‘Medde ki Lubo Kora’
1 Dano mapol giketo kwogi i nongo yomcwiny itgi kengi, ento pol kare inongo ni cwinygi dok pe yom. Ki tungcel kono, Yecu owacci miyo jami labongo wanya aye kelo yomcwiny kikome. (Tic 20:35) En owacci: ‘Ka ce dano mo mito lubo kora, myero okwong kwere kekene ka ocak lubo kora.’ (Mar. 8:34) Man pe te lokke ni omyero wakwer nongo yomcwiny mogo kicel kicel keken. Ento te lokke tye ni omyero wakwo kwo ma yomo cwiny Jehovah nino ducu.—Rom. 14:8; 15:3.
2 Wanenu kong lanen pa lakwena Paulo. Pi tyen lok me “ngeyo Rwotwa Yecu Kricito,” Paulo okwero lubo mitine kene ento omine gire me yaro lok me Ker-ri. (Pil. 3:7, 8) En owaco ni, “abibedo ki yomcwiny madit me miyo jami ducu ma atye kwede, kadi wa tek koma ducu,” me konyo jo mukene. (2 Kor. 12:15) Wan ducu omyero wapenye ni: ‘An mono atye ka tic ki jamina, karena, kerona, ki ngecca nining? Mono an ayelle me cobo mitina keken, nyo aketo tek me yomo cwiny Jehovah?’
3 Kare me Miyo Mic: Mwaka ki mwaka, lutic pa Lubanga gijalo cawa makato bilion acel kulu me pwonyo lok me Ker ma bilaro kwo pa dano-ni. Ki i kacokke, jo matino ki jo madito ducu gitiyo tic mapat pat me konyo jo mukene. Tye tic mukene ma kitimo ma mako yub me gure matino wa ki madito kacel ki tic me gero ki gwoko odi ma kitiyo kwedgi me yaro woro me ada. Tam kong pi kony me mar ma omegiwa ma gitiyo macalo Hospital Liaison Committees ki Patient Visitation Groups gimiyo. Dyere ma kit magi kelo mot madit bot utmegiwa ducu ma gubedo Lukricitayo!—Jab. 110:3.
4 Kare me miyo kony i yo mapat pat nonge ka ce peko nyo can mo opoto atura. Ento pol kare kono, wan waromo neno ci waniang ni Lakricitayo lawotwa moni mito kony nyo cuko cwiny. (Car. 17:17) Ka wan wabedo atera me konyo jo mukene kacel ki yaro lok me Ker-ri, ci nongo watye ka lubo lanen pa Yecu. (Pil. 2:5-8) Waketu tek wunu me medde ki timo meno.