Yub Manyen me Gure me Adwol

Twere nining me cung matek i kom jo ma gideg woro me ada? Wan watwero loyo yelle pa Catan me dwokowa cen i lobo ma pe lworo Lubanga nining? Yub me gure me adwol pi mwaka me ticwa 2009 bigamo lapeny magi ma pigi tego-ni. Wi lokke madit tye ni “Wulo Gin Marac ki Timo Gin Maber.” (Rom. 12:21) Magi aye wi pwony mogo ma kibimoyogi.

Laneno me distrik bimiyo pwony magi “Kimiyowa teko me Loyo Gin Marac ki Timo Gin Maber,” “Gwokke ki Keto Gen Mukato Kare i Komi Keni!,” “Tim Maraco Ducu Dong Cok Gik!,” ki “Jingo Niyewa pi Loyo Lobo.” Laneno me adwol biminiwa pwony magi ‘Man Aye Dong Kare me Bedo ma Wangwa Twolo!,’ pwony man jenge i Jo Roma 13:11-13, ki ‘Pe Ibed ma Cwinyi Otur i Kare me Ayelayela,’ pwony man jenge i Carolok 24:10. Wabiwinyo pwony mukene pa laneno me adwol ma wi lok tye ni “Kop ma Mako Adwolwa.” Pwony mukene ma bene tye me cuko cwiny aye “Mono Itwero ‘Timo Tic me Pwony Man’—Macalo Painia?” Pwony ma kipoko iye mukwongo wi lokke tye ni ‘Wucung Matek Wek Wulo ki i Roro pa Larac-ci.’ Pwony man bikonyowa me ngeyo ki dok kwero tim pa Larac ma lubbe ki diro me tet me kare-ni, lok me galowang, ki kwan. Pwony ma kipoko iye ma wi lokke tye ni “Nong Teko me Cung Matek i Kare Man Marac-ci” binyutiwa kit me tic maber ki tira ma nonge i Jo Epeco 6:10-18.

Kubbe tye i kin loyo gin marac cakke ki i lwite ki tito kwena me Ker-ri. (Yabo. 12:17) En aye omiyo Catan pe tye ka ol ki lweny i kom Lucaden pa Jehovah! (Ic. 43:10, 12) Ento Larac-ci pe biloyo lweny pien dong wamoko tamwa me loyo “gin marac ki timo gin maber.” Ket yub ma pe tur me nongo kony ki i pwony ducu me gure me adwol man.