Bok Me Lapeny

◼ Adwogi marac ango ma bino pi tic ki Intanet me kubbe ki ngat mo ma pe wangeyo?

Kityeko yubo Intanet i yo ma miyo dano twero kubbe i kingi i yo mapol. Miyo kare ki dano me cwalo lok i komgi, ma man twero bedo calgi kacel ki ngec mukene madok i komgi. Dano ma gineno cal dok gikwano lok i kom jo magi bene giromo kubbe kwedgi. Jo matino gimaro yo man mada, dok bulu mogo i kacokke gitiyo kwede me kubbe ki jo mogo ma giwaco ni gibedo Lucaden pa Jehovah.

Bedo yot tutwal bot ngat ma wakubbe kwede ki i Intanet me bwolowa i kom kit dano ango ma en ebedo, watte ki Jehovah nyo miti ango ma en tye kwede. (Jab. 26:4) Ngat moni ma nongo tye ka wacci en ebedo Lacaden pa Jehovah twero bedo dano ma pe oye, ngat ma kiryemo woko ki kacokke, nyo ngat ma ongak woko ki i diniwa. (Gal. 2:4) Ripot nyutu ni co ma cwinygi terogi me buto ki lutino matino gitiyo ki Intanet me yenyo lutino magi.

Kadi bed ni wangeyo maber ni jo ma wakubbe kwedgi-ni gitye ki lanen maber i kacokke, ento kubbe kwedgi i yo ma kit man romo terowa i jami mogo ma pe tye atir. Man timme pien dano pe gilworo jo ma nongo peya gurwatte kwedgi. Gin guromo tamone ni kubbe ma kit man gire bedo i mung dok ni lokgi-ni pe bingene bot lunyodogi nyo luelda. Gin marac loyo aye ni bulu mapol ma gia ki gangi pa Lukricitayo bene gumoko i owic man dok gudonyo i tic ki leb macilo. (Ep. 5:3, 4; Kol. 3:8) Mukene giketo calgi ma nongo nenone cilo, kun gitiyo ki nying mogo ma pe megi, nyo ma kubbe ki wer mogo macilo me video.

Pi meno, lunyodo myero gubed ka ngiyo ngo ma lutinogi timo ki computa. (Car. 29:15) Bedo rac mada me lwongo dano mo ata ma pe wangeyo i gangiwa nyo me weko ni en obed ki lutinowa i gang kene. I yo acel-lu, rac mada bene botwa nyo lutinowa me mako lurem ki ngat mo ata ma pe wangeye ki i Intanet kadi bed giwaco ni gin gibedo Lucaden pa Jehovah.—Car. 22:3.