Yub pi Jo me Ot—Cokke pa Lukricitayo

¹ Ka ibedo lanyodo ma Lakricitayo, nongo imito ni lutinoni gudong ma gimaro dok gitiyo pi Jehovah wek i agikkine gunong kwo ma pe tum i lobo manyen ma Lubanga ociko pire-ni. In itwero konyogi nining wek guket woro Jehovah obed gin ma pire tek loyo i kwogi? Yo acel ma pire tek aye lanen ma in inyuto. (Car. 20:7) Lamego mo oloko i kom lanen pa mine ma onongo obedo Lacaden ni: “Akalakala mo onongo pe ni gwok nyo wabicito i cokke nyo pe.” Man odonyo matut tutwal i kwone.

² Jo me oti mono giniang gin ma miyo cokke pa Lukricitayo bedo tye? Pwony ma wanongo i cokke magi miyowa kero me medde anyim ki timo miti pa Lubanga, kun ribbewa kacel macalo omego dok obedo gin ma cuko cwinywa mada. (Ic. 54:13; Rom. 1:11, 12) Ento tyen lok mumiyo cokke ma kit magi pire tek aye me miyo pak bot Jehovah “i dye lwakke ma gucokke.” (Jab. 26:12) Cokke pa Lukricitayo miyo botwa kare me nyuto marwa pi Jehovah kacel ki woro en.

³ ‘Bed ma wangi twolo’: Niang ni yub me cokkewa obedo gin maleng bimiyo ‘wabedo ma wangwa twolo’ dok weko pe doko kitwa me bedo ka keng cokke pi jami mogo ma pigi pe tego. (Ep. 5:15, 16; Ibru 10:24, 25) Ka i tye ka goyo yub me oti, iromo cako ki keto cawa me cokke pa Lukricitayo. Ento gwokke, pe iwek tic mukene dok obal woko. Nen maber ni cito i cokke obedo gin ma okwongo pi jo me oti.

⁴ Pe yomo cwinywa tutwal ka wakwano lok kom omegiwa ma gikanyo peko me cito i cokke kacel ki gure matino? Kadi bed ni jami ma diyo in pe dit tutwal, ento in bene olo irwatte ki ariya mogo. Catan tye ka miyo kwo me woro Jehovah tye ka doko tek medde ameda bot jo pa Lubanga. Kadi bed kit meno, bed ma cwinyi tek ni lutinoni gibiniang tutte pa jo me odi me cito i cokke pa Lukricitayo. I ada, ka itimo kit meno ci iromo miyo botgi mot me cwiny ma wigi pe biwil iye.