Ажәамаанақәа
18 Егьырҭ рҟынтә зхы ԥхьазкуа ауаҩы игәаҳәарақәа рынагӡара ауп дзышьҭоу,
Иара аҟәыӷара мап ацәикуеит*.
2 Агаӡа ак аилкаара иҭахӡам,
Иара игәы иҭоу иҳәандаз ҳәа ауп дшыҟоу.
3 Ауаҩы цәгьа данааиуа, аԥхашьарагь ааиуеит,
Ԥхашьарак злам аусқәа ахьымӡӷ ааргоит.
4 Ауаҩы иажәақәа аӡы ҵаула иаҩызоуп,
Аҟәыӷара ахыҵхырҭа — ахьхьаҳәа ииасуа ӡиасуп.
5 Ауаҩы цәгьа иган аанкылара бзиаӡам,
Ауаҩ иашагьы изинқәа имхра иашаӡам.
6 Агаӡа иажәақәа аимак-аиҿак дырҿиоит,
Ибз аҵыхәалагьы дрыпҟоит.
7 Агаӡа ибз дҭанархоит,
Иажәақәа ацәҟьа изаҩызоуп.
8 Иҟам-ианым зҳәо иажәақәа афатә хаа иаҩызоуп,
Урҭ ҟыԥ-ҟыԥҳәа ианылбаардалак, ишиашоу рымгәахь ицоит.
9 Аусура иацәаашьо ауаҩы —
Ухзырҵәо иашьа иоуп.
10 Иегова ихьӡ — иӷәӷәоу баашуп,
Ауаҩ иаша уахь дыҩны дыҩналоит, дагьыхьчахоит*.
11 Ауаҩ беиа изы имал қалақь ӷәӷәоуп,
Уи ихаҿы иҭихыз иҳараку ҭӡамцуп.
12 Аԥагьара ауаҩы дканажьуеит,
Ахынраалара змоу ахьӡ-аԥша иоуеит.
13 Умӡырҩӡакәа аҭак ҟауҵозар, гаӡароуп,
Уи уланарҟәуеит.
14 Згәы ӷәӷәоу ауаҩы ачымазара ахгара илшоит,
Аха згәы каҳаз ицхраауеи?
15 Аилкаара змоу ауаҩы адырра ирҳауеит,
Иҟәышу рлымҳа уи аԥшаара иашьҭоуп.
16 Аҳамҭа ауаҩы алшарақәа изаанартуеит,
Уи абзоурала ауаа дуқәа рахь днеиуеит.
17 Аӡбарҭаҿы раԥхьа ацәажәара иалаго диашоушәа убоит,
Аха уи ахара здиҵо дааины азҵаарақәа иҭара далагаанӡа ауп.
18 Аҵәы анҭарыԥсо*, аимак-аиҿак ааныркылоит,
Ауаа дуқәа реилибамкаарақәагьы рыӡбоит.
19 Игәааз аиашьа игәы аҟаҵара еиҳа ицәгьоуп, ақалақь ӷәӷәа агара аасҭа,
Иҟоуп ақалақь агәашә иамоу алыкә иеиԥшу аимак-аиҿакқәагьы.
20 Ауаҩы ииҳәо имгәа злаирҭәуа афатә иаҩызоуп,
Иажәақәа игәы дырҭәуеит.
21 Аԥсреи аԥсҭазаареи абз анапаҿы иҟоуп,
Ацәажәара бзиа избо иларҵаз аадрыхуеит.
22 Аԥҳәыс бзиа дзыԥшааз ахазына иԥшааит,
Иегова уи дизыразуп.
23 Аӷар акы данаҳәо, дӷьаҵәыӷьаҵәуа даҳәоит,
Аха абеиа ихжәаны аҭак ҟаиҵоит.
24 Аҩызцәа шьоукы рылақәа ҭибахуеит,
Аха дыҟоуп аҩыза аиашьа иаасҭа иузааигәоу.