Pwony ma Konyowa i Ticwa me Pwony
1. Pwony ma wi lokke tye ni, “Nyamo Lok i kom Pwony me Baibul” tye ki tyen lok aryo mene?
1 Kare ki kare Watchtower ma kiyubo pi lwak tye ki pwony ma wi lokke tye ni, “Nyamo Lok i kom Pwony me Baibul.” Pwony man tye ki tyen lok aryo—me tito pwony me Baibul i yo ma tugo miti, ki me nyutiwa kit me nyamo wi lok mogo ki diro. (1 Pet. 3:15) Waromo tic ki pwony magi i yo maber nining?
2. Waromo tic ki pwony magi i ticwa me pwony nining?
2 Ti Kwede i Tic me Pwony: Itwero gwoko kopi mogo me Watchtower ma tye ki pwony magi. Ka rwod ot, ngat ma onyuto miti, nyo latin kwan me Baibul openyo lapeny nyo okelo pyem i kom lok mo ma kinyamo i pwony magi ci itwero miye kopi ma mege wek wunyam kacel. Ka ipeke ki kopi me magajin ma tye ki lok meno, ci itwero kwanyone ki i kabedowa me Intanet me jw.org.
3. Waromo nyamo pwony acel i kin magi ki rwod ot nining?
3 Itwero nyamo pwony man ki ngat mo nining? Jo mogo gipenyo rwod ot ni okwan lok pa jirani ki dwan malongo, ci gin gikwano lok pa Lacaden. Gunongo ni yub man me nyamo lok ma kicoyo calo goga-ni tiyo maber adada pien weko dano gingiyo jami ma waye iye i yo ma pe kelo lworo.—Nwo. 32:2.
4. Watwero tic ki pwony magi me pwonnye kekenwa nining?
4 Nong Pwony dok Ipwony Jo Mukene: Ka itye ka kwano pwony magi, ket cwinyi i kom ginacoya, cal, ki ryeko me nyamo lokke kikore. Go kong dwan ma kitiyo kwede me nyamo pwony meno. Ka itye i tic me pwony, in bene ti ki yo acel-lu. (Car. 1:5; 9:9) Lamego mo owacci, “Kwano pwony magi obedo calo pwonyo kit me tito kwena ki bot painia ‘ma pe ki roc’—ngat ma kare ducu ngeyo kit me dok i lapeny ki lagam matir!”
5. Watwero konyo lutino kwanwa me Baibul me yubbe pi tic me pwony nining?
5 Wutwero bene tic ki lanen magi me konyo lutino kwanni me Baibul me yubbe pi tic me pwony. Wukwan lokke kacel, kun iweko latin kwanni bedo latit kwena. Kit meno latin kwanni me Baibul bipwonyo diro me tito niyene bot jo mukene i yo maber. (Kol. 4:6) I ada, pwony magi gubedo yo acel ma Jehovah tiyo kwede me konyowa me ‘cobo ticwa ducu kakare.’—2 Tem. 4:5.