Gin Mumiyo Watiko Dok Cen Teretere
1. Lapeny ango ma bino ma lubbe ki ticwa me pwony?
1 I kabedo mapol, kinwoyo tic i wang tic teretere. Pud kimedde ki dok cen i odi magi teretere, kadi bed ni nongo rwed ot owaco ni pe etye ki miti. Pingo pud wamedde ki dok cen bot jo ma nongo pe gujolo lokwa i kare mukato angec?
2. Tyen lok ma pire tek ango ma weko wadiyo cwinywa i tic me pwony?
2 Mar pi Jehovah ki pi Dano: Tyen lok ma pire tek ma omiyo wadiyo cwinywa i tic me pwony aye obedo marwa pi Jehovah. Cwinywa cwalowa me medde ki tito lok i kom Lubangawa bot jo mukene. (Luka 6:45) Marwa pi Jehovah terowa me lubu cikke ki dok konyo jo mukene bene me timo en gin acel-lu. (Car. 27:11; 1 Jon 5:3) Diyo cwinywa i tic man pe jenge i kom kit ma dano gijolowa kwede. Kadi wa i kare ma kibedo kaunu Lukricitayo me cencwari me acel, gin gumedde ki pwony ‘kun pe giweko.’ (Tic 5:42) Ka dano gukwero winyowa, me ka weko man turu cwinywa, wacung matek, kun wanyutu marwa matut kacel ki dyerewa bot Jehovah.
3. Mar pi dano bikonyowa nining me medde ki tic me pwony?
3 Wadiyo cwinywa bene pien wamaro luwotwa. (Luka 10:27) Jehovah pe mito ni kityek ngat mo wacel. (2 Pet. 3:9) Kadi wa wang tic ma nongo kitiyo teretere, pud wamedde kinongo jo ma gimito tic pi Jehovah. Me labolle, i lobo Guadeloupe ka ma i kom dano 56 nongo 1 obedo Lacaden pa Jehovah-ni bene i mwaka mukato-ni dano 214 kulu gunongo batija. Cokcok dano ma romo 20,000 kulu gubedo tye i kwero Nipo, ma meno bedo dano 1 i kom 22 pa wel dano ma i lobo Guadeloupe!
4. I yo ma nining ma wang tic lokke kwede?
4 Alokaloka i Wang Tic: Dano ma gibedo i wang ticwa bedo ka lokke kare ki kare. Ka wadok cen i nino mukene ka ma nongo pe kijolowa iye maber, waromo nongo dano mo me paco meno ma nongo pat ki ma jwi wanongogi-ni, twero bedo ni en nongo peya owinyo kwenawa ci romo jolowa dok winyo lokwa. Nyo waromo nongo jo mapat ma gitye ki miti ma nongo gudonyo nyen i ot moni-ni. Lutino ma lunyodogi ger i komgi ka gudongo ci gia woko ki gang. Jo ma kit meno guromo bedo ki miti me winyo kwena me Ker-ri.
5. Ngo ma oweko dano mogo gucako jolo lokwa?
5 Dano bene lokke. Lakwena Paulo kong obedo ‘layet, laket ayela dok labal nying.’ (1 Tem. 1:13) Kit meno bene, jo mapol ma gitye ka tic pi Jehovah i kare-ni kong onongo pe gubedo ki miti i lok me ada. Jo mukene bene kong oromo bedo ni gukwero lok me kwena maber-ri i kare mo. Kit ma kwo lobo woto ki lokke, jo mukene ma nene kong gukwero nyo pe gunyutu miti gicako winyowa. Jo mukene gicako jolo lokwa i yo nge limo peko, calo to pa danogi mo, rwenyo dog ticgi, can cente, nyo peko me yotkom.
6. Pingo omyero wamedde ki tic me pwony ki mit kom?
6 Jami me kare-ni dong tye ka bino i agikkine, ento ticwa me tito kwena ki pwonyo dano tye ka medde ameda. (Ic. 60:22) Pi meno, wamedde wunu ki pwony ki mit kom kun watute me bedo ki cwiny matir. Ngat mukene ma wabiloko kwede oromo ye winyowa. Mitte ni omyero wamedde ki lok! ‘Ka watimo man ci wabilaro kwowa wa ki kwo pa jo ma winyowa.’—1 Tem. 4:16.