‘Cam i Kare ma Mitte Kikome’
1. I yo ma nining ma yub me gure me nino acel me kareni tye me kony boti ki bot jo mukene?
1 I nge bedo i gure me nino acel, pol kare wawacci, “Man en gin ma onongo wamito kikome!” Laneno me adwol mo omiyo ripot ni i nge yub me gure me nino acel, jo ma gitye i adwolle gucako bedo ki miti me medo ticgi me pwony. Laneno acel ma woto awota owacci, “Yub man okonyowa me bedo ki wang ma twolo tutwal i kom kare ma dong watye iye-ni kun wayero jami ma pigi tego i kwo.” Laneno mukene doki owacci, “Lutit kwena mapol guwacci yub man obedo calo gin ma poyo wigi me keto tamgi i tic me tito kwena ma en aye dong gin ma pire tek loyo.” Yub me gure man okonyi nining?
2. Pwony ango ma wabinyamogi i yub me gure me nino acel pi mwaka ma bino-ni?
2 Yub me gure me nino acel pi mwaka ma bino-ni bene bibedo gin ma wamito kikome. Wi lokke madit tye ni ‘Wek Jehovah Obed ka Larreni,’ ma kikwanyo ki i Jabuli 118:8, 9. Magi aye pwony mogo ma kibinyamogi: “Kit ma Jehovah Obedo Cel Gogo Matek i Kare me Peko,” “Kony Dano me Nongo ka Larre i Te Bwom Jehovah,” “Lub Lanen pa Jehovah i Bedo ka Larre,” “Jo Matino, Wuket Genwu i Kom Jehovah!” ki “Ka Larre ma Jehovah Miyo Aye Paradicwa me Cwiny.”
3. Ngo ma myero watim wek wanong adwogi maber ki i gure man?
3 Me Nongo Ber pa Yub Man: Ka kitito nino dwe ma yub man bibedo iye, cak yubbe me bedo tye iye cut, dok ilwong lutino kwanni me Baibul wek gubin ka winyo pwony man. Wek wan bene ‘wanyak nyig kun wadiyo cwinywa,’ myero wiwa opo i kom pwony ma wawinyo. (Luka 8:15) Ter iti ka kimiyo pwony, dok ico piny lok ma pigi tego kacel ki pwony mogo ma imito tic kwede i kwoni ki pi ticci me pwony. Kwany kare me nyamo ngec magi ki jo me odi i nge yub me gure, kun wuneno yo mapat pat mukene ma wuromo tic kwede ki pwony calo jo me ot.
4. Pingo myero wabed ma wakuru yub me gure me nino acel me mwaka ma bino-ni?
4 Calo dek ma kitedo mamit ma pito kom, yub me gure me mwaka-ni kiyubo ki mar dok ma kitamo iye matut. Walego ni Jehovah ogo laane i kom tuteni me bedo tye ki me nongo mit pa ‘cam i kare ma mitte kikome’ me pito Lukricitayo i yo me cwiny.—Mat. 24:45.