Kwena me Ker Nam. 37

Kwena pi Jo me Lobo Ducu

Agikki Pa Dini Goba Dong Tye Cok!

▪ Dini goba obedo ngo?

▪ Bigik nining?

▪ Dong man bigudo komi nining?

Dini goba obedo ngo?

In tika cwinyi cwer pi bal mapol ma kitimo i nying me dini? Mono lweny, tim aranyi, ki tim me aram pa jo ma giwacci gin gibedo lutic pa Lubanga wango cwinyi? Pingo dini aye dong nen calo obedo lwit pekki mapol adada? Bal-li pe tye i kom dini ducu, ento tye i wi dini goba aye. Yecu Kricito ma obedo dano ma kiworo tutwal i lok me dini onyuto atir ni dini goba timo jami maraco kit macalo “yat marac nyako nyige maraco.” (Matayo 7:15-17) Nyig maraco ango ma dini goba nyako?

Dini Goba . . .

◼ DONYO I LWENY KI LOK ME WIBYE: Karatac akwana mo ma kilwongo ni Asiaweek, owaco ni: “I lobe me Acia ki mukene mapol, lutela ma gimito medde ki locgi gituko ki tam pa dano i lok madok i kom dini pi cobo mitigi kengi.” Macalo adwogine, karatac meno waco ni: “Wi lobo dong tye ka pong ki anyobanyoba keken.” Latela dini mo ma ngene tutwal i lobo United States owaco ni: “Omyero kinek lutim aranyi aneka me jukogi ki neko dano.” En omiyo tam ango? “Tyekugi woko liweng i nying Rwot.” Ento ki tungcel, Baibul waco ni: “Ka ce dano mo waco ni emaro Lubanga, kun dag ominne, nongo en lagoba.” (1 Jon 4:20) Yecu bene owaco ni: ‘Wumedde ki maro lukworwu.’ (Matayo 5:44) Dini adi ma in ingeyo ma jone gidonyo i lok me lweny?

◼ PWONYO PWONY GOBA: Dini mapol gipwonyo ni tye gin mo ma pe nen i kom dano, ma medde ki kwo i nge to. Pol pa dini magi gitiyo ki pwony man me cam i kom lumembagi, gipenyo cente wek gileg pi tipo pa jo muto. Ento Baibul dok pwonyo gin mapat. “Jo makwo gingeyo ni gibito, ento jo ma dong guto woko pe gingeyo gin mo.” (Latitlok 9:5) Yecu opwonyo ni kibicero jo muto​—cero dano onongo dong pe mitte ka gin mo ki i kom dano medde ki kwo. (Jon 11:11-25) Diniwu mono pwonyo ni dano tye ki gin mo ma pe to?

◼ CWAKO TIM TARWANG: I lobe mapol, dini mogo giwiro co ma gunyomme ki co wadgi nyo mon ma gunyomme ki mon wadgi me bedo lupwonyegi, dok gidiyo gamente me ye kodi nyom ma kit man. Kadi wa dini mogo ma giwaco ni tim tarwang rac bene pe giryemo lutela dinigi ma nongo gupyedo lutino. Ento Baibul mono pwonyo gin ango i kom lok man? Tito ka maleng ni: “Pe wuwek gibwolwu; kadi lutim tim kwele, nyo jo ma woro cal jogi, ki lutim abor, nyo jo ma buto ki co wadgi . . . ker pa Lubanga pe bibedo megi.” (1 Jo Korint 6:9, 10) In mono ingeyo dini mogo ma pe giparo pi tim tarwang?

Anyim pa dini ma ginyako nyig maraco bibedo nining? Yecu ociko ni: “Kit yat ducu ma pe nyako nyige mabeco gitongo ci gibolo woko i mac.” (Matayo 7:19) Adada, dini goba kibitongogi i ngom ka kiketo tergi woko kwicikwici! Ento man bitimme awene dok nining? Ginanyuta pa lanebi ma kicoyo i Baibul i buk pa Niyabo, cura 17 ki 18 miyo lagamme.

Dini goba obigik nining?

Go kong i tammi dako mo ma lakwele ma tye obedo i wi lee mo mager. Lee-ni tye ki wiye abiro ki tunge apar. (Niyabo 17:1-4) Dako ma lakwele-ni cung pi gin ango? En ‘doro tam pa luker me wi lobo ducu.’ En rukke ki bongo ma obedo lamar lamar, tiyo ki odok eceta dok olony ma pe titte. Medo i kom meno, en ‘otyeko bwolo rok ducu’ ki timme me jok jok. (Niyabo 17:18; 18:12, 13, 23) Baibul konyowa me niang maber ni dako man ma lakwele-ni obedo dul acel ma guro wi dini goba ducu me lobo-ni. Pe cung pi dini mo acel keken, ento cung pi dini ducu ma ginyako nyig maraco.

Lee man ma dako ma lakwele obedo i wiye-ni cung pi luker me lobe ducu.a (Niyabo 17:10-13) Dini goba doro wi lee man ma obedo luker me lobo-ni dok temme me dwoyo tam ma gimoko wek ticgi odok i tung kucinge.

Cokcok-ki gin mo me aura obitimme. “Dong tung lee apar ma ineno ca, gin kacel ki lee gibikwero dako-nu ma lakwele-ni woko; gibitenye ata kun giweke dong munero, gibicamo ringo kome ci giwango woko ki mac.” (Niyabo 17:16) I yo me aura dok me atura tutwal, luker matego me lobo-ni gibiloko wigi i kom dini goba, ci gibijwero tere woko kwicikwici! Ngo ma bimiyo gin man timme? Buk me Niyabo i Baibul, miyo lagam man ni: ‘Lubanga aye ma oketo miti man i cwinygi wek gucob tamme.’ (Niyabo 17:17) Adada, Lubanga biweko dini goba culo pi tic maraco ducu ma gin gutimo kun gitiyo ki nyinge. Ma lubbe ki ngolo kop i yo me atir, en bitic ki luker ma yam dini goba timo kwedgi abor-ri me keto tere.

Gin ango ma in omyero itim ka pe imito ni can ma bipoto i kom dini goba-ni pe ogud komi? Lubanga ociko ni: “Wun jona, wua woko ki bote.” (Niyabo 18:4) Adada, man aye obedo kare me ngwec woko ki i dini goba! Ento ibingwec kwene? Pe ingwec bot jo ma gikwero tye pa Lubanga pien anyimgi bene col. (2 Jo Tecalonika 1:6-9) Kagwokke acel keken ma tye aye obedo dini me ada. In itwero ngeyo dini me ada nining?

Kit me ngeyo dini me ada

Kit nyig mabeco ango ma dini me ada myero onyaki?​—Matayo 7:17.

Dini me Ada . . .

◼ NYUTO MAR: Jo ma woro woro me ada ‘pe gubedo jo me lobo,’ rangi del kom nyo tic me tekwaro pe pokogi, ento ginyuto ‘mar i kingi.’ (Jon 13:35; 17:16; Tic pa Lukwena 10:34, 35) Me ka nekke i kingi kengi, gin giromo jalle me to pi luwotgi aye doki.​—1 Jon 3:16.

◼ GENO LOK PA LUBANGA: Dini me ada jengo pwonye ducu i Lok pa Lubanga ma en aye obedo Baibul, me ka ka pwonyo ‘kit pa kwaro’ nyo ‘lubo cik pa dano.’ (Matayo 15:6-9) Pingo? Pien “Ginacoya ducu ma yam gicoyo, gicoyo pi teko pa [cwiny] pa Lubanga. Konyo me pwony, me juko dano, me tiro kit pa dano.”​—2 Temceo 3:16.

◼ JINGO WAT I KIN JO ME ODI DOK LUBO CIK ME KWO MATIR:

Dini me ada pwonyo co me ‘maro mongi macalo gimarre kengi,’ konyo mon me bedo ki ‘woro madit i kom coggi,’ dok bene pwonyo lutino me ‘winyo lunyodogi.’ (Jo Epeco 5:28, 33; 6:1) Medo i kom meno, jo ma nongo kiminigi tic me tela i kacokke omyero gubed lanen maber i yo me bedo ki kwo matir.​—1 Temceo 3:1-10.

Tika tye dini mo ma timo jami magi? Buk mo ma kilwongo ni Holocaust Politics ma kicoyo i mwaka 2001 owaco ni: “Ka onongo dano mapol gilubo jami ma Lucaden pa Jehovah gipwonyo dok gitimo, onongo kono nek ma kilwongo ni Holocaust pe otimme dok kono neko kaki mogo lumuku bedo pe i lobo.”

Adada, i lobe 235 kulu, Lucaden pa Jehovah pe gipwonyo cik me Baibul ma mako kwo matir keken, ento gikwo kwo ma lubbe kwede bene. Wacuko cwinyi me penyo Lucaden pa Jehovah wek gukonyi me ngeyo ngo ma Lubanga mito ki boti wek in bene iwor en i yo ma en mito. Man aye obedo kare me moko tammi. Pe omyero igalle. Agikki me dini goba dong tye cok!​—Jepania 2:2, 3.

□Pi ngec matut i kom lok man, nen buk me Wubed ma Wukiyo Piny!, pot karatac 12 ki 13 ma Lucaden pa Jehovah aye gucoyo.

□ Wutim ber wubin wucak kwano Baibul kweda ki gang.

[Lok ma tye piny]

[Boro buk i pot karatac 3]

“Wun jona, wua woko ki bote”

[Boro buk i pot karatac 3]

Dini goba doro tam pa “luker ducu me wi lobo”