Tito Kwena Mito Diyo Cwiny
1 Pi mwaki makato 30 kulu, lakwena Paulo onongo yengo i tic macalo latit kwena. Kit ma tic mo keken pe bedo labongo peko-ni, en bene orwatte ki pekki mapol i ticce me tito kwena. (2 Kor. 11:23-29) Kadi bed kit meno, Paulo pe oilo cinge. (2 Kor. 4:1) En onongo ngeyo ni kerone me diyo cwinye i ticce me pwony a ki bot Jehovah. (Pil. 4:13) Ma lubbe ki lanenne me diyo cwiny ki gen, Paulo owacci: “Wulub kita, macalo an bene alubo kit pa Kricito.”—1 Kor. 11:1.
2 Ciro Atematema i Kare-ni: Utmego mapol nino ki nino giyelle ki peko me ngala, aunauna, nyo miti manok ma jo me pacogi, lutic luwotgi, nyo lutino kwan luwotgi ginyutu i pwonygi. (Mat. 10:35; Jon 15:20) Gwok nyo in bene itye ka rwatte ki pekki magi. Oromo bedo ni itye ka lweny ki peko me yot komi nyo jami mogo ma mito tango wi woko nyo atematema ma yengo niyeni kacel ki tekoni me diyo cwinyi. Waromo nongo kero ka ce walubu lanen pa lutic ma lugen me kare macon kacel ki lanen pa Lukricitayo luwotwa ma bene gurwatte dok gulwenyo ki pekki mapol.—1 Pet. 5:9.
3 Waromo nongo teko me cung matek i ticwa me pwony ki neno ni ‘waruko jami lweny ducu ma Lubanga miyo.’ (Ep. 6:10-13, 15) Lega pi diyo cwiny bene pire tek. Lubanga miyo cwiny mere maleng me konyowa wek wakany atematema. (2 Kor. 6:4-7) Ka wamito loyo lweny me cwiny, omyero walub cik pa Lubanga wek ominiwa kero. (Jab. 119:24, 85-88) Kwano Baibulwa nino ducu jingo watwa ki Jehovah calo pa latin ma kwano waraga ma oa ki bot wonne ma lamar tyen mapol. Wanongo ryeko me lweny ki atematema ka ce wakwano kwan matut kare ducu, man miyo waweko tam pa Lubanga doro kit ma wamoko kwede ki tamwa kun jingowa me bedo lugen.—Car. 2:10, 11.
4 Diyo Cwiny Kelo Mot: Ka wacobo ticwa me pwony kun wadiyo cwinywa ci wamiyo cwiny Jehovah bedo yom, man kelo mot botwa ki bot jo mukene kit ma otimme kwede i kom Paulo. (Car. 27:11) Dong wamoku i cwinywa me medde i ticwa me pwony, kun wanyutu ni watye ki niye matek ma ‘pire dit kato jabu ma pe rii naka kadi bed nongo kitemo ki mac.’—1 Pet. 1:6, 7.