibul waco ni bal tye ki ‘teko me bwolowa.’ (Ibru 3:13) Man tyen lokke ngo?

Bal bitowa me timo jami maraco. Roc ma watye kwede bene weko wabedo ki akalakala teretere, calo ka ada Lubanga marowa.—w25.10, pot 16.

Jami adek mene ma twero konyowa me lega i yo ma weko wanyikke cok ki Jehovah?

(1) Waromo tam matut i kom kit pa Jehovah mapatpat. (2) Waromo tam i kom peko ma watye ka kemme kwede i cawa meno ci walego pire, me labolle ka tye ngat mo ma myero watimme kica. (3) Pe omyero warune ka watye ka lega. Man bimiyo wabedo ki kare me tito ki Jehovah kit ma wawinyo kwede kikome.—w25.10, pot 19-20.

Watwero konyo jo mutii nining?

Watwero limo nyo goyo cim bot jo muteggi. Waromo bene wot kacel kwedgi ka gicito i ot yat. Nyo waromo tic kacel ki jo mutii i tic me tito kwena i yo mapatpat.—w25.11, pot 6-7.

Jami ango ma weko nyom pa Lukricitayo bedo me deyo?

Lub cik pa gamente madok i kom nyom. Nen ni jami ma bitimme i namo me nyom rwatte ki nyig ma nyak pi cwiny maleng. Rukke i yo ma nyuto woro dok igwokke ki lubo kwer mogo ma pe rwatte ki cik me Baibul. Wulok ki woro i kinwu ka wutye ka yubo nyomwu.—w25.12, pot 21-24