Tit Lok me Kwena Labongo Wekone
1 I cawa mukene, waromo tamone ni wang ticwa dong kityeko tiyone teretere ento pe onyako nyige ma konyo. Kadi bed kit meno, watye ki tyen lok madit tutwal me medde ki tito lok me kwena.—Mat. 28:19, 20.
2 Pi Miyo Caden: Yecu oloko con ni tic me tito kwena me Ker-ri bibedo but lanyut ma pire tek ma cimo ‘agikki me yub me jami me kare-ni’ dok ni kibitimone pi ‘miyo caden bot rok ducu.’ (Mat. 24:3, 14) Ka dano ginenowa i tic me tito kwena maber me Ker-ri, meno miyo caden madit adada. I nge weko kabedo meno, jo mukene guromo lok pi limowa-ni pi cawa malac nyo pi nino mapol, kadi bed gukwero winyo kwenawa. Niang tyen lok mumiyo watimo ticwa me pwony-nyi jingo cwinywa me medde anyim. Wayomo cwiny Jehovah ka wanywako i cobbe pa lok pa lunebi me Baibul ki miyo caden kacel ki ciko dano pi kare me jwero lubal.—2 Tec. 1:6-9.
3 Diyo Cwiny Mitte: Kit macalo jami ma wiro tam pa dano tye mapol dok polgi mito cawa mapol-li, diyo cwiny mitte ki botwa ka ce wamito ni wadong mitigi. Kibedo ka limo dako mo acel i cabit ducu pi mwaka acel kulu kun en kwero woko ka dong oye jolo Lucaden i pacone pi nyamo lok me Baibul. Lok ma en owinyo oyomo cwinye matek ma omiyo en oye kwano Baibul, ocako wot i cokke, ci ma peya kare okato mabor en onyutu mitine me nongo batija.
4 Jami me lobo-ni tye ka lokke oyotoyot, kadi cwiny dano bene. Jo mapol ma gubedo ka kwero jolowa i kare mukato angec, i kare-ni dong guromo jolo kwena me gen ma wanywako ki dano-ni. Kadi bed ngat acel keken aye ojolo kwena me Ker-ri, nongo diyo cwinywa-ni pe obedo me nono.
5 I wi lobo ducu, dano mapol ‘gitye ki cwercwiny kun gicur pi gin me kwer ducu ma tye ka timme.’ (Ejek. 9:4) Adwogi me tito kwena maber-ri nyutu ni jo ma myero gitye ka jolo lok me kwena me Ker-ri. (Ic. 2:2, 3) Pi meno, wamedde wunu ki tito kwena labongo wekone kun wadiyo cwinywa i “kelo lok maber me gin maber”—Ic. 52:7; Tic 5:42.