Yub Maber Atika pi Mwaka Manyen me Ticwa
1. Kit yub ango ma waromo tamo pire pi mwaka manyen me ticwa?
1 Omyero waket yub mo olo ka ce wamito dongo i yo me cwiny. Yub ango ma in dong iketo pi mwaka manyen me ticwa? Yub maber loyo aye me tic calo painia pi tutunu pi dwe acel nyo makato. Kit macalo tic me yomcwiny ma kit man mito yubbe con-ni, man aye dong obedo kare maber me cako tamo pire. Pingo omyero iket tic calo painia pi tutunu obed macalo yubbi?
2. Pingo omyero waket tic calo painia pi tutunu obed macalo yubwa?
2 Tyen Lok me Tic Calo Painia pi Tutunu: Tic calo painia pi tutunu miyowa kare ‘maber tutwal’ me yomo cwiny Wonwa me polo pien watero cawa malac i tic me pwony. (1 Tec. 4:1) Ka watamo i kom jami ducu ma Jehovah otimo piwa, cwinywa terowa me tito pire bot jo mukene. (Jab. 34:1, 2) Jehovah neno dok tero dyerewa me medo ticwa i tic me pwony calo gin ma pire tek. (Ibru 6:10) Ngeyo ni watye ka yomo cwiny Jehovah ki ticwa matek keliwa yomcwiny madit.—1 Tekwaro 29:9.
3, 4. Kit kony ango ma wanongo ki i tic macalo painia pi tutunu?
3 Pol kare ka itiyo tic moni teretere, ci timone doko yot dok mit. Cwalo cawa malac i tic me pwony biweko ibedo ki tekcwiny ka itye ka pwony i doggola ki doggola. Ibibedo ki diro i kit me cako lok wa ki tic ki Baibul bene. Ka itito niyeni teretere, ci niyeni bijing doko matek. Jo mapol ma onongo pe gitye ka kwano Baibul ki dano gubedo ki kare me cako mo olo i kare me ticgi calo painia pi tutunu.
4 Tic calo painia pi tutunu romo tugu cwinywa ka onongo ticwa okwe woko. I kare ma omego mo ma onongo kong obedo painia marii oniang ni etye ka keto tamme ducu i dog ticce, ci odonyo i tic macalo painia pi tutunu pi dwe acel. En owacci: “Pe onongo atwero ye kit ma dwe acel ca oweko ajing kwede i yo me cwiny! Aketo yub me medde ki tic macalo painia pi tutunu, ma meno oweko adoko painia marii odoco.”
5. Waromo lweny ki tam man ni pe watwero-ni nining?
5 Lweny ki Ariya ma Tye: Jo mukene gilworo bedo painia pi tutunu pien gitamo ni gipe ki diro me pwony. Ka man aye tye ka gengi, ci Jehovah romo konyi kit ma en okonyo ki Jeremia. (Jer. 1:6-10) Kadi bed ni Moses onongo ‘ywayo lok mot dok te lebe odwalle woko,’ ento Jehovah otiyo kwede me cobo mitine. (Nia 4:10-12) Ka itamo ni pe itwero, leg bot Jehovah pi tekcwiny.
6. Twere nining me bedo painia pi tutunu kadi bed ni nongo watye ki peko me yot kom nyo ticwa dwong?
6 In mono pe imito pongo fom pien itye ki peko me yot kom nyo ticci dwong? Ka itye ki goro, tic i yo ma rwatte ki keroni romo weko tic calo painia pi tutunu twere. Ka ce ticci dwong, iromo diro kare me timo jami mogo ma pigi pe tego i dwe mukene. Jo mogo ma gitiyo pi kare malac olo gukwanyo kare me bedo painia pi tutunu ki nongo yweyo me nino acel nyo aryo.—Kol. 4:5.
7. Pingo bedo ber me keto lok madok i kom tic calo painia pi tutunu i lega?
7 Kit me Timone: Ket mitini me bedo painia pi tutunu i lega. Peny Jehovah wek ogo laane i kom tuteni me medo ticci me pwony. (Rom. 12:11, 12) En romo konyi me moko tam me ryeko i kit me loko yubbi. (Yak. 1:5) Ka mitini nok ci peny Jehovah wek okonyi me nongo yomcwiny i tic me pwony.—Luka 10:1, 17.
8. Keto Carolok 15:22 i tic twero konyi nining me tic calo painia pi tutunu?
8 Wunyam lok i kom yubwu me tic calo painia pi tutunu macalo jo me ot. (Car. 15:22) Gwok nyo ngat acel romo tic calo painia pi tutunu ki kony pa jo mukene-ni. Lok ki jo mukene ma i kacokke pi mitini me tic calo painia, tutwalle jo ma kit me kwogi rom ki meri. Man twero medo mitini me tic calo painia pi tutunu.
9. Dwe mene ma iromo yerone me tic calo painia pi tutunu?
9 Ka ineno yubbi ma iketo pi mwaka manyen me ticwa, awene ma itamo ni iromo tic iye calo painia pi tutunu? Ka itiyo pi cawa malac nyo iwoto i cukul, iromo tamo pi dwe mogo ma nongo tye ki nino me yweyo nyo Ceng Abicel nyo Ceng Cabit abic kulu. Me labolle, Sektemba, Decemba, Marci, ki Agucito tye ki Ceng Abicel ki Cabit abic kulu. Dwe me Mai tye ki Ceng Abicel abic, ki Juni tye ki Ceng Cabit abic kulu. Ka itye ki peko me yot kom, tam pi dwe ma nongo pinye calo lyetogi-ni nongo tye maber. I romo tic calo painia i dwe ma nongo laneno me adwol tye ki yub me limo kacokkewu. I kare me limme, ibibedo ki kare me bedo i nucu cokke pa painia marii. Kit ma nino me Nipo bipoto i Marci 22 me mwaka manyen-ni, Marci, April, kacel ki Mai bibedo dwe maber atika me tic calo painia pi tutunu. Ka dong iyero dwe acel nyo makato ma imito ni iti iye calo painia pi tutunu, ci cak dong coyo yubbi ma bikonyi me cobo cawa ma mitte.
10. Ngo ma iromo timone ka ce pe itwero tic calo painia pi tutunu?
10 Kadi bed itamo ni pe itwero tic calo painia pi tutunu i mwaka manyen me ticwa, pud iromo tic ki mit kom i tic me pwony. Medde ki timo gin ducu ma iromo timone i tic me pwony, kun igeno ni cwiny Jehovah bibedo yom pi tute ki tekoni ducu i ticce. (Gal. 6:4) Mi cwak dok icuk cwiny jo ma giromo tic calo painia pi tutunu. Nyo iromo loko yubbi me nywako i tic me pwony ki jo ma gitye ka tic calo painia i nino ata-ni.
11. Pingo myero wabed ki tam ni kare dong odic woko?
11 Jo pa Jehovah giniang ni kare dong odic woko. Tic pud tye ma myero kicob, tic me tito pi kwena maber-ri. Kwo pa dano tye ka mading, kare ma odong-ngi nok adada. (1 Kor. 7:29-31) Mar pi Lubanga ki pi luwotwa cwalowa me timo gin ducu ma watwero i tic me pwony. Ka watute dok wayubbe maber ci olo wabiromo tic calo painia pi tutunu pi dwe acel mo i mwaka manyen me ticwa, man obedo yub maber atika!