Ажәамаанақәа

17 Аҭынчра ахьыҟоу аҩнаҿы ача* кьакьа уфалар еиҳа еиӷьуп,

Аимак-аиҿак ахьыҟоу аҩнаҿы меигӡарахда афатә* умазар аасҭа.

 2 Иҟәышу амаҵуҩы зхы аԥша ҭоу аԥа напхгара изиулоит,

Иԥшәма иԥацәа ирҭынхо иаргьы иҭынхоит.

 3 Амца ахьи араӡни арыцқьоит,

Аха агәқәа ҭызҵаауа Иегова иоуп.

 4 Ауаҩы цәгьа ицәгьоу зҳәо дырзыӡырҩуеит,

Амцҳәаҩгьы уҭазырхо ажәақәа дырзыӡырҩуеит.

 5 Аӷар ихыччо Дызшаз длаирҟәуеит,

Аӡәы ирыцҳара иеигәырӷьо иқәнага дақәдмыршәакәа дзаанхаӡом.

 6 Абыргцәа ргәыргьын — рмоҭацәа роуп,

Ахәыҷқәагьы рҭаацәа* рыбзоурала ахьӡ бзиа дырҳауеит.

 8 Аҳамҭа — зыхә ҳараку* хаҳәуп измоу изы,

Дахьцалакгьы, уи ақәҿиара инаҭоит.

 9 Аӡәы игха ианазыжьуа* абзиабара ааирԥшуеит,

Аха уи агха еснагь иалацәажәо аҩызцәа гәакьақәа еилихуеит.

10 Аҟәыш знык дуриашар, иаразнак еиликаауеит,

Агаӡа шәынтә уисыргьы, изеилкааӡом.

11 Ауаҩы цәгьа дзышьҭоу аҿагылара ауп,

Аха арыцҳашьара злам ацҳаражәҳәаҩ дааины уи иқәнага дақәиршәоит.

12 Зԥацәа зцәыӡыз амшә уԥылар еиҳа еиӷьуп,

Згаӡара иақәгәыӷуа агаӡа дуқәшәар аасҭа.

13 Ауаҩы изыруз абзиара ацәгьара ала ахә ишәозар,

Ацәгьара ахаан иҩнаҭа иаԥырҵӡом.

14 Аимак-аиҿак алагамҭа аӡҭарчы аӡы ацәцара ианалаго иаҩызоуп,

Аимак-аиҿак еилашаанӡа наҟ уца.

15 Иегова ауаҩы цәгьа акгьы ихараӡам ҳәа зҳәо дицәымӷуп,

Ауаҩ иаша иқәыӡбогьы дицәымӷуп.

16 Изиҭахузеи агаӡа аҟәыӷара арҳаразы имоу алшарақәа,

Уи дашьҭамзар*?

17 Аҩыза бзиа еснагь ибзиабара ааирԥшуеит,

Иара арыцҳара уанақәшәо узықәгәыӷыртә иҟоу аиашьа гәакьа диҩызоуп.

18 Ахшыҩ змам* егьи инапы имихуеит,

Изааигәоу ишибо даҽаӡәы изы аҭакԥхықәра ихахьы игарц азы.

20 Згәы цқьам ауаҩы ақәҿиара иоуӡом,

Амц зҳәогьы арыцҳара дақәшәоит.

21 Агаӡа иаб дгәырҩалоит,

Ахшыҩ змам иабгьы дгәырӷьалаӡом.

22 Игәырӷьо агәы — хәшәуп,

Агәкаҳара — умч улнахуеит*.

23 Ауаҩы цәгьа маӡала аҵарҭыша игоит,

Аиашара еилаганы, аӡәы иус ииашамкәа иӡбарц азы.

24 Аилкаара змоу ауаҩы аҟәыӷара илаԥш ақәкуп,

Агаӡа илақәа адгьыл аҵыхәахь ирхоуп.

25 Аҷкәын гаӡа иаб агәырҩа изааигоит,

Иангьы лгәы лирхьуеит.

26 Ауаҩ иаша данахьдырхәуа* бзиаӡам,

Ҳаҭыр зқәу ауаагьы ҟамчыла ианырыпҟо иашаӡам.

27 Ауаҩ ҟәыш иажәа раӡаны дцәажәоит,

Аилкаара змоугьы дгәамҵӡом*.

28 Агаӡаҵәҟьагьы ҿимҭлар, ахшыҩ имоуп ҳәа дрыԥхьаӡоит,

Акгьы зымҳәогьы дҟәышуп ҳәа угәы иаанагоит.