Bok Me Lapeny

◼ Watwero konyo lutino kwanwa me Baibul me bedo ma gupore pi nongo batija calo lupwonnye pa Yecu Kricito nining?

Watwero timo man maber ka (1) wapwonyo lutino kwanwa me Baibul kare ducu dok i yo ma weko gidongo, (2) wacuko cwinygi me wot i cokke abic ducu ma bedo tye i cabit ki me nywako iye bene, dok (3) cutcut ka gupore ma lubbe ki Ginacoya, wakonyogi dok wapwonyogi me nywako i tic me pwony.

Yecu Kricito ociko lulub kore ni gulok dano odok lupwonnyene, kun gibatijagi dok gipwonyogi me lubo cikke ducu. Cik man pud tye ka tic wa i kare-ni, pien Yecu owaco ni: “Nen, atye kwedwu kare ducu, nio i agikki piny.”​—Mat. 28:19, 20.

Lapwonnye obedo ngat ma jolo dok tito pwony pa ngat mukene ki mit kom. Pi meno, jo ma gubinongo batija myero pe gunong ngec me ada me Baibul keken, ento myero bene gunyut i kwogi ni giniang rwom me kit matir pa Jehovah dok gitye ka lubone. Medo i kom meno, macalo lupwonnye pa Yecu, giniang ni Jehovah tye ki but dulle i lobo kany dok ni Yecu Kricito nyuto twerone kun tiyo ki “lagwok ot ma lagen dok maryek.” (Mat. 24:45-47; Tic 1:8) Kit ma gingeyo ni kare dong odic woko-ni, gin gicung kacel ki jo pa Jehovah i timo tic ma Yecu ocako dok oweko bot lupwonnyene-ni. (Luka 8:1; Mat. 24:14) Nongo batija i pii nyuto ka maleng ni lupwonnye magi dong gutyeko dyere bot Jehovah ki cwinyi ducu.​—Por ki Jabuli 40:8.

Wiwa myero opo ni watye ka konyo lutino kwan me Baibul me doko lupwonnye pa Yecu ento pe lupwonnyewa. Ka gwok nyo pi kit me kwowa, cawa ma watye kwede, dirowa, nyo tyen lok mukene, waniang ni pe watwero konyo latin kwanwa me Baibul me dongo wek odok lapwonnye, ci omyero walok iye ki luelda. Giromo miyo tam me konyo dongo pa latin kwan meno, ma lubbe ki lok pa Paulo i 1 Jo Korint 3:5-9.

Kwanwa me Baibul myero omedde wang ma latin kwan otyeko bukke aryo, Baibul Mono Ada Pwonyo Gin Ango? ki ‘Wubed i Mar pa Lubanga,’ kadi bed en odoko latit kwena dok onongo batija ma peya otyeko bukke aryo magi. Ka buk acel i kin magi nyo gin aryo ducu pe nonge i leb pa latin kwan, ci wutwero kwano bukkewa mukene mupore ma miyo pwony me Baibul dok tito gin ma Jehovah mito ki bot dano.