Lub Lanen me Mwolo pa Jehovah

1. Gin ango ma weko ibedo ki ur ka itamo i kom mwolo pa Jehovah?

KA ITAMO i kom lutela pa gamente ma i wi lobo-ni ducu, tika iromo waco ni gimwol? Iromo gamo ni pe gimwol. Ento Jehovah, ma obedo Won Twer Ducu-ni, obedo ngat mamwol. (Jab. 113:​5-8) Jami ducu ma Jehovah timo nyuto mwolo. En pe ki cwiny me awaka mo keken. I pwony man, wabineno yo angwen ma Jehovah terowa kwede dok wabineno kit ma mwolone nen kwede i yo angwen magi ducu. Wabineno bene kit ma Yecu olubo kwede lanen me mwolo pa Wonne. Nyamo jami magi bikonyowa me nyikke cok ki Jehovah ki me lubo lanen me mwolone i yo ma pud dong ber loyo.

JEHOVAH OBEDO NGAT MA LOK KWEDE YOT

2. Gin ango ma Jabuli 62:8 tittiwa i kom Jehovah? (Nen bene cal ma i .)

² Pol kare pe yot me lok ki ngat ma lawaka. Jo ma luwaka pol kare gitero jo mukene marac pien gitamo ni giber giloyo jo mukene dok meno weko dano lworogi. Man pat adada ki kit ma Jehovah tero kwede ki dano! En weko bedo yot botwa me lega bote dok mito ni watite parwa ducu. (Kwan Jabuli 62:8.) Kit macalo wego ma lamar mito ngeyo tam pa lutinone ki kit ma giwinyo kwede, Jehovah bene mito winyo legawa. Ki lok ada, en oweko kicoyo lega pa luticce mapol i Baibul. Meno nyuto ni lok kwede yot adada. (Yoc. 10:​12-14; 1 Cam. 1:​10-18) Ento ka i kare mukene wabedo ki lworo me lega bot Jehovah pi bal mogo ma watimo kono?

3. Pingo itwero bedo ki gen ni Jehovah mito ni ileg bote kare ducu?

³ Omyero waleg bot Jehovah kadi bed wawinyo calo en pe twero marowa. Pingo watwero wacone kit meno? I carolok pa Yecu i kom latin murwenyo-ni, Yecu oporo Jehovah ki wego ma lakica ma wode ma ongut-ti onongo winyo calo wonne pe bijolle ka edwogo cen paco. Ento gin ango ma wego meno otimo i kare ma wode odwogo cen paco? Yecu owaco ni i kare ma wego-ni oneno wode ki ka mabor, en “oringo okwako ngute, onoto leme.” (Luka 15:​17-20) Jehovah tye calo wego meno. Cutcut ka en owinyo lega pa jo ma cwinygi otur pi bal mo ma gutimo nyo par mo, en tero ite ka winyo lokgi. (Koko 3:​19, 20) Kica mako Jehovah adada i komwa dok calo wego ca ma oringo ka jolo wode-ni, en cuko cwinywa ni emarowa dok kweyo cwinywa bene. (Ic. 57:15) Jehovah ‘ringo botwa’ nining i kare-ni? En pol kare tiyo ki luelda, jo gangwa ki luremwa ma gimaro en me kweyo cwinywa. (Yak. 5:​14, 15) Jehovah miniwa kony ma kit man pien en mito ni wabed cok kwede.

4. Pingo onongo dano ginongo ni yot adada me lok ki Yecu?

⁴ Yecu olubo lanen pa Wonne. Calo Wonne, Yecu bene mwol. Macalo adwogine, i kare ma Yecu onongo tye i lobo, dano guwinyo agonya me bino bote. Dok pe gubedo ki lworo me penyo Yecu ki lapeny. (Mar. 4:​10, 11) Dok bene ka onongo en openyo tamgi i kom lok mo, onongo gititte kit ma giwinyo kwede kikome. (Mat. 16:​13-16) Medo i kom meno, kadi wa i kare ma gutimo bal, pe gubedo ki lworo ni Yecu bikeco i komgi. Onongo gingeyo ni Yecu lakica dok diyo cwinye. (Mat. 17:​24-27) Kit macalo Yecu olubo lanen pa Wonne macok adada-ni, oweko lulub kore gungeyo Jehovah maber adada. (Jon 14:9) Gubedo ki kare me neno ki bot Yecu ni Jehovah mwol dok mito ni gunyikke cok kwede, dok Jehovah pat adada ki lupwonye dinigi ma onongo giger dok gin luwaka-ni.

5. Pingo bedo yot bot jo mukene me lok kwedwa ka wabedo jo mamwol?

⁵ Watwero lubo lanen pa Jehovah nining? Ka wadongo cwiny me mwolo, ci bibedo yot adada bot jo mukene me bino ka lok kwedwa. Ka pe wamwol, nyeko twero cako makowa i kom jo mukene, watamo ni waber waloyogi dok pe watimigi kica ka gubalo. Ka watye ki kit magi, ci dano pe gibibedo ki miti me bedo cok kwedwa. Ento mwolo bikonyowa me bedo lukica, me diyo cwinywa i kom jo mukene ki me timmigi kica. Man bimiyo dano ginongo ni yot me bedo luremwa. (Kol. 3:​12-14) Luelda myero gutute me neno ni omege ki lumege me kacokkegi giwinyo agonya me lok kwedgi. Me timo meno, mitte ni luelda gumar bedo i kin utmege. Dong ka twerre, luelda myero gucit i cokke i Ot me Ker, ento pe gumar kubbe pi cokke ki i Zoom. Dok kare ducu, myero gutute me cito ka tito kwena kacel ki omege ki lumege i ot ki ot. Man biweko jo me kacokke gibedo ki kare me ngeyo luelda maber dok gibibedo agonya me lok kwedgi i cawa mo keken ma mitte.

JEHOVAH OBEDO NGAT MA NIANG

6-7. Mi kong labol mogo ma nyuto kit ma Jehovah oloko kwede tamme i kare ma luticce gulego bote.

⁶ Jo ma luwaka pol kare gitamo ni tamgi aye ber loyo dok pe giye loko tamgi. Ento Jehovah pe tye kit meno kadi bed en aye pud dong tye ki tam maber loyo. Nen kong kit ma Jehovah otero kwede ki Miriam lamin Moses. Miriam gin ki Aron, gubedo ka nguru i kom Moses, ma onongo obedo lawang Jehovah. I kare ma Miriam otimo meno, en onongo pe tye ka nyuto woro bot Jehovah. Macalo adwogine, Jehovah okeco matek adada i kom Miriam mumiyo en opwodo Miriam ki cwalo two dobo i kome. Ento Aron obako doge bot Moses ni okony lamingi ci Moses obako doge bot Jehovah wek ocang Miriam. Dong gin ango ma Jehovah otimo? Ngat ma lawaka onongo pe biye loko tamme, ento Jehovah oloko tamme ci ocango Miriam. Kit macalo Jehovah obedo ngat ma mwol, En owinyo kwac pa Moses.—Wel 12:​1-15.

⁷ Jehovah bene onyuto mwolo i kare ma owinyo lok pa Kabaka Kejekia. Jehovah ocwalo lanebi Icaya me waco ki Kabaka Kejekia ni en bito woko. Kejekia okok adada dok olego Jehovah ni ocange. Jehovah owinyo lega pa Kejekia ci owacce ni en bimedde ki kwo pi mwaki 15 mukene. (2 Luker 20:​1, 5, 6) Dong nen ka maleng ni, kica mako Jehovah adada i kom dano, pien en obedo ngat ma mwol dok tye atera me winyo legawa.

8. Labol mene ma nyuto ni Yecu niang adada? (Marako 3:​1-6)

⁸ Yecu olubo lanen pa Wonne. I kare ma Yecu tye i lobo, en otimo jami mabeco pi jo ma onongo gimito kony. Me labolle, Yecu ocango dano i nino me Cabat, dok meno obedo gin ma onongo lutela dini gineno calo obedo bal. Yecu onongo pe lagingi, ento onongo ngat ma lakica dok niang. (Kwan Marako 3:​1-6.) Kadi wa i kare-ni, Yecu pud nyuto niango kacel ki kica i yo ma en tiro kwede kacokke. Me labolle, ka ngat mo me kacokke otimo bal madit, en diyo cwinye i kom ngat meno, dok mine kare me timo alokaloka ma mitte.—Yabo 2:​2-5.

9. Watwero dongo kacel ki nyuto niango nining? (Nen bene cal.)

⁹ Watwero lubo lanen pa Jehovah nining? Omyero wapwonnye me tam kacel ki timo jami i yo ma nyuto niango calo Jehovah. (Yak. 3:17) Me labolle, lunyodo ma gilubo lanen pa Jehovah pe giketo gingi i kom lutinogi me timo gin ma kerogi pe twero. Labol pa lanyodo ma otimo man maber obedo Yakobo. En onyuto niango i kit ma otero kwede lutinone. (Acak. 33:​12-14) Lunyodo ma gimwol dok ginyuto niango omyero bene gugwokke ki bedo ka poro latin acel ki lawote. Luelda bene myero gunyut niango. Yo acel ma laelda twero timo kwede man aye ki cwako tam ma luelda luwote gumoko ka ce pe turo cik mo me Baibul. (1 Tem. 3:​2, 3) Dok wan ducu omyero watute me niang gin ma jo mukene gitamo ki kit ma giwinyo kwede kadi bed tamwa pat ki meggi. (Rom. 14:1) Ada, jo ducu me kacokke myero gutute wek ‘dano ducu gunge niango ma gitye kwede.’—Pil. 4:5.

JEHOVAH DIYO CWINYE

10. I yo mapatpat ango ma Jehovah onyuto kwede ni ediyo cwinye?

¹⁰ Twero bedo ni dong ineno ni jo ma gin luwaka cwinygi pe bedo yom ka mitte ni gukur gin mo pi kare malac. Awaka weko pe gidiyo cwinygi. Ento Jehovah pe tye kit meno. En diyo cwinye ma loyo ngat mo keken! Me labolle, i kare pa Nua, Jehovah owaco ni ebidiyo cwinye pi mwaki 120, ci dong i ngeye ebijwero jo maraco. (Acak. 6:3) Man omiyo ki Nua kare me pito lutinone ki dong kare me gero yeya kacel ki jo me gange. Lacen, Jehovah bene odiyo cwinye ka winyo lok pa Abraim i kare ma Abraim obedo ka penye lok i kom jwero Codom ki Gomora. Ka onongo Jehovah obedo lawaka, onongo en biwaco ki Abraim ni: ‘Itamo ni pe angeyo gin ma atye ka timone ce!’ Ento kit macalo Jehovah obedo ngat mamwol, en odiyo cwinye i kom Abraim.—Acak. 18:​20-33.

11. Kit ma kitito kwede i 2 Petero 3:​9, pingo Jehovah pud tye ka diyo cwinye wa i kare-ni?

¹¹ Jehovah pud tye ka medde ki diyo cwinye wa i kare-ni. En tye ka kuro kelo agikki i kare ma en omoko kikome. Pingo en tye ka diyo cwinye? “Pien en pe mito ni ngat mo orweny woko matwal, ento mito ni jo ducu guo i ningut.” (Kwan 2 Petero 3:9.) Tam kong: Pi mwaki magi ducu ma Jehovah obedo ka diyo cwinye-ni, oweko dano milion mapol gubedo ki kare me doko lureme. Dok watye ki gen ni dano milion mapol ata pud gibimedde ki doko lureme. Ento Jehovah pe bidiyo cwinye pi naka. Jehovah maro dano, ento en pe biye ni dano gumedde ki tiyo mitigi pi naka. En bijwero jo maraco woko.—Kab. 2:3.

12. I yo ma nining ma Yecu tye ka lubo lanen me diyo cwiny pa Jehovah?

¹² Yecu olubo lanen pa Wonne. Pi mwaki alip mapol, Yecu obedo ka lubo lanen me diyo cwiny pa Jehovah. Yecu oneno kit ma Catan onyayo kwede lok goba i kom Jehovah kacel ki dano ma lugen. (Acak. 3:​4, 5; Yubu 1:11; Yabo 12:10) Yecu bene oneno kit ma jo mapol gubedo ka deno kwede ki can malit. Go kong miti matek ma en tye kwede me “turo tic pa Catan woko”! (1 Jon 3:8) Pingo Yecu tye atera me kuro nio wa i kare ma Jehovah biwacce ni kare dong oromo me turo tic pa Catan woko? Tyen lok acel aye ni pien Yecu mwol. En ngeyo ni Jehovah keken aye tye ki twero me moko awene ma ebikelo iye agikki.—Tic 1:7.

13. I yo ma nining ma Yecu odiyo kwede cwinye i kom lukwenane, dok pingo en otimo man?

¹³ I kare ma Yecu onongo tye i lobo, en bene odiyo cwinye i kom lukwenane. Me labolle, i kare ma lukwena gubedo ka laro lok kom dito teretere, Yecu pe oilo cinge woko i komgi. Me ka meno, en omedde ki diyo cwinye i komgi. (Luka 9:46; 22:​24-27) En onongo tye ki gen ni gibipwonnye me bedo mwol calo en. Tika in bene itiko nwoyo timo bal mo teretere? Ka tye kit meno, ci nen calo itye ki pwoc madit adada me bedo ki Kabaka mamwol dok ma diyo cwinye.

14. Watwero dongo kit me diyo cwiny nining?

¹⁴ Watwero lubo lanen pa Jehovah nining? Wek watam dok watim jami calo Jehovah, bimitte ni wadong “tam pa Kricito.” (1 Kor. 2:16) Gin ango ma romo konyowa me niang tam pa Kricito? Yo acel ma pire tek me timo meno aye ki kwano teretere pwony ma i Baibul ma loko i kom kwo pa Yecu. Dok i ngeye, omyero wakwany kare me lwodo matut gin ma Yecu otimo, ki pingo en otimo gin meno. Dok bene mitte ni waleg Jehovah wek okonywa me bedo mwol kacel ki me diyo cwinywa calo Yecu. Ka wapwonnye me tam calo Yecu, ci wabibedo ki kero me lubo lanen pa Jehovah kun nongo wadiyo cwinywa i kom jo mukene.—Mat. 18:​26-30, 35.

JEHOVAH NENO JO MA RWOMGI LAPINY

15. Mi labol mogo ma nyuto ni Jehovah maro jo mamwol. (Jabuli 138:6)

¹⁵ Kwan Jabuli 138:6. Tam kong: Jehovah obedo Ngat ma rwomme dit loyo ducu i polo ki lobo, ento en neno jo mamwol! Nen kong labol mogo pa jo ma onongo rwomgi lapiny adada ento Jehovah onenogi. Jo mogo i kingi pe wangeyogi maber, ento Jehovah oweko kicoyo lok komgi i Baibul. Me labolle, Debora onongo obedo latic ma lagen ma otiyo i ot pa Icaka ki dok lacen i ot pa Yakobo pi mwaki ma romo 125 kulu! Kadi bed pe wangeyo lok mapol i kom dako ma lagen man, ento Jehovah oweko Moses ocoyo lok mo i kome ma nyuto ni Yakobo ki jo gange onongo gimaro dako-ni matek adada. (Acak. 24:59; 35:8 ki lok ma i tere piny.) Lacen i nge mwaki miya mapol, Jehovah oyero awobi mo ma lakwat ma nyinge Daudi me bedo kabaka me Icrael. (2 Cam. 22:​1, 36) I nge nywalo Yecu, Lubanga ocwalo lumalaika bot lukwat mogo ci ominigi deyo me bedo jo mukwongo me ngeyo ni Meciya dong kityeko nywalone i Beterekem. (Luka 2:​8-11) Dok i kare ma Yucepu ki Maliam gukelo Yecu i ot pa Lubanga, Jehovah omiyo ki Cimeon kacel ki Anna, ma onongo dong gutii woko-ni, kare me neno Wode. (Luka 2:​25-30, 36-38) Ada, “kadi bed Rwot [Jehovah] bedo malo ka mabor tutwal, pud neno jo mamwol ma lucan i cwinygi”!

16. Yecu olubo lanen pa Wonne nining i kit ma en otero kwede ki dano?

¹⁶ Yecu olubo lanen pa Wonne. Calo Wonne, Yecu bene onongo maro dano ma onongo kinenogi ni konygi pe. En opwonyo kadi wa ‘dano ata ma pe gukwano’ ki lok i kom Ker pa Lubanga. (Tic 4:13; Mat. 11:25) Yecu bene ocango lutwo dok otimo meno i yo ma omiyo guwinyo ni kimarogi dok kiworogi. (Luka 5:13) I dyewor me agikki ma peya kineke, Yecu olwoko tyen lukwenane, ma meno onongo tic ma opii aye timo. (Jon 13:5) Dok ma peya en odok cen i polo, en omiyo bot lulub kore ducu, kadi wa wan bene, tic ma pire tek loyo ducu—me konyo dano wek gunong kwo ma pe tum.—Mat. 28:​19, 20.

17. Watwero nyuto mar kacel ki woro bot jo mukene nining? (Nen bene cal.)

¹⁷ Watwero lubo lanen pa Jehovah nining? Wanyuto mar ki woro pi jo mukene ka watito kwena maber-ri bot dano ducu, labongo paro pi ka ma gia ki iye, kala del komgi, nyo rwom kwangi. Dok wanyuto mar kacel ki woro bot omegiwa ki lumegiwa kadi bed watye ki mot me tic i kacokke nyo watye ki diro me timo jami mogo i yo maber loyogi. (Pil. 2:3) Jehovah cwinye bedo yom i komwa ka wamwol dok watero jo mukene ki mar kacel ki woro i yo ma kititogi-ni.—Rom. 12:10; Jep. 3:12.

18. Pingo imito lubo lanen me mwolo pa Jehovah?

¹⁸ Ka watute matek me lubo lanen me mwolo pa Wonwa Jehovah, ci wabidoko jo ma lok kwedgi yot, ma giniang dok ma gidiyo cwinygi. Dok man bikonyowa me nyuto mar kacel ki woro bot jo mukene, kit ma Jehovah timo kwede. Wii opo ni, ka watimo jami ducu ma watwero me bedo mwol calo Lubangawa Jehovah, piwa bibedo tek adada bote!—Ic. 43:4.