Yub Manyen me Gure me Adwol

Lobo-ni mito ni wan waye ni yub me kwo me kare man bibedo pi naka. Ento Lok pa Lubanga dok tittiwa gin mapat. (1 Jon 2:15-17) Lokke konyowa me niang ni tute me gwoko lonyowa i lobo kany yelo kwowa nono. Me jingo jo pa Lubanga, kityeko keto yub me gure me adwol pi mwaka 2007 ma wi lokke tye ni “Wukan Lonyo . . . i Polo.”—Mat. 6:19, 20.

Tam me bedo ki jami me kom mapol, tye i kin jami ma kiloko i igi i Jo Epeco 2:2 ni gubedo “twer mogo ma tye malo i dye yamo, ma en aye cwiny ma kombeddi tye ka tic i i jo ma dag winyo lok ma Lubanga waco.” Kit macalo yamo ayama tye i kabedo ducu, dok dano ywayo i igi, i kit yo acel-lu “cwiny me lobo man” bene onya oromo lobo-ni ducu. (1 Kor. 2:12) Kit macalo cwiny man tye ki teko me loyo tam pa dano tutwal-li, kiromo wacone ni tye ki “twer.” Yub manyen me gure me adwol man bikonyowa me kwero tam me bedo ki jami mapol me lobo-ni ento me keto cwinywa i gin ma pire tek loyo i kwowa. (Mat. 6:33) Medo i kom meno, yub man bikonyowa me jenge i kom Jehovah pi cobo ticwa me pwony kadi bed lyeto ki atematema tye mapol.

Bed tye i nino aryo-ni ducu dok ‘iket cwinyi tutwal.’ (Ibru 2:1) Co jami mogo ma pigi tego ma imito ketogi i tic i kwoni ki i ticci me pwony. Ka ibedo tye i yub man ma pitowa i yo me cwiny-nyi cakke ki acakkine o wa i agikkine, ci bicuko cwinyi dok bimiyi teko me medde ki ‘kano lonyoni i polo’!