Bok Me Lapeny

◼ Pingo mitte ni watii ki ryeko i Lok ma lubbe ki tic ki cim me kubu cokke?

Kacokke mapol dong gutyeko keto yub ni jo ma pe gitwero wire i Ot me Ker pi two ma odiyogi nyo peko mukene giromo kubbe ki cim me winyo yub me cokke ki paco. Me neno ni yub man okonyo jo magi, tic ki ryeko ki dok yubbe maber mitte. Pi man, luelda ma gidoro yub man myero gunen ni gulubo yo ducu ma mitte me tic ki cim wek ‘gutim gin mo ducu maber, dok kore ki kore.’—1 Kor. 14:40.

Luelda myero guket tek me tic ki yub man pi lutit kwena ma twogi pe cang nyo ma pe gitwero wot nyo a ki paco pi tyen lok mo. Latit kwena mo ma two odiyo nyo latin kwan me Baibul ma pe woto bene romo nongo ber pa yub man dok kiromo kwanogi i kin jo ma giwire i cokke. Ka ma lain me cim pe o iye, omyero kinen ni kiyubo gin mukene calo dwan ma kimako ki i cokke pi jo magi.

Man kono pe watwero porone ki adwogi maber ma wanongo ka watye i cokke. Ribbe kacel ki omegiwa ki lumegiwa weko wabedo ki kare me ‘cuko cwinywa kekenwa’ dok konyo jo manyen me bedo ki pwoc pi yub me cokke. Ka watye i cokkewa, watwero nongo pwony muromo ki i jami apora, luelda bene gitwero miyo botwa kony ka wamito, dok wanongo mar me ada ma a ki bot utmego. Man rwatte ki lok ma lamego mo ma oteggi oloko i nge ngat mo gwako kore i kare ma tye ka kato woko ki i Ot me Ker, en owacci: “Pe itwero nongo mot ma kuman ki i cim!”—Rom. 1:11, 12.

Calo Anna ma ‘onongo pe keng wire i ot pa Lubanga,’ i kare-ni, jo muteggi mapol bene gimaro wot i cokke kare ki kare ka yot komgi ye nyo gin mo mukene pe odiyogi. (Luka 2:36, 37) Ka gitye ka tic ki cim pien yo mukene pe, pe gitamo ni man dong oleyo ka wang cito i cokke i Ot me Ker. I lubu lanen maber pa jo muteggi, watute wunu matek me bedo tye i cokke kun wamedde ki woro Lubangawa, Jehovah.—Jab. 95:1-3, 6; 122:1.