Tim Ber Imi Bot Lador Wi Cukul
Lapeny magi kibinyamogi i Cukul me Tiokraci i cabit ma cakke i nino dwe 26 me Decemba, mwaka 2005. Lador wi cukul bitelo lwak pi dakika 30 i gamo lapeny i kom gin ma kipwonyogi cakke i cabit me nino dwe 7 me Novemba me o kwede wa i cabit me nino dwe 26 me Decemba mwaka 2005. [Nge lok man: Omyero iyeny lagam me lapeny ma pe kicimo ka ma myero icit iye pi lagam, in kikomi.—Nen i buk me Ministry School, pot 36-7.]
DIRO ME LOK
1. Gin ango ma wan waromo timone wek pwony ma wamiyo me cuko cwiny dano ‘obed i yo me mar’? (Pile. 9) [2, be pot 266] Wan wamito ni lokwa omyero ojenge i Lok pa Lubanga dok obed pi par ma nongo watye kwede pi jo ma giwinyowa. Omyero walok ki mar dok ki diro, pien lok i yo ma kit man aye gudo cwiny dano dok weko jo ma watye ka cuko cwinygi me timo gin moni-ni pe gikwero lokwa woko. Miyo pwoc pi tic maber ma nongo omegiwa gitye katimo pi Lubanga miyo giwinyo ni gin kara pigi tek dok man miyo bedo yot botgi me ye lokwa me cuko cwinygi-ni. (1 Tec. 1:2-8; 2 Tec. 1:3-5)
2. I yo ango ma ‘watwero cuko kwede cwiny dano ki pwony me ada’? (Tito 1:9) [3, be pot 267 para. 1-2] Omyero wati ki Lok pa Lubanga ka watye ka miyo pwony bot dano moni, ento pe wati ki tamwa nyo ki cik pa dano adana. Nyuto adwogi mabeco ma bino pi lubo pwony me Baibul ki adwogi maraco ma bino pi kwero lubone weko gineno ber-re. Myero wati ki Ginacoya me konyo dano me niang tyen lok ma miyo watimo gin moni ki dok kit me timone bene.
3. Pingo pire tek ni omyero wawek pwonywa obed i yo ma cuko cwiny dano, dok watwero timo man nining? [5, be pot 268 para. 1-3, ki bok] Jami mapol tye ma odiyo dano i wi lobo-ni, ma omiyo jo mapol gitye ma cwinygi otur tutwal. Gin omyero gunong ni kacokke obedo kabedo me gwokke kacel ki cuko cwiny. (Ic. 32:2) Pi meno, omyero wapwony i yo ma tugo cwinygi dok miyogi teko. Mitiwa omyero obed me dongo dano ki me konyogi me nongo gen ki kero ma a ki bot Jehovah kacel ki jami ma en miyowa. (Yubu 16:5; Rom. 15:13)
4. Ka wakwanyo lapor pa Moses me poyo wi dano i kom gin ma Jehovah otimo pi jone, ci medo itgi teko nining? (Nwo. 3:28; 31:1-8) [6, be pot 268 para. 5–pot 269 para. 2] Poyo wi omegiwa i kom gin ma Jehovah otimo pi jone kit ma Moses otimo-ni, romo konyogi me nongo kero ki dok bene poyo wigi i kom kit ma Jehovah gwoko kwede cikkene. (Yoc. 23:14) Wamedo teko ki dano ka ce wanyuto botgi jami mogo ma tye i Ginacoya ma nyuto ni Jehovah gwoko dano. (Tic 4:1–5:42)
5. Pingo lok ki yomcwiny i kom gin ma Jehovah tye ka timone ki gin ma en bitimone i anyim cuko cwiny jo ma giwinyowa? [8, be pot 270-1] Nyuto yomcwiny pi mic me cwiny ma Jehovah miyowa, pi utmego, ki pi bedo Lucadenne cuko cwiny jo ma giwinyowa. Ka watye ka lok nyo watye ka lega pi cikke pa Jehovah ma pud gitye anyim, omyero waleg nyo walok kun nongo a ki i cwinywa wek omi cikke man onen gin ma tye ada dok bicobbe labongo kit akalakala mo.
PWONY ME 1
6. “Septuagint” obedo gin ango dok pingo pire tek bot Lukricitayo? [1, si pot 307 para. 12–pot 310 para. 14] “Septuagint” obedo Ginacoya me leb Ibru ma kikwongo gonyone i leb Grik i cencwari me aryo K.M.P. Pol pa Ginacoya me leb Ibru ma kibedo kacimogi nyo kitiyo kwedgi i Ginacoya me leb Grik, kikwanyogi ki i “Septuagint.” Me medo i kom meno, but coc me “Septuagint” me kare pa Lukricitayo macon onongo tye ki nying Lubanga.
7. Masoretes onongo gubedo jo mene, dok gin ango ma pire tek ma gin gutimo i tic me kobo Baibul? [2, si pot 310 para 18; pot 311 para. 20-1] Masoretes gubedo lukaran ma ticgi onongo obedo me kobo Ginacoya me leb Ibru ki diro i cencwari mogo ma obedo i nge Yecu. Coc ma gubedo kacoyone i teng buk me Ginacoya me leb Ibru onongo nyuto jami mogo ma lukaran ma gukobo ginacoya mukwongo i kare macon guloko woko. I nge mwaka miya abic K.M., Masoretes gucako kit me coc mo ma onongo konyo dano me kwano ki kit me lwongo coc me leb Ibru ma onongo kicoyogi labongo nukuta (calo a, e, i, o, u) ma konyo me lwongo lok. Pol pa Baibul me leb Ibru gitiyo ki ginacoya ma Masoretes gukobo-ni; coc mogo ma kiketo piny i ter Baibul me “New World Translation” polle kikwanyogi ki i ginacoya pa Masoretes.
8. Ginacoya ma onongo con tye i leb Ibru ma kigonyo i New World Translation me leb Munu-ni kigonyo ki i Baibul mene, dok pingo waromo waco ni kigonyo cocce atir dok maber? [3, si pot 312 para. 28, 30] Kigonyogi ki i “Biblia Hebraica,” pa Rudolf Kittel. Ingeye, kitiyo ki manyenne ma okati lacen ma onongo kilwongo ni “Biblia Hebraica Stuttgartensia,” me medo lok mogo ma onongo orem ki coc ma kicoyogi piny i te Baibul me “New World Translation” me mwaka 1984. Kit ma kinyuto kwede i coc ma tye i tere piny, lok mukene kikwanyogi ki i “Septuagint” ki bukke mogo macon ma gingene tutwal, ma man nyuto ni Baibul me “New World Translation” kigonyo inge kwedo lok mapol.
9. Lukricitayo macon gunyuto nining ni onongo gitye ki miti i tic me kobo Lok pa Lubanga i coc? [4, si pot 315 para. 1-5] Nicakke i Pentekote me mwaka 33 K.M., Lukricitayo gumiyo caden ma lubbe ki cik ma Yecu omiyogi i Tic pa Lukwena 1:8. Gin gupwonyo pwony pa Lukricitayo i twok lobo ducu me karegi ca. (Kol. 1:23) I kingi onongo tye jo ma kimiyogi teko me keto “lok me kwena maber i kom Yecu Kricito,” i coc ki jo mukene gudoko lukaran me kobo coc. (Mar. 1:1; Mat. 1:1) Lukricitayo macon gutiyo ki codex, ma rom aroma ki bukke me kare-ni, me keto ginacoya macon-ni ducu kacel me akwana, ki me pokogi bot jo mukene.
10. Gin ango ma ngiyo coc macon magi ma gitye wa i karewa-ni tittiwa i kom Baibul? [7, si pot 320 para. 32] Ginyuto ni tyeng ducu ma tye i Ginacoya me leb Ibru ki me leb Grik ma watye kwede i kare-ni, rom aroma ki mukwongo ma kicoyogi pi teko pa Lubanga-ni. (2 Pet. 1:20, 21) Kadi bed ni lukaran ma gukobogi-ni pe gutiyo i te teko pa cwiny maleng, cocgi konyo me moko ni Baibul a ki bot Lubanga.
KWANO BAIBUL CABIT KI CABIT
11. Kit ma pe kiye ki Daudi me gero ot pa Lubanga-ni mono nyuto ni Jehovah pe ocwako lweny ma Daudi obedo ka lwenyone? (1 Tekwaro 22:6-10) Pe. Lweny ma Daudi olwenyo onongo obedo me kwanyo tim maraco kacel ki jo ma onongo gijemo i kom twero me loc pa Jehovah, me medo wang lobo pa jo Icrael nio wa ka ma Lubanga onongo onyuto, ki dok me kelo kit ma atir kacel ki kuc. Ento kit ma yub me Ker pa Jehovah obedo me kelo kuc-ci, omiyo Solomon ma obedo dano me kuc aye ogero ot meno dok ogero ki kuc. [1, it-2 pot 987 para. 1]
12. Solomon onyuto nining i legane ma en olego i kare me dyero ot pa Lubanga, ni Jehovah pe paro pi luticce macalo lwak keken ento ni en bene ngeyo peko pa dano acel acel ma lwore? (2 Tekwaro 6:29, 30) Solomon onongo ngeyo ni dano acel acel ma lworo Lubanga nongo tye ki peko ma diye. Oromo bedo ni ngat moni nongo pekone obedo two. Ngat mukene mege oromo bedo cwercwiny ki par madwong. Jo mukene oromo bedo ni danogi mo me amara nongo oto. Can tic, peko me cente, ki ayelayela me i ot tye mapol i kare man ma kwo tye matek tutwal-li. [4, w97 4/15 pot 4]
13. “Jogi ma calo nyogi dyegi” ma kiloko i komgi i 2 Tekwaro 11:15, gubedo gin ango? Nen ka maleng ki i lok ma onongo kitye ka lokone kany, ni lok man me leb Ibru ni ‘jogi ma calo nyogi dyegi-ni’ onongo gubedo jami mogo ma kimiyogi woro kacel ki gityer, dok man onongo lubbe ki tim me dini goba. Nyo gwok jo ma onongo giworo en jogi magi gitamo ni jogi-ni gubedo kodi gigu mogo ma tye ki yer mapol calo nyok dyel. [5, it-1 pot 966; Rbi8 ftn.]
14. Kit ma loc pa Baaca ocakke “i mwaka me adek me loc pa Aca” dok orii pi mwaki 24 keken-ni, dong rwatte nining ni “i mwaka me pyeradek wiye abicel me loc pa Aca” Baaca “ocito ka monyo jo Juda”? (1 Luker 15:33; 2 Tekwaro 16:1) Kadi bed jo mukene waco ni lukaran ma gukobo coc meno aye gukobo marac dok gitamo ni man omyero obed ni nyo i mwaka me 16 nyo me 26 me loc pa Aca, ento byek ma kumeno pe mitte me wek lok man orwatte. Lucoc mogo pa Lujudaya gutiyo ki tam ma tye i “Seder Olam,” ma nyuto ni “mwaka pyeradek wiye abicel” man ocakke ki i kare ma ker me Juda ocakke kwede i kare me pokkegi (997 K.M.P.) dok man rwatte arwata ki mwaka me 16 pa Aca. [6, it-1 pot 184 para. 5]
15. 2 Tekwaro 20:22, 23 nyuto nining gin ma dong cok timme i kom lobo pa Catan? Kit ma Niyabo 17:16, 17 nyuto kwede, Jehovah oketo “tamme” i kom Babilon Madit, dok dini pa Lukricitayo ata-ni aye obedo dulle ma dong koko dwong i komgi ma loyo. En bimiyo dul mony pa lobbe ma gitye i United Nations me bedo ki “cwiny” acel me lokke i kom dini goba ci giketo tere woko kwicikwici. Dong gibityeko ter dini pa Lukricitayo ata-gu ma gingene pi pwony goba-ni woko calo kit ma kityeko kwede ter jo me Edom i wi got me Ceir. [7, w84 7/1 pot 18 para. 17]