“Ilungelo Lengane Lokukhula Ngokomoya”
NGO-DECEMBER 9, 2008, i-Swedish Academy for the Rights of the Child yaba nomhlangano oyingqayizivele owawunesihloko esithi “Ilungelo Lengane Lokukhula Ngokomoya.” Izikhulumi ezazimelele iSonto LaseSweden, amanye amasonto eLobukholwa, amaSulumane nenhlangano yabathi umuntu angaziphilela ngaphandle kukaNkulunkulu zaveza imibono eminingi ngale ndaba.
Phakathi kwezikhulumi kwakunomfundisi owathi: “Akekho ongalichaza kahle nangokunembile ithonya elikhulu izindaba zeBhayibheli ezingaba nalo kuyingokomoya lezingane.” Amavesi eBhayibheli azanelisa kanjani izidingo ezingokomoya zezingane?
Lo mfundisi wathi: “Amavesi nokulandisa okuseBhayibhelini kunikeza izingane ukwaziswa ezingacabanga futhi zizindle ngakho zizodwa.” Wabalula “indaba ka-Adamu no-Eva, ekaKhayini no-Abela, kaDavide noGoliyati, yokuzalwa kukaJesu, yomthelisi uZakewu, umfanekiso wendodana yolahleko, eyomSamariya olungile.” Wazibalula “njengezinye zezindaba eziyisibonelo eziwusizo ekuqondiseni ukucabanga [kwengane] ezindabeni ezibalulekile ekuphileni njengokukhohlisa, ukuthethelela, ukubuyisana, inzondo, ukuwohloka kwesimilo, ukuthelelana amanzi nothando lobuzalwane olungenabugovu.” Wanezela: “La mavesi anezibonelo umuntu angafunda kuzo, azilingise futhi agcine esezisebenzisa ekuphileni kwakhe.”
Yiqiniso, kuyinto enhle ukukhuthaza ukuba kufundwe iBhayibheli. Nokho, ingabe ngempela izingane “zingacabanga futhi zizindle” ngalokho ezikufunde emiBhalweni “zizodwa” futhi zifinyelele eziphethweni ezifanele?
Ngisho nabantu abadala kudingeka bachazelwe amavesi eBhayibheli. Ngokwesibonelo, iBhayibheli lisitshela ngomuntu ongakwazanga ukuthola ukuqonda okungokomoya ‘ngokucabanga nangokuzindla eyedwa.’ Lowo muntu kwakuyisikhulu saseTopiya. Wayefunda isiprofetho sika-Isaya kodwa akazange aqonde ukuthi sasisho ukuthini. Njengoba ayefuna ukuqonda isigijimi salo mprofethi, wayamukela incazelo ayinikezwa umfundi uFiliphu. (IzE. 8:26-40) Akuyena lowo mTopiya kuphela owayedinga usizo. Sonke—ikakhulukazi izingane—siyakudinga ukuchazelwa amavesi eBhayibheli.
IBhayibheli liyasixwayisa: “Ubuwula buboshelwe enhliziyweni yomntwana.” (IzAga 22:15) Izingane zidinga ukuqondiswa futhi abazali banomthwalo wemfanelo wokuzinika imfundo engokomoya neyokuziphatha esekelwe eBhayibhelini nakulokho okufundiswa ebandleni lobuKristu. Izingane zinelungelo lokuthola lokho kuqeqeshwa. Kusukela zisencane, kudingeka zisizwe ukuba zakhe isisekelo esiqinile solwazi lweBhayibheli ukuze zikhule ngokomoya futhi zibe “abantu abavuthiwe . . . okuthe ngokusebenzisa amandla abo okuqonda bawenza aqeqeshelwa ukuhlukanisa kokubili okulungile nokungalungile.”—Heb. 5:14.