Wun Jo Mutii—Piwu Tek Adada Bot Kacokke

Twero bedo ni in bene dong keroni me timo jami odok woko piny macalo adwogi me tiyo. Dok kadi bed ingeyo ni ibedo lagen bot Jehovah pi mwaki mapol, ka iporo gin ma yam itimo pi Jehovah ki gin ma itye ka timone i kare-ni, cwinyi twero tur woko. Dong ka ce meno aye kit ma iwinyo kwede, gin ango ma twero konyi me bedo ki yomcwiny?

GIN ANGO MA JEHOVAH MITO KI BOTI?

Pennye kekeni ni, ‘Gin ango ma Jehovah mito ki bota?’ Itwero nongo kwe cwiny ki i lok ma kicoyo i Nwoyo Cik 6:​5, ma waco ni: ‘Mar Jehovah Lubangani ki cwinyi ducu, ki kwoni ducu ki tekki ducu.’

Tyeng meno nyuto ni, Jehovah mito ni iti pire ki cwinyi ducu, ki kwoni ducu dok ki tekki ducu. Meno twero konyi me gwokke ki poro ticci ki tic pa jo mukene nyo poro tic ma itiyo i kare-ni ki tic ma onongo itiyo con.

Tam kong i kom lok man: Twero bedo ni i kare ma onongo pud itidi, onongo itye ka miyo ki Jehovah gin maber loyo ma itwero i kare meno. Ento kombeddi ma dong kwoni olokke woko-ni, pud itye ka medde ki miyo gin maber loyo ma itwero miyone i kare-ni. Ka itamo iye kit meno, ci ibiniang ni pud itye ka miyo gin maber loyo ki Jehovah kit ma onongo itimo kwede con. I kare mukato, ibedo ka miyo ki Jehovah gin maber loyo dok pud itye ka mine gin maber loyo i kare-ni.

NGEC MA ITYE KWEDE TWERO KONYO JO MUKENE

Me ka keto tammi i kom gin ma dong pe itwero timone, tam i kom yo mapol ma in macalo ngat muteggi itwero konyo kwede ki jo mukene. Macalo Lakricitayo muteggi, tye jami mogo ma itwero timone i kare-ni ma onongo pe itwero timogi i kare ma pud itidi. Me labolle, itwero timo jami magi:

Nywak ki jo mukene jami ma ipwonyo i kwoni. Tam i kom gin ma Baibul waco i tyeng magi:

Kabaka Daudi owaco ni: “Yam abedo latin, ento man dong adit; pud peya aneno gibwoto dano ma kite atir, kadi ki litinone bene pe aneno ka gilego kwon alega.”—Jab. 37:25.

Yocwa owaco ni: ‘Kombeddi an dong acok to, wun bene wungeyo ki i cwinywu wa ki kwowu ducu ni, gin mabeco ducu ma yam Jehovah Lubangawu ociko piwu, gin ducu gucobbe kakare, pe tye acel mo ma pe otimme.’—Yoc. 23:14.

Daudi gin ki Yocwa onongo dong gutiyo pi Jehovah pi mwaki mapol dok bene gukato ki i jami mapol i kwogi. Pi meno, onongo gingeyo gin ma gitye ka lok iye dok meno oweko lokgi obedo me kony adada. Twero bedo ni in bene dong iwaco lok macalo magi me cuko cwiny jo mukene. Ento i kare-ni, ma dong itye ki ngec madwong i kwoni, lokki twero bedo me kony adada.

Ka in bene dong itiyo pi Jehovah pi mwaki mapol, itwero bene lok i kom jami ma ineno Jehovah otimo piri ki pi jo mukene. Tika wii pud po i kom kare mo ma ineno Jehovah okonyo kwede ki luticce i yo me aura adada? Ka tye kit meno, bed agonya me tito ki jo mukene gin mutimme meno! Tito ki jo mukene lok man twero weko giwinyo maber kit ma in bene iwinyo kwede i kare ma itito lok me cuko cwiny ki jo mukene. Itwero cuko cwiny omege ki lumege matek ka inywako kwedgi jami mogo mutimme i kwoni i ticci pi Jehovah.—Rom. 1:​11, 12.

Yo mukene ma itwero cuko kwede ki cwiny jo mukene aye ki cito i cokke i Ot me Ker, ka itwero. Ka itimo meno, ci ibibedo ki kare me cuko cwiny omege ki lumege dok gin bene gibicuko cwinyi. Laminwa Connie, ma kiloko i kome con-ni owaco ni: “Bedo tye i cokke i Ot me Ker konya me bedo ma cwinya pe otur. Pi mar ma omege ki lumege ginyuta, abedo ki yomcwiny madwong adada ka atye kacel kwedgi i Ot me Ker. Dong atute me nyuto pwoc bot jo mukene kun aminigi mic mogo matino tino. Dok atute me neno ni anywako kacel ki omege ki lumege i tic pi Jehovah.”

JEHOVAH PWOYO TIC DUCU MA ITIYO PIRE

Tye labol mapol i Baibul ma loko i kom jo ma Jehovah omarogi kadi bed onongo pe gitwero tic pi Jehovah kit ma gimito kwede. Tam kong i kom Cimeon, Laicrael mo ma onongo dong oteggi adada i kare ma kinywalo Yecu. Kare ducu ka Cimeon ocito i ot pa Lubanga, twero bedo ni en onongo neno kit ma co matino gitimo kwede tic ma pire tek kunnu. Nen calo Cimeon onongo tamo ni konnye dong pe bot Jehovah pien dong pe etwero tic kit ma co matino gitiyo kwede. Ento Jehovah onongo tye ki neno mapat. Jehovah oneno Cimeon macalo “dano ma kite atir ma lworo Lubanga” dok Jehovah omine mot me neno Yecu i kare ma pud lakere. Jehovah bene otiyo ki Cimeon me tito ni Yecu bibedo Meciya! (Luka 2:​25-35) Dong nen ka maleng ni, Jehovah pe oketo cwinye i kom teko ma Cimeon tye kwede. Me ka meno, Jehovah oketo cwinye i kom niye matek pa Cimeon, dok bene “cwiny maleng onongo tye kwede.”

In bene itwero bedo ki gen ni Jehovah pwoyo tic ducu ma itiyo pire ki gen pi mwaki mapol kadi bed dong i kare-ni pe itwero timone kit macon. Jehovah “gamo mot ma dano tye kwede, ma pe paro gin ma pe etye kwede.”—2 Kor. 8:12.

Pi meno, ket cwinyi i kom gin ma itwero timone. Me labolle, tam i kom yo mapatpat ma itwero tito kwede kwena kadi bed pi cawa manok keken. Itwero bene cuko cwiny omege ki lumege kun igonigi cim nyo icwaligi mecej. Mar ma inyuto twero bedo me cuko cwiny adada bot utmege, tutwalle ka mar meno oa ki bot ngat ma otiyo pi Jehovah pi mwaki mapol calo in.

Kadi bed dong i kare-ni pe itwero timo jami kit macon, pud itwero timo jami mapol pi Jehovah. Nen kong gin mo mutimme i lobo mo i East Africa i bok ma wiye tye ni “Laminwa Otiyo ki Baibul me Laro Kwo pa Ngat Mo.”

Wii opo ni, lanen-ni me tic pi Jehovah pi mwaki mapol ki dok me medde ki tic pire ki gen wa i kare-ni twero cuko cwiny jo mukene matek adada. Itye macalo lanen me diyo cwiny, dok itwero bedo ki gen ni ‘Lubanga wiye pe biwil i kom tic ma yam itiyo, kadi ki mar ma inyuto pire ki konyo jo pa Lubanga, ma pud itye ka konyogi bene wa i kare-ni.’—Ibru 6:10.

MEDDE KI KONYO JO MUKENE KIT MA ITWERO KWEDE

Kwed nyuto ni co ki mon muteggi ma gikonyo jo mukene gibedo ma komgi yot, gitamo tam oyotoyot dok gikwo pi kare malac.

Ngene kene ni, timo jami mabeco pi jo mukene pe bikwanyo pekki ma bino macalo adwogi me teggi. Ker pa Lubanga keken aye bicobo meno kun kwanyo gin ma weko watii dok wato—ma en aye bal ma walako ki bot Adam.—Rom. 5:12.

Kadi wa i kare-ni, timo gin ma Jehovah mito ni itim, calo konyo jo mukene me ngeyo Jehovah, twero jingo genni dok weko komi bedo yot. Wun jo muteggi, wunge ni Jehovah pwoyo tic ma wutimo pire dok lanenwu me niye obedo mot ma pire tek adada bot kacokke.