Tika Itye ka Tic Kwede Maber?
1 “Pe atwero galle me terone i tic me pwony!” Meno aye lok ma lamego mo acel ocoyo i nge kwano Watchtower me Januari 1, 2008. Tika dong ikwano pwony mogo makati kare ki kare i magajin ma kicoyo pi lwak-ki, dok tika inongo yo me terone bot jo mukene i ticci me pwony?
2 “Pwony ma Wanongo ki bot Yecu”: Oromo bedo ni gwok nyo inongo ni lok ma i iye konyi tutwal me cako kwano Baibul ki dano. Ka onongo peya itimo meno, tem kwano wi lok madit me pwony moni-ni bot rwod ot ci inyute ngo ma Yecu owaco ma dok i kom lok meno, kit ma kitito kwede i paragraf me acel. Ka rwod ot onyutu miti i acakki me rwattewu, ci temme me medde ki nyamo lokwu kun nongo wutiyo ki wi lok mogo ma gitye calo lapeny ma tugo cwiny. Leg ngat meno me lok i kom lapeny ma kiketogi-ni. Tit wiye wiye cal ma kubbe ki lapeny moni-ni, ci wumedde i paragraf ma lubu. Wuromo nyamo nucu pa pwony man i acakki me rwattewu ka dok wunyam nucune mudong-ngi ka idok cen. Yubbe me medde ki kwanwu i buk me Baibul Pwonyo.
3 “Lagony me Kwo me Ot me Yomcwiny”: Pwony man ma katti i nge dwe adek adek-ki, tye tutwalle me konyo wego, mege, kacel ki lunyodo i kit ma myero guti kwede ki cik ma iye lac me Baibul ka peko mo tye ma mito balo kuc me odigi. Iromo tic ki pwony man bene me konyo jo ma pe gubedo Lucaden me neno ryeko ma nonge i Baibul.—2 Tem. 3:16, 17.
4 Pwony pi Jo Matino: Lok ma wiye tye ni “Pi Jowa Matino” konyo ngat ma tye ka kwanone-ni me tam i kom lok moni ma en tye ka kwanone i Baibul-li. Iromo tic ki pwony magi me konyo bulu ma irwatte kwedgi i tic me pwony me neno ber pa kwano Lok pa Lubanga. (Jab. 119:9, 105) Ka itye ka lok bot lanyodo, iromo nyutu lok ma wiye tye ni “Pwony Lutinoni” ma katti i nge dwe acel acel-li. Pwony magi romo konyo lutino matino me nongo pwony ma pigi tego ma dok i kom jo mogo ma kicoyo lok komgi i Baibul. Tika dong ikwanyo kareni me kwano pwony magi kacel ki lutinoni?
5 Jami Mukene: Dwe ki dwe, pwony ma wiye tye ni “Lukwan Bukkewa Gipenyo” gamo lapeny mogo ma jo ma pe gubedo Lucaden guromo penyone. Iromo nyutu pwony man ka itye ka nyutu magajin i ot ki ot. Pwony ma wacci “Waraga Mua ki . . .” miyo ripot ma nyutu pekki mogo ma lumiconari kacel ki jo mukene gitye ka rwatte kwede i ticgi me pwony. Pwony magi romo konyo jo ma gitye ki miti me nenone ni kwena maber-ri kitye ka titone i twok lobo ducu, kun cobo lanyut ma nyutu tye pa Kricito.—Mat. 24:3, 14.
6 Pwony ma katti dwe ki dwe ma wiye tye ni “Nyik Cok bot Lubanga,” ma jenge i kwano Baibul pi Cukul me Tiokraci-ni, bicuko cwiny jo ma gitye ki miti me pwonyo lok mapol ma dok i kom Jehovah. Pwony ma kati kingwen i mwaka acel acel ma wiye wacci “Lub Lanengi me Niye,” kicoyo me konyo dano me goyo cal jami mutimme i Baibul, man weko cal jo ma giloko i komgi i Baibul, kwogi, pekki ma gukato ki iye, ki niyegi bino i wiwa.
7 Cwinywa pud dong yom me nongo pwony ducu me Watchtower dwe ki dwe ma kicoyo me konyowa i tic me pwony! Pi meno omyero dong watute wunu me kwano lok ma tye iye ducu wek watiyu kwede maber i tic me pwony.