Nyut Miti i Kom Dano —Ki Bedo Lakica
1 “[Jehovah] lakica dok maro dano.” (Jab. 145:8) Kadi bed ni Jehovah obedo Laloc Mamalo Loyo, ento en tiyo ki dano ma gubedo luroc i yo me kica, niango dok paro pigi. (Acak. 13:14; 19:18-21, 29) Wan bene watwero dongo kit me tito kwenawa teke wabedo ka poro kit pa Lubangawa ma lakica-ni. (Kol. 4:6) Man pe te lokke ni omyero wabed jo ma mwol nyo ma wor i lokwa keken ci otum.
2 I Doggola ki Doggola: Ka ce walimo rwed ot i cawa ma tic odiyo ma pe tye ki kare me lok kwedwa kono? Omyero wabed jo ma niang ki weko lokwa me bedo macek adada nyo wacikke me dok cen i nino mukene. Pe omyero wadi dano me gamo bukkewa ka pe gimito. Ka waparo pi jo mukene ci wabiworo jamigi, calo loro dog cel nyo doggolagi woko, omyero wapwony lutinowa bene me timone kit meno. Omyero wanen ni buk mo keken ma wabiweko i ot pa ngat ma peke gang odong ma pe twero nen ki woko. Adada, kica bimiyo watero jo mukene kit ma nongo wamito ni gin bene guterwa kwede.—Luka 6:31.
3 Tic i Teng Gudu: Ka watye ka tic i teng gudu, waromo nyuto ni waparo pi dano ka pe wagengo yo ki luwot nyo waguro dano i nyim odi me timo biacara. Omyero wanyut niangowa bene ki temo lok ki jo ma nongo gitye ki dakika mo manok me winyowa ento pe ki jo ma nongo nen woko ka maleng ni gitye ka rune me cito ka mo. Cawa mukene romo mitte ni omyero walok ki dwan malongo ka wo tye mapol. Ento omyero walok ki woro wek pe waywa tam pa dano i komwa.—Mat. 12:19.
4 Ka Twere, ka Watye ka Miyo Caden ki Cim: Paro pi jo mukene biweko wamiyo caden ki cim ki i kabedo ma nongo wo peke iye. Bedo me woro ka wanyuto nga ma wan wabedo oyotoyot dok watito tyen lok ma oweko wagoyo cim. Loko lok atir i cim ki dwan me mwolo biweko jo mukene donyo i nyamo Ginacoya kwedwa i yo ma miyo gidongo. (1 Kor. 14:8, 9) Ka wabedo lukica, jo ma niang dok paro pi dano, ci nongo watye ka poro kit pa Jehovah, Lubanga ma lakica.