Yub Manyen me Gure me Nino Acel

Wi lok madit me gure me nino acel pi mwaka me ticwa 2009 tye ni ‘Myero Inen ni Icobo Tic me Pwony ma Igamo,’ ma jenge i Jo Kolocai 4:17. Macalo Lukricitayo, watero kwac meno calo gin ma pire tek. Mitiwa tye me cobo ticwa ki gen kit ma Yecu otimo kwede-ni. (Jon 17:4) Lakwena Paulo bene onyutu lanen maber adada botwa i yo man. En omoko tamme me cobo ticce me pwony.—Tic 20:24.

Pwony ma laneno me adwol bimiyone binyutu kit ma lutit kwena mapat pat gitye ka kato kwede ki i pekki mapol i tic me pwony. Ka dok pwony ma lubu meno ma wiye tye ni “Mi Gin ma Ipito Odong” binyutiwa kit ma watwero konyo kwede “jo ducu ma myero gunong kwo ma pe tum.” (Tic 13:48) Lalok ma bibino ka lim binyamo buk pa 2 Jo Korint 6:1-10 tyeng ki tyeng, i pwony ma wi lokke tye ni “Kit ma Wanyuto Berwa Kenwa Macalo Lutic.” I otyeno, wi lok me pwony ma en bimiyo bot lwak tye ni “Ter Ticci me Pwony Calo Gin ma Pire Tek.” Ibinongo lok me cuko cwiny ki i pwony ma wi lokke tye ni “Jo Matino ki Madito Ginongo Mit pa Tic me Pwony” ki “Bulu ma Gicobo Ticgi me Pwony.” Jo ma mito nyutu dyeregi ki nongo batija i gure me nino acel ki gure me adwol myero guniang wonkom pa luelda cutcut. But yubwa ma pire tek i gure matino kacel ki madito obedo nyamo Watchtower. Nen ni ibino ki Watchtower ma kibikwanone i cabit me gure man.

Ka wamito cobo ticwa maber, omyero wanen ni watute matek wek miti kacel ki tic mukene-ni pe okwany cawawa ki i timo gin ma pire tek ma Jehovah omiyowa. Cuko cwiny ma a ki i Ginacoya ma kibinyamogi i gure me nino acel man myero okony wan ducu me niang gin ma myero watim wek waket cwinywa i cobo gin ma watye ka timone i ticwa me pwony.