Latinni Mono Twero Moko Tam ma Ocwiny?
1. Bulu ma gubedo Lucaden gucung matek i kom cik madok i kom tic ki remo nining? Mi lapor mo kong.
1 Moko tam ma ocwiny i kom gin ango? Medo remo do. Kit ma kinyuto kwede i wi lok ma waco ni “Walk as Instructed by Jehovah” (Wot i Yo ma Jehovah Onyuto), i Watchtower me Juni 15 me mwaka 1991, lutino pa Lucaden pa Jehovah gucung matek me nyuto ni mitigi me lubo cik pa Lubanga madok i kom remo pire tek itgi calo kit ma nongo pire tek kwede bot lunyodogi. Man mono bene mitte wa bot latinni ma peya oo mwaka 18?
2. Cik ango ma kot mo otiyo kwede i kom latin mo ma okwero medo remo i kome, dok gin ango ma lunyodo ma gubedo Lukricitayo ki lutinogi giromo pwonyo ki iye?
2 Gin Ango ma Cik Waco? Me labolle, i lobo United States, kot ma malo ma dong ongolo kop i kom twero pa latin mo ma onongo peya oo mwaka 18 pi kwero medo remo obedo kot Mamalo Loyo me IIlinois. I kare me winyo kot i kom lamego mo me mwaka 17, kot ongolo ni: “Ka tekke tye gin ma nyuto ni latin man dong otegi ma twero niang maber i kom adwogi ma a i jami ma en timo dok tye ki neno pa ngat ma otegi, ci nongo cik ye bote me lubo niyene me ye nyo kwero ni myero kimed remo i kome.” Pi meno, me niang maber ka latin moni dong otegi ma romo moko tamme kene, ludaktar nyo luloc guromo penyo en latwo-ni wek giwiny lok doge kit ma en kikome kwero kwede ni pe kimed remo i kome. Latin meno myero oniang kong maber kit ma lit pa twone-ni tye kwede kacel ki adwogi ango ma twero bino ki yo me nongo cang ma en oyero, ka dong otit kamaleng niyene ma lubbe ki cik pa Lubanga ma dok i kom remo.
3. Lapeny ango ma lunyodo omyero gupenye kwede, dok pingo?
3 Ngo ma Latinni Twero Wacone? Tika lutinoni gitwero lok pigi kengi i kom lok man? Tika gin giye ki cwinygi ducu ni cik ma waco ni ‘pe wacam remo-ni’ a ki bot Lubanga? (Tic 15:29; 21:25) Gin tika giromo tito niyegi kun gitiyo ki Ginacoya? Gin tika gitwero lok kun gicung matek i kom tamgi ma nongo gumoko i lok madok i kom remo kadi bed ni lunyodogi nongo peke, ka ce ludaktar guwaco ni kwogi tye ka ma ding? Kit ma ‘kare ki jami ma gitimme atura, timme i kom wan ducu-ni,’ i yo ango ma iromo weko lutinoni bedo ma guyubbe pi atematema mo keken ma bino me temo gennegi?—Latit. 9:11; Ep. 6:4.
4, 5. (a) Tic ango ma lunyodo tye kwede, dok giromo cobone nining? (b) Jami me kony ango ma tye pi lunyodo?
4 Lunyodo, Ngo ma Wuromo Timone? Obedo ticwu me pwonyo lutinowu i kom cik pa Lubanga pi remo. (2 Tem. 3:14, 15) Kinyamo lok man maber i buk me Reasoning pot karatac 70-4. Kwanu ngec man kacel ki jo me odiwu. Ti ki wi lok ma waco ni, “If Someone Says—” (Ka Ngati mo Owaco ni) i pot karatac 74-6, wek lutinoni gubed kaporo kit me tito ngo ma gin giye ki dok pingo giye iye wek kit me titone omok woko i wigi. (1 Pet. 3:15) Bukke mukene ma romo pwonyowa lok i kom remo obedo brocuwa me How Can Blood Save Your Life? ki Watchtower me Juni 15 me mwaka 2004 pot karatac 14-24. Medo i kom meno, video me Transfusion-Alternative Health Care—Meeting Patient Needs and Rights ki No Blood—Medicine Meets the Challenge, ma kombeddi-ni dong gitye i DVD ma wi lokke tye ni Transfusion Alternatives—Documentary Series, gimiyo ngec muromo i kom ber pa yat ma pe kiyubo ki i kom remo kacel ki yango dano labongo tic ki remo. Jo me odi mono dong gutyeko nyamo jami magi ma wanenogi malo-ni macok cok-ki?
5 Kony lutinoni wek gunge ‘gin ma Lubanga mito, gin maber, ma yomo cwinye, ma roc mo pe iye’ ma dok i kom remo. Man bikonyogi me moko tam ma ojing ma Jehovah cwako.—Rom. 12:2.