Bok Me Lapeny

◼ Ngec Ango ma omyero kiket i ka keto ngec pi kacokke?

Ka keto ngec ma tye i Ot me Ker-ri miyo ngec pi tic ma kwako kacokke. Pe omyero kiket ngec mo keken kunnu labongo nongo twero ki bot wonkom pa luelda.

Jami mogo ma kiketogi kunnu kare ki kare aye: Yub me Cokke me Ticwa ki Cukul me Tiokraci kacel ki jo ma bimiyo pwony ma tye i igi, wi lok me pwony ma kiyubo pi lwak, nying wonkom me Cokke ma Kiyubo pi Lwak ki nying lukwan Watchtower, kabedo me Cokke me Kwano Buk ki nying jo ma i iye, ngec ma mako bino pa laneno me adwol kacel ki ngec pi gure matino ki madito ki dong yub me tic i Ot me Ker. I kare mukene, kiniango luelda me keto waraga nyo jami mogo bene iye. Ka gin mo ma pe kwako kacokke tye ma mitte ni myero kiket i ka keto ngec, ci luelda aye gimoko ka ce rwatte me aketa kunnu.

Kadi bed ni kiromo miyo lok angeya macek i kom nyom mo ma bitimme i Ot me Ker i cokke mo acel, ento lok angeya me nyom pe myero kiket i ka keto ngec. Dok pe pore me keto lok angeya madok i kom namo mogo ma nongo kiyubo, kit macalo man nongo pe obedo tic me kacokke-ni.—Nen Watchtower me April 15, mwaka 1984 pot karatac 15; Kingdom Ministry me Juni 1975 pot karatac 4, ki Mai 1970, pot karatac 8.

Ka keto ngec omyero kigwok obed maleng dok ma nen mwonya. Omyero obed malac ma romo keto jami ma kiloko pigi kany-nyi. Ngec mogo ma dong lokke okato woko kacel ki mogo ma dong jo me kacokke gutyeko kwanone omyero kikwanygi woko. Ka kacokke makato acel giribo ot me cokke acel, ci kacokke acel acel myero obed ki ka keto ngecgi pigi kengi nyo bute mo ma nongo kinyutu woko maleng. Wamiyo tam ni wonkom pa luelda nyo ngat mo ma en ocimo obed ka ngiyo ka keto ngec kare ki kare me neno ni jami ma giketo iye nongo pud mitte, tye ma oporre dok tye maleng.