Ажәамаанақәа
30 Иаке́и иԥа Агу́р Ифии́л иеиҳәаз, Ифии́ли Уха́ли иреиҳәаз, акрызҵазкуа ажәақәа.
2 Сара зегь раасҭа здырра маҷу соуп,
Ауаҩы имазар ахәҭоу аилкаарагьы сымаӡам.
3 Сара аҟәышра смырҳаӡеит,
Иԥшьаӡоу имоу адыррақәагьы сымаӡам.
4 Ажәҩан ахь ихаланы илбаахьада?
Аԥша еидкыланы знапаҿы изкхьада?
Аӡы амаҭәа илазҳәахьада?
Адгьыл аҳәаақәа шьақәзыргылада?
Ихьӡуи иара? Ихьӡуи иԥа? Иҳәа, иудыруазар.
5 Анцәа иажәақәа зегь цқьоуп*.
Иқәгәыӷуа рзы аԥырак даҩызоуп.
6 Иажәақәа акгьы рыцумҵан,
Мамзар иуҵихуеит,
Нас ушымцҳәаҩу ааԥшуеит.
7 Ҩба заҵәык рзы суҳәоит,
Уаҳа акгьы сҭахӡам, сыԥсы ахьынӡаҭоу убарҭ роуп исҭаху:
8 Амцҳәара сылца, амцгьы наҟ исԥырга,
Аӷарра сааигәара иааумган, амалгьы сумҭан.
Исызхаша афатә заҵәык сыҭала,
9 Амцхә соур, «Дызусҭада Иегова?» ҳәа аҳәара саламгарц азы.
Аӷарра сааигәа иааумган, аӷьычра саламгарц азы, ухьӡгьы смырԥхашьарц азы.
10 Амаҵуҩы иԥшәма иҿаԥхьа иҟам-ианым изумҳәалан,
Мамзар уишәиуеит, ахарагьы удлоит.
11 Иҟоуп ауаа* заб дызшәиуа,
Зангьы пату лықәзымҵо.
12 Иҟоуп ицқьоуп ҳәа згәы иаанаго ауаа,
Аха дара ргәам* илатәоуп, рҽыдымрыцқьаӡеит.
13 Иҟоуп даараӡа иԥагьоу ауаа,
Егьырҭ зқьышә иқәҵаны ирыхәаԥшуа.
14 Иҟоуп зхаԥыцқәа аҳәа иеиԥшу ауаа,
Зыцламҳәа аҳәызба еиԥш иҵару.
Дара адгьыл аҿы арыцҳақәа дыргәаҟуеит,
Ажәлар ирылоу аӷарцәа ҟаҟаны илбаардоит.
15 Аҵарбелқәа ҩыџьа аԥҳацәа рымоуп, дара: «Иҳаҭ! Иҳаҭ!» — ҳәа иҵәыуоит.
Абарҭ хԥа ахаангьы рызхара ҟалаӡом,
Ԥшьбагьы ахаан иазхоуп рҳәаӡом.
17 Заб ихыччо, зангьы илзымӡырҩуа илақәа
Арха иҟоу алаҳәақәа иҭырхуеит,
Ауарбажә ҿақәа ирфоит.
18 Абарҭ хԥа сара еилкаашьа сымаӡам*,
Ԥшьбагьы сзеилкааӡом:
19 Ажәҩан иалоу ауарбажә амҩа,
Ацаҟьа иаҿоу амаҭ амҩа,
Амшын иху аӷба амҩа,
Ахаҵа аӡӷаб лахь имоу амҩа.
20 Абар зхаҵа дзыԥсахуа аԥҳәыс иҟалҵо:
Акрылфоит, лқьышә лрыцқьоит,
Нас: «Цәгьарас ҳәа акгьы ҟасымҵаӡеит», — лҳәоит.
21 Абарҭ хԥа адгьыл арҵысуеит,
Ԥшьбагьы азычҳаӡом:
22 Амаҵуҩы аҳас даныҟало,
Агаӡа амцхә анифо,
23 Ирцәымӷу* аԥҳәыс ԥҳәысс данырго,
Амаҵуҩԥҳәыс лыԥшәма лҭыԥ анаанылкыло*.
24 Адгьыл аҿы иҟоуп даараӡа ихәыҷӡоу,
Аха уамакала иҟәышу* ашамҭақәа ԥшьба:
25 Ашышкамсқәа — мчы змам шамҭақәоуп*,
Аха дара аԥхын афатә еидыркылоит.
26 Ацаҟьаҿы инхо адаманқәа — иԥсыҽу гыгшәыг* хәыҷқәоуп,
Аха дара ацаҟьаҿы аҩнқәа ҟарҵоит.
27 Асаранчақәа аҳ дрымаӡам,
Аха дара ар реиԥш цәаҳәак ианыланы ицоит.
28 Агеккон аҭӡамц икыдлоит,
Аҳҭынрахьгьы инеиуеит.
29 Иҟоуп х-шамҭак, инықәгыла-аақәгыло иныҟәо,
Ԥшьбагьы, зныҟәашәа ԥшӡоу.
30 Алым, зегь реиҳа иӷәӷәоу агыгшәыг,
Аӡәы ицәшәаны ахаангьы имхьаҵуа,
31 Ала шәарыца*, абаӷь,
Ар ирхагылоу аҳ.
32 Агаӡара ухьны ухы ҳароукзар,
Ма уи угәы иҭоукзар,
Уҿы аркы, ҿумҭын.
33 Ахш уҟьар, ахәша алҵуеит,
Аӡәы иԥынҵа уҭасыр, ашьа аауеит,
Аӡәы игәы ԥужәар, аҭыӡшәа ҟалоит.