Pwony mo Manyen me Cako Kwano Baibul ki Dano
1. Pwony manyen ma lubbe aluba ango ma bikatti i Watchtower ma kiyubo pi lwak-ki, dok kiyubo pingo?
1 I dwe manyen, pwony manyen ma lubbe aluba bikatti i Watchtower ma kiyubo pi lwak-ki ma bikonyowa me cako kwano Baibul ki dano. Wi lokke tye ni “Nong Pwony ki i Lok pa Lubanga.” Kadi bed ni jo mogo me wang ticwa gibinongo mit pa kwano pwony acel acel, ento pwony man kiyubo me anyama.
2. Jami ma i pwony man bibedo nining?
2 Kit ma Bibedo Kwede: Wi lok madit ki matino kiketogi macalo lapeny pi penyo rwod ot i kare me nyamo lok. Ginacoya ma pigi tego kicimogi, ento pe kiketogi, wek rwod ot obed ki yomcwiny me kwanogi atir ki i Lok pa Lubanga. Paragraf ma i iye gicego ma weko gitwero kwanone cut ki i nyim doggola. Pwony acel acel kubbe ki buk me Baibul Pwonyo pi konyi me loko kwanwu i buk meno ka opore.
3. Ka itye ka wot i doggola ki doggola, iromo tic ki pwony manyen-ni me cako kwano Baibul ki i nyim doggola nining?
3 Kit me Tic Kwede: Ka itye ka miyo magajin iromo penyo lapeny ma tugo miti i kom lok ma tye i pwony ma tye. Me laporre, Watchtower me Januari 1 loko i kom kit ma Baibul pire tek kwede. Iromo penyo ni: “In ineno Baibul calo Lok pa Lubanga nyo calo buk mo maber aye? [Mine kare wek ogam.] Tye gin mo ma pire tek i lok man.” Cim lapeny me acel, kwan paragraf me acel, dok yab ginacoya ma kicimo. Nwo kwano lapeny doki, ci peny rwod ot pi lagamme. Wukwan madwong kit ma wutwero kwede, kun wutiyo ki lapeny ma kiketo nambagi macalo gin me nyamo lok. Ma peya ia, nyutte lapeny ma lubo meno ma kiketo nambane ci ket yub me dwogo cen pi nyamone. Temme me dok cen pi nyamo lok ma iye cabit ducu nio wang ma ikelo Watchtower mukene. Yo mukene aye me penyo rwod ot atir pi cako kwano Baibul kwede. Ti ki pwony me magajin meno me nyuto kit me kwan.
4. Waromo tic ki pwony man manyen-ni ka watye ka dok cen nining?
4 Iromo bene tic ki pwony man manyen ma lubbe aluba-ni bot jo ma icwalo botgi magajin kare ki kare ki jo mogo ma idok cen botgi. Iromo wacci: “Tye gin mo manyen i Watchtower. Wek kong anyutti kit me tic kwede.” Obedo legawa ni pwony man manyen ma lubbe aluba-ni okony dano mapol wek “gunge lok me ada.”—1 Tem. 2:4.