Bok Me Lapeny

◼ Watwero neno kit me gwoko Otwa me Ker nining?

Kit ma watye ka kwo i kare me agikki, omyero wati ki ryeko me moko kit me gwoko Otwa me Ker. Kit macalo wagwoko paciwa ki diro wek lukwo pe okwal, myero bene watim kit meno i Otwa me Ker. Obedo tic pa luelda me neno ni Ot me Ker kigwoko maber. Man pire tek adada kit ma waneno ni i kabedo mapol kituro dok kikwalo Odi me Ker.

Gwok maber kwako loro ki pungo doggola, dogcel, ki wang dirica ducu i nge tic ki Ot me Ker. Omege ma gigenne myero gunen lok me gwoko Ot me Ker kare ducu ma nongo kitiyo kwede. Man kwako kare ma nongo kitiyo ki Ot me Ker pi yub mukene mapat ki cokke me nino ducu, calo nyom nyo gwoko lengo.

Ka Ot me Ker tye ki kagwoko mutoka, bedo ber ka kiketo iye mac me menyo piny ka piny col. Man bigengo kwo i kom mutoka nyo awano i kom omege ki lumege ka gitye ka weko Ot me Ker. Kacokke mogo gunongo ni tye me kony ka lukony kor tic mogo guleyo tic me gwoko kabedo ma orumo Ot me Ker i kare me cokke me gengo kwo ki tim mogo maraco i kom mutoka nyo jami me wot ma kigwoko kenyu.

I kabedo mukene kitimo cokke ma nongo kipungo doggola woko. I kabedo ma kit meno, lukony kor tic ma gigenne aye myero gubed cok ki doggola wek gubed ka neno maber jo ducu ma gidonyo i ot. Luelda myero gunen yo maber ma myero giti kwede ma lubbe ki cik pa gamente ma kwako kagure pa lwak. Ka kiketo yub ma kit meno, ci myero kiwek jo me kacokke gunge con ni kibipungo doggola me Ot me Ker woko.

Wamito ni omege ki lumege kacel ki jo ma gitye ki miti ma gibino i cokkewa pe guwiny calo kwogi tye ka mading, dok wamito gwoko Ot me Ker wek pe kibal nyo kikwal jami ma iye. Luelda me kacokke acel acel myero gunen kit kwo me kabedogi dok gumok tam mupore wek kigwok jami me Ot me Ker kacel ki jo ducu ma gibino i cokkewa maber.